Македонија
Нова кампања на СОС Детското село – „Семејство за секое дете“

Ги прашавме децата “Kоја е нивната најголема желба?“
Некое дете сака барбика со фустани, друго нов велосипед, куче, патики што светкаат… Но, за некои деца најголема желба е да имаат семејство.
Оваа емотивна порака за тоа колку е важно семејството за секое дете ја пренесуваме преку кампањата подготвена по повод одбележувањето на 15 мај – Меѓународниот ден на семејството.
Носител на кампањата е видео спот, но и други активности поврзани со одбележувањето на Меѓународниот ден на семејството, при што сакаме да се подигне свеста на јавноста за важноста и потребата од формирањето на згрижувачки семејства во нашето општество бидејќи секое дете неопходно е да расте во семејно опкружување.
Ние веруваме дека секое семејство, без разлика на неговата култура или потекло, заслужува да биде признаено за уникатните придонеси што ги носи. Во овој контекст згрижувачките семејства се многу важен дел од нашата заедница, тие го отвараат својот дом и срца за оние на кои им е најпотребно, за децата без родителска грижа и овозможуваат тие да ја почуствуваат топлината и безбедноста на семејството .
Токму тоа е и нашата мисија во изминатите 22 години, градиме семејства за децата без родителска грижа со цел секое дете да расте со љубов, грижа и чувство на припадност.
Семејството, како основна општествена единица, игра многу важна улога во животот на секое дете. Тоа влијае врз формирањето на неговиот карактер, како и врз неговата иднина и затоа како заедница не смееме да дозволиме ниту едно дете да расте без семејство.
Во моментов, СОС Детско село дава поддршка на 70 згрижувачки семејства со вкупно 169 деца и млади без родителска грижа. Преку овој концепт, децата и младите без родителска грижа растат во семејно опкружување и атмосфера, со што се поставуваат цврсти темели на нивниот натамошен живот исполнети со љубов, сигурност и поддршка.
Во рамки на активностите за одбележување на Меѓународниот ден на семејството, СОС Детско село ја промовираше својата прва едукативна сликовница „Најискрена прегратка“. Станува збор за приказна која нема возрасна граница и која пренесува универзална порака за развој на инклузијата, емпатијата, почитта и искрената детска љубов. Сликовницата „Најискрена прегратка“ може да се купи во книжарниците на издавачката куќа „Арс Ламина“, со што граѓаните ќе помогнат во мисијата на СОС Детско село да обезбеди семејство за секое дете. Голема благодарност до сопругата на претседателот што ја поддржа промоцијата на оваа сликовница и ја истакна важноста на инклузијата на секое семејство во секојдневниот живот.
Секој од нас може да помогне во мисијата на СОС Детско село и да усреќи многу деца без родителска грижа. За секое дете да расте во семејство, помогнете и донирајте преку веб-страницата на СОС Детско село Донирај СЕГА!.
Погледнете го емотивното видео на СОС Детско село Семејство за секое дете
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паника во Катланово и Петровец поради голем пожар, Ангелов смирува дека нема опасност да се запали бензинската

Попладново пожар изби и помеѓу Катланово и Петровец. Директорот на Дирекцијата за заштита и спасување Стојанче Ангелов вечерва во видео-изјава посочи дека пожарот е пресечен и не претставува закана за бензинската пумпа која е во близина.
„Пожарот кој што изби помеѓу Катланово и Петровец во близина на безинската пумпа е делумно локализиран, односно е пресечен и не претставува опасност за блиската бензинска пумпа. Се движи кон село Чифлик, а на негово ставање под контрола работат скопските пожарникари. Рано наутро ќе се упати и ер-трактор, а ќе упатиме и неколку возила. Се работи за непријатен пожар кој се наоѓа на непристапно место, но верувам дека утре пожарникарите ќе го стават под целосна контрола. Видлив е од автопатот и предизвикува вознемиреност, но граѓаните да не се плашат бидејќи не може да ја зафати бензинската пумпа“, изјави Ангелов.
Македонија
До 18 часот вкупно 29 пожари на отворен простор, гори уште на 14 места

До 18 часот вкупно 29 пожари на отворен простор, од нив 14 активни, четири под контрола и 11 изгаснати.
Како што информираат од ЦУК активни пожари има во Општина Василево, Радовиш и Берово – с. Нивичино (планината Голем Готен и Малешевските планини – нискостеблеста шума, смрека, грмушки и ниска вегетација), Општина Прилеп – с. Бешиште, Бешишки Рид, кон с. Градешница (опш. Новаци) и кон границата со Р. Грција (мешана шума), Прилеп и Кавадарци – помеѓу с. Царевиќ, Смолани, Радобил, Дрен, Галиште и Трстеник (мешана шума и ниска вегетација), Македонски Брод – помеѓу с. Црешево, Локвица и Крапа (деградирана дабова шума и грмушки, Желино – помеѓу с. Церово и Групчин (нискостеблеста и деградирана шума),Крива Паланка – с. Нерав (висока борова шума), Старо Нагоричане и Куманово – с. Облавце, Бељаковце, Довезенце, Орах и Ругинце (ниска вегетација), Битола – с. Велушина (ниска вегетација), Битола 2 – с. Миџитлија (ниска вегетација), Кичево – с. Горно Трско (ниска вегетација и ниска шума), Македонска Каменица – с. Косевица (борова шума), Струга – с. Ново Село и с. Делогожда (ниска вегетација и стрниште), Штип – помеѓу с. Драгоево и Селце (нискостеблеста шума, прнар и сува трева),Петровец – с. Ржаничино (ниска вегетација).
Пожарите кај Македонски Брод 1 – с. Грешница, Македонски Брод 2 – с. Латово, Карбинци – с. Јунузлија и кај Петровец – с. Средно Коњаре кај р. Пчиња се ставени под контрола.
Македонија
Алиу ветува 205 милиони евра за болници кои инспирираат доверба, а не страв

Верувам дека здравството е повеќе од систем. Тоа е нераскинливо морално ветувањето што си го даваме едни на други: дека кога најмногу ни треба, ќе има некој тука за нас“, порачува во видео обраќање министерот за здравство, Азир Алиу.
Тој нагласува дека тоа ветување денес има потреба да се врати во системот, но без импровизирани одлуки, туку со јасна визија. Без носталгија, со податоци и храброст.
-Визијата станува реалност со голем прв чекор: 205 милиони евра за болници кои инспирираат доверба, а не страв, вели министерот Алиу, додавајќи дека во Штип ќе се гради модерна клиничка установа и Факултет за медицина за идните генерации лекари.
-Во Тетово, болницата ќе добие современа медицинска опрема и два нови објекти, со што ќе прерасне во симбол на грижа и достоинство. Во Кичево, каде што болницата остана нереализирано ветување од минатиот век, од темел ќе градиме нова, светла, топла и достојна за секој од вас, вели министерот Алиу.
Тој истакнува дека ова е само почеток, бидејќи хоризонтот на неговата визија е многу подалеку.
-Да изградиме модерно, хумано и дигитализирано здравство. Ние не сме тука да чекориме по патеки од минатото кои не водат никаде, ние сме овде да градиме доверба за идните генерации. И заедно со вас, ќе ја направиме оваа визија реалност, порачува министерот за здравство, Азир Алиу во неговото видео обраќање.