Македонија
Нови 770 случаи на Ковид-19, меѓу починатите 23-годишно лице

Во согласност со податоците од Институтот за јавно здравје, Министерството за здравство информира дека во последните 24 часа направени се 2.043 теста, а регистрирани се нови 770 случаи на Ковид-19: Скопје – 364, Битола – 47, Охрид – 46, Куманово и Кавадарци – по 38, Тетово – 30, Прилеп и Велес – 26, Неготино – 17, Струмица – 16, Штип – 15, Кочани и Струга – по 14, Ресен – 13, Гостивар – 12, Гевгелија – 10, Крива Паланка – 7, Радовиш и Кратово – по 5, Дебар и Крушево – по 4, Свети Николе и Валандово – по 3, Кичево, Пробиштип, Македонски Брод и Македонска Каменица – по 2, Делчево, Берово, Богданци, Демир Хисар и Демир Капија по 1.
Од вкупниот број позитивни (770), регистрирани се 207 реинфекции.
Регистрирани сe 363 оздравени пациенти, и тоа од: Скопје – 182, Охрид – 23, Битола – 21, Куманово – 20, Прилеп и Велес – по 14, Кавадарци – 13, Струмица и Штип – по 12, Тетово – 8, Гостивар – 7, Кичево – 5, Неготино, Кочани и Делчево – по 4, Струга, Крива Паланка и Радовиш – по 3, Македонски Брод, Демир Капија и Дојран – по 2, Ресен, Гевгелија, Кратово, Дебар и Валандово – по 1.
Во текот на изминатите 24 часа пријавени се 2 починати лица: од Свети Николе (23) и од Скопје (76). Лицата се починати во болнички услови.
Во согласност со регистарот на умрени лица со дијагноза Ковид-19 од „Мој термин“, регистрирани се две починати лица: од Радовиш (73) и од Крива Паланка (66). Едното е починато во болнички, а другото во домашни услови. Лицата се пријавени за починати во периодот од 20.6.2022 до 28.6.2022 година.
Направени се 2.043 теста преку: ИЈЗ-325, ЦЈЗ Скопје-45, ЦЈЗ Битола-40, ЦЈЗ Прилеп-27, ЦЈЗ Тетово-41, ЦЈЗ Куманово-47, Клиника за инфективни болести и фебрилни состојби-0, Судска медицина-0, лабораторија болница Козле-0, УК Пулмологија со алергологија–2, ГОБ 8 Септември-0, Институт за микробиологија–155, Жан Митрев (Филип Втори)-22, Авицена-66, Биотек-130, Систина-48, лабораторија Лаор-12, Синлаб-12, Ремедика-12, Плодност-25, Генеа-14, Никоб лаб-78, ВФВ медикал-5, Ели медика плус-8, Ројал медика–2, Спектра-ММ-14, Рапид лаб–9, Жан Митрев Струмица–1, Нова лаб дијагностика–3, Рамус-21, ЈЗУ и ПЗУ (рапид-тест) – вкупно 879.
Досега во земјата се направени вкупно 2.100.604 тестирања на Ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 319.806, бројот на оздравени пациенти е 307.342, на починати е 9.343, а бројот на активни случаи изнесува 3.121
Според епидемиолошки анализи, во моментот дистрибуцијата по градови е следна:
Дистрибуција по градови Заболени (вкупно), Активни случаи (вкупно)
Скопје 151.347, Активни 1.562
Куманово 17.050, Активни 144
Битола 16.202, Активни 235
Прилеп 14.471, Активни 134
Тетово 13.708, Активни 108
Кавадарци 10.980, Активни 128
Велес 10.043, Активни 113
Гостивар 9.738, Активни 61
Охрид 9.243, Активни 152
Штип 8.230, Активни 53
Струмица 8.224, Активни 69
Кичево 5.721, Активни 32
Кочани 5.193, Активни 45
Струга 4.803, Активни 51
Гевгелија 4.477, Активни 30
Неготино 3.770, Активни 34
Ресен 2.797, Активни 32
Свети Николе 2.659, Активни 12
Радовиш 2.563, Активни 17
Крива Паланка 2.453, Активни 21
Делчево 2.008, Активни 5
Берово 1.701, Активни 8
Дебар 1.690, Активни 4
Валандово 1.510, Активни 13
Виница 1.401, Активни 3
Пробиштип 1.286, Активни 4
Богданци 1.035, Активни 4
Кратово 993, Активни 19
Крушево 938, Активни 5
Демир Хисар 848, Активни 9
Македонски Брод 754, Активни 9
Демир Капија 599, Активни 2
Македонска Каменица 527, Активни 2
Пехчево 486, Активни 0
Дојран 358, Активни 1
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ со остра реакција до Мицкоски: Сака да ни го избрише идентитетот со електронски попис

