Потпретседателот на ВМРО-ДПМНЕ, Александар Николоски, одговарајќи на новинарско прашање во однос на Венко Филипче и ангажманот во Четвртата изборна единица, истакна дека, според него, се работи за потенцијална лидерска битка во СДСМ по изборите и кој да го преземе раководството во СДСМ, но Венко Филипче треба да даде одговори на многу прашања во јавноста, како за набавката на вакцини, модуларната болница во Тетово, случајот на Онкологија и многу други.

„Па од она што можев да го видам од неговиот прв јавен настап по објавувањето на кандидатурата, можам да видам дека се работи за потенцијална лидерска битка во рамките на СДСМ, а и тоа е она што се зборува во ‘четворката’ од луѓето што го поддржуваат дека по изборите, се надева да го преземе раководењето на СДСМ и дека затоа влегува во оваа изборна трка. Тоа си е работа на СДСМ, јас немам што да се мешам тука, но она што мислам дека јавноста сериозно ќе ја интересира е како Венко Филипче да избега од јавноста во последните неколку години, да даде одговори на неколку суштински прашања. Прво, каде е тој во однос на модуларната болница во Тетово, која изгоре, и 14-те човечки животи што беа загубени таму, второ, што мисли за тоа што Македонија имаше меѓу највисоката смртност во корона-пандемијата, трето, каква е неговата улога при набавката на вакцини преку сомнителни фирми од Хонг Конг за трговија со јужно овошје, четврто, каква е неговата улога во процесот на приватизација на стерилизацијата во сите јавно-здравствени установи во Македонија, петто, дали се обидувал или не една приватна болница во Македонија на сила или под притисок да биде продадена на еден бизнисмен од Албанија, шесто, мислам дека е фер да ѝ одговори на јавноста каква е неговата улога во случајот на Онкологија и семејството Пановски и ќе застанам тука, мислам дека е доволно за почеток“, истакна Николоски.