Македонија
Нова министерска тројка од ЕУ ќе допатува во Македонија за да разговара за уставните измени
Министри од Франција, Германија и од Полска ќе допатуваат во посета на земјата за да разговараат за забрзување на евроинтегративниот процес на Македонија.
Како што соопштија од кабинетот на вицепремирот за европски прашања, Бојан Маричиќ, во посета доаѓа т.н. вајмарска тројка, односно Лоранс Бун, државна секретарка задолжена за Европа при Советот на министрите на Република Франција, Ана Лирман, министерка за Европа и клима на Сојузна Република Германија, и министерот за Европска Унија на Република Полска, Шимон Шинковски вел Сенк, и ќе престојува два дена во Скопје.
Маричиќ и министрите, како што е соопштено, ќе разговараат за преговорите со ЕУ, со фокус на исполнувањето на обврските и задачите што произлегуваат од преговарачката рамка и забрзувањето на евроинтеграцискиот процес по што ќе следуваат изјави на заедничка прес-конференција.
Во рамките на посетата т.н. вајмарска тројка ќе се сретне и со претседателот на Владата, Димитар Ковачевски, со претседателот Стево Пендаровски и со претседателот на македонското Собрание, Талат Џафери, и со координаторите на пратеничките групи.
Во вторник министерката за Европа и за клима на Сојузна Република Германија, Ана Лирман, ќе учествува на настанот на тема: „Подготовка за проширување на ЕУ“, кој го организира Секретаријатот за европски прашања, во соработка со Институтот за европска политика (ЕПИ).
Ова е втора министерска тројка што за помалку од една недела доаѓа во Скопје. Минатата недела во Македонија беа министрите за надворешни работи на Австрија – Александар Шаленберг, на Чешка – Јан Липавски и на Словачка – Мирослав Влаховски. Порачаа дека без уставните измени се неопходни за Македонија да остане на траката за ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одземена дрога испратена во мала пратка и огнено оружје од скопјанец
Одземени 30 грама дрога и пиштол од скопјанец, по заедничка акција на инспектори од Одделението за истраги при Царинската управа и крим полицијата при МВР.
Дрогата е откриена при претрес на лицето извршен откако истото подигнало пратка во Пошта пристигната од Германија. Во координација со дежурен јавен обвинител, инспектори од Секторот за контрола и истраги заедно со припадници од МВР извршија и претрес во домот на лицето каде е пронајден пиштол кој е одземен од страна на царинските инспектори, соопшти Царинската управа.
Против лицето ќе биде поведена кривична пријава до Основното јавно обвинителство.
Царинската управа согласно приоритетите во континуитет спроведува акции за сузбивање на сите форми на криминал, грижејќи за безбедноста на своите граѓани, додаваат во соопштението.
Скопје
Санкционирани 191 непрописно паркирано возило на територија на општина Центар
ЈП Паркинзи на Општина Центар и Општина Центар во соработка со Сообраќајната полиција-Скопје санкционираа 191 непрописно паркирано возило кои го попречувале нормалното и безбедно одвивање на сообраќајот.
„Во периодот од 13.05. до 19.05.2024 година, со помош на специјалните возила „Пајак“ на ЈП ПОЦ отстранети се 102 непрописно паркирани возила, а со поставување на механичко средство „Блокатор“ санкционирани се 89 возила кои биле затекнати на резидентни паркиралишта, а не биле корисници-резиденти на секторот во којшто биле паркирани“, велат од ПОЦ.
За трајно решение на сообраќајниот метеж и проблемот со неправилното паркирање неопходна е поголема сообраќајна култура, затоа ЈП ПОЦ и СВР Скопје во наредниот период ќе продолжат со секојдневно отстранување на сите непрописно и несовесно паркирани автомобили во општина Центар со цел да се подигне сообраќајната свест на повисоко ниво и да се зголеми безбедноста во сообраќајот, се додава во соопштението на ПОЦ.
Македонија
Пожарникарите извлекоа паднат човек во реката Драгор
Регионалниот ЦУК Битола информира дека пожарникарите од ТППЕ Битола од 18.45 до 19.35 часот, со четири пожарникари и едно противпожарно возило интервенирале на извлекување паднат човек во река Драгор кај месноста „Сали Мост“.
Паднатото лице не било повредено.
Од ЦУК апелираат за голема внимателност при појава на локалните нагли метео промени, да се избегнува движење во засеци во природата, суводолици и многу блиску до речни корита… и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја, внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови.
Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.