Македонија
Обвинение против двајца битолски гинеколози поради смрт на новороденче

Oбвинителството во Битола поднесе обвинение против две лица за тешки дела против здравјето на луѓето.
„Обвинетите, како лекари специјалисти по гинекологија и акушерство вработени во ЈЗУ Клиничка болница ‘Д-р Трифун Пановски’ – Битола, несовесно постапувале при укажување лекарска помош – породување на пациентка родилка од селото Смилево, општина Демир Хисар, поради што настапила смрт на новороденчето“, информираат од Обвинителството.
Родилката била примена за породување на 12.10.2019 година околу 17:00 часот во Одделот за гинекологија и акушерство при Клиничка болница Битола, каде дежурни лекари биле обвинетите. Тие не ја следеле и навремено не ги регистрирале промените во здравствената состојба кај родилката. Иако сите промени во здравствената состојба на родилката претставувале апсолутен показател дека здравјето и животот на плодот е во опасност поради недоволен доток на кислород, што, пак, претставува индикација за итен царски рез, обвинетите лекари не ја презеле оваа интервенција благовремено. Поради продолженото породување и доцнењето од најмалку пет часа од појавата на индикациите за итен царски рез, интензитетот на страдањето кај плодот се зголемувал. Интервенцијата кај родилката била извршена околу 6:30 часот на 13.10.2019 година, при што се родил плод – женско дете со родилна тежина од 3.550 грама и должина од 48 сантиметри во многу лоша состојба, кое починало за кратко време по породувањето поради кислородното страдање во утробата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Супорт Кочани“: Обезбедени над 4,5 милиони денари за засегнатите лица во трагедијата во Кочани

Граѓанската иницијатива „Супорт Кочани“ (SupportKocani) ја информира јавноста за состојбата со донациите и реализираната помош заклучно со 19 август 2025 година. Оваа иницијатива, која беше формирана веднаш по трагичниот настан на 16 март 2025 година во Кочани, продолжува да работи транспарентно, координирано и во интерес на сите засегнати лица и нивните семејства.
Еден од најважните сегменти на помошта е набавката на специјализирана компресивна облека, која е неопходна во долготрајниот процес на третман и рехабилитација на преживеаните од изгореници.
– прва пратка – 149 парчиња, во вредност од 923.458 денари;
– втора пратка – 43 парчиња, во вредност од 283.802 денара;
– трета пратка – 176 парчиња, во вредност од 2.193.047 денари.
Со овие три пратки досега се обезбедени вкупно 368 парчиња компресивна облека, кои веќе се испорачани и предадени на Општата болница во Кочани за користење од страна на преживеаните лица.
Дополнително, значаен дел од средствата се насочени кон директна поддршка на Универзитетската клиника за пластична и реконструктивна хирургија – Скопје, како и кон лицата што сè уште се хоспитализирани таму.
Досега се донирани 100 комплети T-LAB PRP KIT и 10 комплети Exomine SMART KIT, со вкупен износ од 267.000 денари, 4 пакувања протеини и 4 пакувања аминокиселини, со вкупен износ од 19.120 денари и сет кремови за подобрување на еластичноста на кожата, со вкупен износ од 53.428 денари.
Овие материјали се наменети за третман на рани, регенерација на кожата и подобрување на процесот на рехабилитација, со цел полесно и побрзо закрепнување на засегнатите лица.
Заклучно со 19 август 2025 година, вкупниот прилив на наменската сметка изнесува 4.594.345 денари.
– платени трошоци за банкарски провизии: 18.277 денари;
– вкупно реализирани средства: 3.758.805 денари;
– тековно расположлива состојба: 835.540 денари.
Сите донации се резултат на поддршката од хумани граѓани, компании и организации од земјата и дијаспората, кои несебично се вклучија во оваа акција.
„Овие бројки не се само финансиски податоци – тие се доказ за солидарност, заедништво и човечка хуманост. Благодарни сме на секој поединец и на секоја компанија, кои веруваа во оваа иницијатива и помогнаа од срце. Нашата работа не застанува тука – продолжуваме да бидеме тука за засегнатите лица и нивните семејства сè додека постои потреба“, велат од иницијативата „Супорт Кочни“.
Македонија
На непристапен терен со силен оган, надлежните се борат од воздух – леталата ја формираат линијата на пресек кај Јасен

Шумскиот пожар во непристапниот терен кај Јасен е повторно активиран, а слабиот дожд не беше доволен за негово сопирање. Директорот на Дирекцијата за заштита и спасување, Стојанче Ангелов, извести дека во акцијата се вклучени армијата, Националните шуми, пожарникари и вработени во Јасен.
„Благодарност до армиските волци и ренџери кои вчера придонесоа горниот крак да биде целосно изгаснат, со силна поддршка на останатите тимови. Врз пожарот дејствуваме со три летала. Целта е денес да го стопираме движењето на овој исклучително тежок пожар, бидејќи теренот е непристапен. Имаме силно горење и недоволно кислород, ризично е да се пуштат луѓе“, изјави Ангелов.
Тој додаде дека со леталата ќе се обидат да направат линија за пресек на пожарот, а на другата страна, армиските специјалци се подготвени да интервенираат ако огнот се прошири.
Повеќе информации се очекуваат попладне.
Македонија
СДСМ: Дури и нивниот градоначалник од Кавадарци ги демантира лагите за „Еразмус+“

СДСМ обвини дека ВМРО-ДПМНЕ шири невистини за проектите преку програмата „Еразмус+“, со цел да ја одбрани актуелната в.д. директорка и да ги прикрие криминалните шеми. Од партијата посочуваат дека дури и градоначалникот на Кавадарци од ВМРО-ДПМНЕ, Митко Јанчев, јавно ја демантирал сопствената партија, објаснувајќи дека проектот за кој тие зборуваат не бил за „тренирање магариња“, туку за обука на ученици и наставници во земја членка на ЕУ, за стекнување вештини и поттикнување претприемачки капацитети, меѓу кои и производство на сирење.
СДСМ потсетува дека извештајот на ОЛАФ, доставен до Јавното обвинителство, утврдува основано сомнение за злоупотреба на над 2 милиони евра европски средства, во кои се инволвирани повеќе од 50 физички и правни лица во Македонија и уште пет земји од ЕУ. Дополнително, спорни се и 8 милиони евра распределени во периодот 2014–2017 година, кога, како што велат, евалуаторки во Агенцијата биле Ана Михајлов и нејзината кумашинка.
„Клучното прашање е во чии џебови завршија милионите евра европски пари“, порачаа од СДСМ и побараа Јавното обвинителство итно да отвори истрага и сите одговорни да понесат одговорност.