Денеска, во 14 часот, вработените во Филхармонијата ќе одржат протест пред Министерството за култура, кое веќе доби црвен картон на последниот концерт од официјалниот дел од концертната сезона „Дамар на слободата“, кој се одржа во петокот на сцената на НОБ во рамките на фестивалот „Мајски оперски вечери“.

„Нашите протести продолжуваат сè до конечната промена на штетната одлука што ја донесе Министерството за култура. Колку повеќе Министерството за култура го пролонгира решавањето на проблемот, толку повеќе се продлабочуваат и последиците, кои веќе се одразуваат и на работата на нашата институција.

Негативната медиумска кампања во последните неколку месеци направи сериозна штета на угледот и реномето на нашата институција. Нападите на поединци, но и оркестрираните платени текстови во медиумите, целосно ја искривија реалната слика за проблемот во јавноста. Сто пати повторена лага – станува вистина беше лајтмотивот на манипулативната медиумска кампања, која сè уште се води против нашата институција.

Вистината и аргументите се на наша страна, тоа ѝ е јасно и на министерката за култура, Бисера Костадиновска-Стојчевска, која не сакајќи да ја признае сопствената грешка, влезе во отворена војна со нашата институција“ соопштија од Филхармонијата.

Од таму велат дека треба да бидат информирани доколку од Министерството за култура работат на решение на проблемот. Се жалат дека нивната институција е нападната од инспекции на Министерството за култура и дека имаат блокирана сметка.

Вработените во Филхармонијата ѝ се обратија на министерката за култура наведувајќи дека се борат против манипулациите и лагите поради кои нивната институција во последните три месеци трпи сериозна штета.

„А вие со вашите досегашни потези, изјави и игнорантски однос кон нашата институција само потврдивте дека имате проблематичен однос кон традицијата, културата и кон врвните професионалци, кои ѝ дадоа безрезервна поддршка на Филхармонијата“, порачаа вработените во Филхармонијата.