Македонија
Нова сајбер-измама во Македонија: претставувајќи се како УЈП, крадат банкарски податоци – и порталот регистриран со туѓ идентитет

Нова сајбер-измама изминативе денови ги демне граѓаните. Преку СМС-порака, во која стои „УЈП: Извршете ја задолжителната пријава“ и има линк до лажна веб-страница, чиј регистратор не е Управата за јавни приходи, се собираат лични податоци од граѓаните. Алармот го вклучи член на групата „Сојузен комитет на програмерите“. Тој сподели каква СМС-порака добил, а потоа и податоците што биле побарани да ги внесе кога го отворил линкот. Утринава, лажната страница, која е претставена како да е на УЈП – не работи. Случајот е пријавен и во институциите. За разлика од други случаи, овде веб-порталот е регистриран во Македонија, но постои сомнеж дека тоа е направено со внесување лажни податоци.
Регистрираниот лажен домен е многу сличен со оној на УЈП, што остава простор лесно да се наседне на измамата. Разликата е во само една цртичка. Лажниот домен е регистриран како „ујп-гов.мк“, а до сервисите на УЈП се пристапува преку „ујп.гов.мк“. Сајбер-измамата е активна токму во месеците кога граѓаните ги поднесуваат и потврдуваат годишните даночни пријави.
Во првиот прозорец, кој се појавува кога ќе се кликне на лажниот линк, се бараат да се внесат лични податоци – име, презиме, адреса на живеење, град, датум на раѓање, имејл, телефонски број. Со клик на следно – се крадат и податоците за платежната картичка.
Од граѓаните се бара да се внесат бројот на картичката, рокот на важност и кодот од задната страна на картичката. Овие информации се доволни за измамниците да ги извадат сите пари што се на располагање. Во третиот и четвртиот прозорец измамниците бараат да се прикачи личната карта, и тоа од двете страни.

Design space paper textured background
По внесувањето на сите податоци – веб-страницата пренасочува кон вистинската страница на УЈП преку која се поднесуваат даночните пријави.
Лажната веб-страница на измамниците, кои се претставуваат како УЈП, е регистрирана на 6 февруари. Како сопственик е впишан извесен Јован Трајановски. Освен тоа, лажна и неточна е и имејл-адресата. „Макфакс“ се јави на бројот што е оставен за контакт кога измамниците го регистрирале порталот. Слушалката од другата страна ја крена жена. Кога го побаравме Јован, таа посочи: „Грешка сте“.
Ја проверивме и адресата внесена како седиште на регистраторот на лажната веб-страница. Измамниците како назив на улицата внеле булевар „Јане Сандански“, а како број пишале 12. Но, не пишале број на зграда, број на влез и број на стан. „Макфакс“ ги провери сите граѓани што како свое живеалиште ја имаат впишано оваа адреса. Станува збор за речиси 400 жители. Но, меѓу нив нема никој со име Јован Трајановски.
„Макфакс“ побара одговори и од МВР дали ваков случај е пријавен кај нив. Од „Марнет“, каде што се регистрираат сите домени со „.мк“, прашавме како е направена оваа регистрација со лажни информации, зошто и по два месеца, веб-страницата е активна, но и дали ќе истражуваат преку која агенција е регистриран. Од двете институции очекуваме одговори во текот на денот. Став побаравме и од Управата за јавни приходи. Тие потврдија дека страницата не е нивна и испратија апел до граѓаните.
„Веб-страницата е лажна, не e во сопственост на Управата за јавни приходи. Испраќачот на пораките се обидува да ги злоупотреби името и логото на УЈП и да ги доведе во заблуда граѓаните да споделуваат лични податоци и на тој начин да се изложат на ризик и можна злоупотреба. Управата за јавни приходи ги презема сите неопходни активности за справување со оваа состојба“, велат од УЈП.
Ова не е прва ваква измама во Македонија. Изминатава година граѓаните алармираа, а МВР постапуваше по десетици вакви пријави. На ист или сличен начин, но преку веб-страници регистрирани во странство, се крадеа податоци од граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.
Македонија
Ангелов на состанок во Берово: Планирање на акција за справување со пожарот над Русиново

Раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов, синоќа присуствуваше на координативниот состанок на Општинскиот штаб за заштита и спасување во Берово, предводен од градоначалникот Звонко Пекевски.
На работниот состанок се анализираа извештаите за движењето и интензитетот на пожарот во планината над селото Русиново. Како главни предизвици беа посочени променливиот ветер, остатоците од стари пожари – шупливи дрвја кои при горење паѓаат по стрмнините – како и непристапниот терен, што значително го отежнува гаснењето.
Според соопштението од ДЗС, состанокот траел подолго поради разгледување на повеќе стратегии за утринска интервенција. Се планира комбинирана акција со теренски сили, механизација и ангажман на воздухоплови, чија активност ќе се координира од земја во согласност со конкретните дневни услови.
Ова е дел од континуираните напори за справување со активните пожари во источниот дел на земјата.
Македонија
Tри улици од Карпош ќе останат околу шест часа без струја

Без електрична енергија денес ќе останат корисниците од три улици во Карпош.
Во периодот од 08.15 до 13.30 часот, без струја ќе бидат корисниците од улиците Иван Цанкар – парни броеви, Франц Прешерн – непарни броеви и Вангел Дину. ( општина Карпош ), информира ЦУК по известување добиено од ЕВН.