Денеска Христијан Мицкоски објави историско понижување на трудот на здравствените работници. Неговата најава е за минимално односно историски најниско зголемување од 10% во споредба со досегашниот раст на платите, реагираат од СДСМ по изјавата на премиерот Христијан Мицкоски за покачување на платите на вработените во здравството.

„Вкупните примања на лекарите специјалисти од 2017 до 2024 година, заедно со дежурства се зголемени меѓу 100-160%. по корекцијата на коефициентите од страна на СДСМ.

Основната плата на лекарите специјалисти СДСМ ја зголеми за 40 проценти, на медицинските сестри ја зголемивме помеѓу 20 и 23 проценти, на општите лекари за 25 проценти, на здравствени соработници за 15 проценти. Минатата година во октомври се потпиша и Спогодбата со здравствениот синдикат за ново зголемување на платите на здравствените работници кое требаше да биде над 20% и тоа сега веднаш а не Мицкоски да прави лоша математика.

Здравствените работници заслужуваат почит и плати за достоинствен живот“, додаваат од опозициската партија.

Прашуваат дали целта на Мицкоски му е да ги избрка да работат по странство или по приватните клиники.

„Реално а не лажно зголемување е прашање за грижата за здравјето на нашите граѓаните и на целото наше општество но Мицкоски тоа нема капацитет ниту да го разбере ниту пак знаење нешто да преземе“, истакнуваат од СДСМ.

Министерот за внатрешни работи Панче Тошковски денес оствари работна средба со амбасадорот на Република Австрија, Мартин Памер.

На средбата беше потврдена одличната соработка помеѓу двете земји и министерствата за внатрешни работи, како и заедничката посветеност кон регионалната и глобалната безбедност, борбата против криумчарењето на луѓе и илегалната миграција, против тероризмот и сајбер криминалот како едни од приоритетните области.

Посебно беше истакната соработката со Фронтекс на нашата јужна граница во чиј состав има австриски полициски службеници.

Од страна на амбасадорот Памер беше потврдена поддршката на Австрија кон нашата интеграција во ЕУ и секако во реформите и борбата со криминалот и корупцијата.

Воедно на средбата беше претставен и новиот офицер за врски во Амбасадата на Република Австрија со седиште во Скопје Клаус Грубер, кој доаѓа на функција после двегодишниот мандат на офицерот за врски во заминување Манфред Јурчевиќ.

Данела Арсовска да се сврти зад себе и да види што направи за жителите на Скопје во изминатите три години на чело на Градот, порачуваат од ВМРО-ДПМНЕ.

„И, секако, штом се сврти назад, Арсовска ќе види дека за цели три години локална власт во Скопје не направи ништо за Скопје и скопјани. Во своите три години власт Арсовска во неработењето за градот и жителите го надмина и својот претходник. За цели три години власт го остави градот да се дави во смет и ѓубре. Скопје е толку валкан, што е понечист град дури и од времето на Шилегов, кој е синоним за неработење.

Јавниот превоз е во ужасна состојба. Граѓаните со часови чекаат на автобуските постојки на овие ниски зимски температури за да им дојде автобус на ЈСП. Кај што нема автобуси, така и тие што ги има Арсовска не ги одржува и постојано се расипуваат. А некои од нив, поради нередовното сервисирање, возејќи, се запалуваат, така што го загрозуваат животот на патниците и воопшто на сите граѓани“, реагираат од партијата на власт.

Но, сепак, според нив, има нешто што на Арсовска ѝ оди и во што е, како што истакнуваат, рекордер.

„За нецели три години од мандатот како на производна лента смени 30 директори на јавни претпријатија и институции под надлежност на Град Скопје и тројца секретари на Градот, кои самата ги постави. А во моментот не се знае дали Скопје има генерален секретар.

Значи, наместо да работи за подобрување на состојбите во градот, Арсовска три години од својот мандат добиен од граѓаните се занимавала со лични и персонални прашања за раководителите на институциите избрани токму од неа“, додаваат од ВМРО-ДПМНЕ.

И сето ова, според нив, покажува дека нејзиното дејствување е на граница на лудоста, што ги загрозува безбедноста и животот на граѓаните.