Македонија
„Обвинението се заснова на голо правно мислење“ – ексчленовите на ДИК негираат вина во „Титаник 2“

Поранешните членови на Државната изборна комисија, Бедредин Ибраими, Сашо Срцев, Влатко Сајковски и Анета Стефановска негираа вина во „Титаник 2“ за изборни нерегуларности до 2013 година. Сите во своите завршни зборови посочија дека работеле стручно и непристрасно, додека пак, за обвинителот Гаврил Бубевски посочија дека не докажал надвор од разумно сомневање дека тие навистина го сториле делото. Најдолги излагања на последното рочиште, пред пресуда, имаа Ибраими и Срцев.
„Завршните зборови се само прилагодени, а веќе еднаш се дадени. И во претходното обвинение наведов дека овие дејствија на извршување беа предмет на обвинение и беа елаборирани во завршните зборови. Не сме сториле кривично дело повреда на избирачкото право. Функцијата сум ја вршел одговорност, стручно, непристрасно, принципиелно. Тоа е потврдено во постапкава. Барам судот да донесе ослободителна пресуда“, рече Ибраими.
Говореше и Срцев, кој на судот му рече: „Обвинението се заснова на голо правно мислење“.
„Останувам на предлогот за ослободителна пресуда дадена во 2019 година од причина што таа аргументација може да се однесува и ан денешното изменето обвинение. Не се сомневам дека ќе донесете законита одлука, како што ја донесовте претходната“, кажа адвокатот Димитар Дангов застапник на Срцев.
Во завршните зборови, адвокатот на обвинетиот Влатко Сајковски кажа дека судиите Огнен Ставрев и Осман Шабани не можат да утврдат вина кај неговиот клиент.
„Убеден сум дека судот може да утврди дека Сајковски не може да се јави како сторител на кривично дело за кое се гони бидејќи донесената одлука од ДКСК каква и да е, не е конечна и не предизвикува повторување на гласање бидејќи таа подлежи на тужба до Управен суд која е конечна. И самата одлука на Управниот суд не предизвикува прегласување туку тоа зависи од друга околност. Да се ослободи од обвинение. Обвинителството не докажа дека обвинетиот го сторил делото“, кажа адвокатот на Сајковски.
Адвокатот на Стефановска бараше да биде ослободена, а таа децино кажа дека се гордее со тоа како постапила додека била член на ДИК.
„И покрај тоа што со најголема почит настапувам кон обвинителот, тој укажа дека сега сме направиле ново дело, а не истото како она за кое се судевме шест години. Јас сум ваша колешка и добар познавач на правото, сум одлучувала темелно. На мене никој не може да влијае а камо ли некој да ме обвини дека сум се договарала… Не можам да си одговорам за прашањето за што сум обвинета.. Јас немам вина, треба да бидам ослбоодена… Ова е црна дамка без потреба. Јас сум многу исправна и се гордеам со тоа како постапив. Очекувам дека ќе донесете ослободителна пресуда“, кажа Стефановска.
„Титаник 2“ се суди одново бидејќи пресудата беше укината од Аплеација. Претходно, поранешниот член на ДИК, Бедредин Ибраими, доби казна затвор од 4 години и 6 месеци. Поранешните членови на ДИК, Сашо Срцев, Влатко Сајковски и Анета Стефановска добија казни од 3 години за незаконското поништување на гласањето на локалните избори во Струмица во 2013 година поради политичко влијание.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во моментот нема активни пожари, надлежните апелираат да се внимава за Илинденските празници

Според податоците на Центарот за управување со кризи (ЦУК), заклучно со 18:00 часот , нема ниту еден активен пожар. Шест се целосно изгаснати, додека еден е ставен под контрола.
Под контрола е пожарот во Општина Берово, во реонот на планината Готен кон Малешевските Планини, каде што е зафатена нискостеблеста шума, смрека, борова и букова шума, како и грмушки и ниска вегетација.
Во изминатото деноноќие, пожарните служби успешно се справија со шест пожари на отворен простор ширум земјата. Во Општина Карбинци, пожар избувна во шумскиот предел кај селото Јунузлија. Слична ситуација се случи и во Општина Кавадарци, каде што пламна ниска вегетација помеѓу селата Галиште и Ќесендре.
Во Општина Прилеп беа активни два пожара. Првиот се прошири од селото Бешиште, низ местото познато како Бешишки Рид, и продолжи кон територијата на Општина Новаци и граничниот појас со Грција. Вториот зафати поширок реон помеѓу селата Царевиќ, Смолани, Радобил и Дрен, каде што гореше мешана шума и нискостеблеста вегетација.
Во скопската Општина Гази Баба беше изгаснат пожар во село Трубарево, каде што гореше отпад, додека во Општина Гевгелија беше изгаснат уште еден пожар во селото Милетево, кој зафати ниска вегетација.
Директорот на Дирекцијата за заштита и спасување, Стојанче Ангелов, денеска апелираше за внимателност за Илинденските празници, за да не се предизвикаат пожари.
Македонија
Арсовска за Чаир: Денес 50 дивоградби, утре уште 50, луѓето не заслужуваат да живеат безбедносно загрозени

