Македонија
Никој не свикува собраниска седница, локалните избори се одложуваат?

До доцна попладнето во понеделникот ниедна од политичките партии застапени во новиот состав на Собрението по предвремените парламентарни зибори од 11-ти декември не поднесе барање за свикување конститутивна седница на парламентот, па според сé судејќи ќе бидат одложени локалните избори кои треба да се одржат пролетва, бидејќи рокот за нивно распишување истекува до понеделник на полноќ.
Локалните избори најверојатно нема да се одржат во првата половина од мај 2017 година, како што предвидува Изборниот законик. На полноќ истекува последниот рок за распишување на изборите, според кој тие можат да се одржат во овој рок. До Собранието ниту една партија, ниту, пак, некој поединец или група пратеници не поднеле барање за свикување сорбаниска седница.
И покрај тоа што СДСМ и ДУИ, поддржани од БЕСА и Алијанста за Албанците објавија дека обезбедиле парламентарно мнозинство од 67 пратеници, сепак, не поднеле барање да се свика седница на Собранието. ВМРО-ДПМНЕ со своите 51 пратеник, секако, нема да поднесе такво барање, имајќи ги предвид заложбите за брзи нови парламентарни избори откако нивниот челник и мандатар Никола Груевски не успеа да се договори со досегашниот коалиционен партнер ДУИ да формира влада.
Според одредбите од Изборниот законик, двата датума од првата половина на мај се 7-ми и 17-ти мај, а за да може да има избори на 14-ти мај, тие мораа да бидат распишани во понеделникот, за да се зачува уставниот рок од најмалку 70 дена пред одржувањето на изборите.
Тоа практично значи дека локалните избори влегуваат во новите комбинаторики на партиите. Одложувањето на локалните избори како опција во понеделникот го навести и тетовската градоначалничка Тетута Арифи од ДУИ. Таа по средбата со евроамбасадорот Самуел Жбогар, изјави дека иако во ДУИ не се за одложување на изборите, сепак, „како што стојат работите по сé изгледа тие ќе бидат одложени“.
Постои дилемата и кој да ги распише изборите, бидејќи со Уставот е предвидено дека претстедателот на Собранието распишува парламентари и избори за претседател на државата. Од друга страна, пак, Изборниот законик предвидува дека распишувањето на сите избори го прави престедателот на парламентот. Таа одредба е пренесена од поранешниот закон за локани избори во којшто, исто така, беше предвидено дека нив ги распишува претседателот на парламентот. А претстедателот на парламентот е вториот проблем, откако не е одржана седница на којашто ќе биде избран спикерот на Собранието
Ако изборите не се одржат во мај, градоначалниците на општините и општинските совети повеќе нема да имаат никакви надлежности, а пречекорувањето на предвидениот рок повлекува измени во Изборниот законик и нов датум за локални избори.
Партиите имаат различни ставови за излез од ситуацијата, којашто може да се одрази и врз функционирањето на локалните самоуправи, каде што, исто така, е нејасно како ќе функционираат откако на актуелните избрани началници ќе им истече четиригодишниот мандат. Од СДСМ излезот го гледаат во добивањето мандат за составувањето влада од страна на шефот на државата Ѓорге Иванов, додека повеќепати од ВМРО ДПМНЕ повикаа дека излезот е во распишување нови парламентарни избори, коишто би се одржале заедно со локалните./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.