Демократската унија за интеграција (ДУИ) денеска жестоко реагираше на најавите од премиерот Христијан Мицкоски и Владата за спроведување на електронски попис во 2026 година, обвинувајќи дека станува збор за националистичка агенда со цел исклучување на Албанците од институциите и системот.
Во реакцијата, ДУИ потсетува дека уште во 2022 година, Мицкоски јавно ги оспори резултатите од пописот на населението, каде беше утврдено дека Албанците сочинуваат 29,5% од вкупната популација.
„Тој тогаш вети дека штом ќе дојде на власт ќе организира електронски попис за да ги ‘коригира’ резултатите. Тоа не беше техничка изјава, туку политичка порака – дел од серија ветувања со слоганот ‘да им се покаже местото на Албанците’“, стои во реакцијата на партијата.
ДУИ обвинува дека новата власт го спроведува овој план преку институциите кои ги има ставено под своја контрола.
„Уставниот суд, Јавното обвинителство и други тела активно работат во служба на оваа агенда – укинување на Балансерот, уривање на механизмите за заштита од мајоризација, исклучување на албанскиот јазик, систематско маргинализирање на Албанците во администрацијата, безбедносните служби и армијата“, наведуваат од партијата.
ДУИ не ја штеди ниту коалицијата Вреди, која според нив, со својата тишина и поддршка, ја легитимира политиката на ВМРО-ДПМНЕ.
„Уценети и заробени, тие создаваат лажна слика за мултиетничност на владата. Албанците не се наивни и никогаш нема да прифатат да бидат предмет на ‘дигитален инженеринг’, дури и ако во тој процес учествуваат Албанци од Вреди“, велат од ДУИ.
На крајот, од партијата испратија порака до граѓаните:
„Овие обиди нема да поминат. Ќе се спротивставиме со сите демократски средства, а Албанците ќе знаат да го заштитат својот глас, своето место и своето достоинство во оваа држава“.
Скопје
Центарот на Скопје блокиран два дена поради средба на високи гости

Поради најавената средба на лидерите од Западен Балкан која ќе се одржи во Скопје, Секторот за внатрешни работи информира дека во понеделник (30 јуни) и вторник (1 јули) во главниот град ќе биде воспоставен посебен режим на сообраќајот.
Од СВР Скопје соопштуваат дека мерките ќе се однесуваат на поширокото централно подрачје на градот, при што дел од улиците и булеварите ќе бидат затворени во различни временски интервали, во зависност од движењето на делегациите.
„Станува збор за највисоко ниво на безбедносна организација, и апелираме до сите граѓани да покажат разбирање и трпение. Полициските службеници ќе бидат распоредени на клучни локации и ќе ја координираат обиколката на возилата“, изјави за медиумите полициски службеник од Единицата за безбедност на патниот сообраќај.
Од СВР додаваат дека сите учесници во сообраќајот треба строго да ги почитуваат наредбите и знаците кои ќе ги даваат униформираните полициски службеници, со цел да не се создаваат дополнителни метежи или проблеми.
„Сите неопходни информации за затворените улици и алтернативните правци ќе бидат достапни преку медиумите и социјалните мрежи. Апелираме возачите да планираат алтернативни рути и да тргнуваат порано од дома“, велат од полицијата.
Граѓаните кои живеат или работат во централното градско подрачје се советуваат да користат јавен превоз или алтернативни средства за движење за време на двете критични деноноќија.
Македонија
Талески: СДСМ ги направи тунелите, мостовите, оградите – ВМРО само бетон од 10 метри

Со завршувањето на експресниот пат низ Фаришката клисура, делницата од Дреново до Градско, пратеникот на СДСМ, Миле Талески, остро реагираше на обидите на ВМРО-ДПМНЕ да си го припише проектот како сопствен. Тој потсети дека најтешкиот и најкомплексен дел од трасата е изведен токму во мандатот на СДСМ.
„Горди сме затоа што СДСМ заврши над 90% од овој капитален инфраструктурен проект. Станува збор за делница долга 10,2 километри, со вредност над 33 милиони евра, која има огромно значење не само за Прилеп и прилепчани, туку и за целиот Пелагониски регион“, изјави Талески.
Тој додаде дека во мандатот на СДСМ биле целосно завршени двата тунели со вредност од околу 6 милиони евра, биле асфалтирани 95% од трасата и изведени сите клучни елементи: 21 мост, 11 потпорни ѕидови, 15 пропусти, 1 вијадукт и 1 галерија.
„Ова не е само пат, туку животна артерија за економијата, транспортот и безбедноста во регионот. Нашата работа зборува сама за себе“, додаде тој.
Во однос на активностите на актуелната власт, Талески беше јасен:
„Што направи ВМРО-ДПМНЕ за една цела година? Заврши само мал дел, санира едно свлечиште, постави бетон од 10 метри, дел од сигнализацијата и оградите. И потоа, секако, сликање пред камери и китење со туѓи перја“.
Тој подвлече дека, и покрај тоа, најважно е што патот конечно е завршен и достапен за граѓаните, и потсети на низа други проекти изведени во мандатот на СДСМ, како експресниот пат Градско–Дреново, обновата на делницата кај Плетвар, патот до езерото кај Прилеп, како и почетокот на автопатот Прилеп–Битола, дел од Коридорот 10д.
„СДСМ сериозно инвестираше во патната инфраструктура и ние ќе продолжиме по тој пат. Благодарност до сите градежници, инженери и проекти кои ја реализираа оваа важна делница“, истакна Талески на крајот.