Градоначалничката на Скопје, Данела Арсовска, денеска изјави дека до Обвинителството за гонење на организиран криминал и корупција е доставена обемна документација од 3.200 страници поврзана со сомнителни постапки за легализација и изградба на објекти во општина Чаир.
На брифинг со новинарите, Арсовска посочи дека станува збор за згради кои сѐ уште се градат – без документација, без проект, без платени комуналии и без статика.
„Ако нема санкционирање, денеска имате 50 згради што се градат. Утре ќе имате уште 50. Таму живеат луѓе, не бројки. И тие луѓе не заслужуваат да живеат во 12-катници без гаранција за нивната безбедност“, рече таа, предупредувајќи на сериозен преседан доколку институциите не постапат.
Документите доставени до обвинителството содржат, како што рече, докази за фалсификати, меѓу кои и изјави потпишани од лица кои во моментот на наводната изградба биле малолетни.
Таа ја нарече состојбата „очигледна операција на перење пари“, и нагласи дека ваков размер на криминал не е забележан во ниту една друга општина во Скопје.
Обвинителството веќе постапува по пријавата – одземена е документација од Општина Чаир и од Министерството за транспорт и врски, а тече споредба на податоците со други институции.
Арсовска истакна дека не планира повторна кандидатура за градоначалник, но зад себе остава над 900 реализирани проекти, од кои 250 капитални, „и покрај сериозните опструкции од Советот на градот“.
Во однос на најавата на градоначалникот на Чаир, Висар Ганиу, дека ќе ја тужи, Арсовска одговори дека ќе и биде задоволство да ги соочи доказите со него, било каде и на било која платформа.
Македонија
На секои два до три часа возење неопходно е правење куса пауза, Тошковски вели дека заморот е причина за голем број несреќи

Министерот за внатрешни работи Панче Тошковски со дел од раководството на МВР го посети граничниот премин Табановце каде заедно со претседателот на Републичкиот Совет за безбедност на сообраќајот на патиштата ја продолжија кампањата „Безбедно во лето – Вози одморен“ чија промоција беше минатиот месец на граничниот премин Богородица.
Министерот Тошковски посочи дека преку оваа кампања ги потсетуваме возачите на потенцијалните опасности од заморот, но и на ризиците од пребрзото возење, управувањето на возило под дејство на алкохол и на други сообраќајни прекршоци кои се причини за тешки сообраќајни незгоди., како и дека овие превентивни активности се насочени особено на делницата од граничниот премин Табановце до граничниот премин Богородица, каде во летниот период енормно се зголемува бројот на возила кои минуваат преку овој коридор.
„Целта е да испратиме порака дека е исклучително значајно да се фокусираме сите во превенција на несакани настани кои најчесто се случуваат од премореност на возачите. Праксата покажува дека заморот е една од главните причини за предизвикување на сообраќајни несреќи посебно во летниот период од годината при патување на годишен одмор. На долгите патувања како што е годишниот одмор клучни се паузите за одмор, на секои два до три часа неопходно е правење пауза од барем 15-тина минути. Упатуваме апел до возачите да тргнат на пат одморени бидејќи заморот е голем непријател на безбедното возење. Статистиките покажуваат дека сообраќајните незгоди предизвикани од замор за жал најчесто завршуваат фатално“, истакна министерот за внатрешни работи Панче Тошковски, додавајќи дека зголемувањето на безбедноста во сообраќајот е императив за МВР и дека и во наредниот период продолжуват активностите со цел да се намали бројот на жртви на патиштата.