Министерството за локална самоуправа продолжува со теренските посети на општините „Каде што срцето е дома“. Денес, министерот Златко Перински, заедно со претседателот на Владата, Христијан Мицкоски и министерот за животна средина, Изет Меџити беа во Општина Кисела Вода во која ќе се реализираат четири проекти со пари од државниот буџет, одобрени од првиот јавен повик за финансиска поддршка на општините. Владините претставници заедно со градоначалникот Орце Ѓорѓиевски го посетија речното корито на Мала Рада во Драчево, за кое во тек е изработка на проект за реконструкција и санација на постоечкото бетонско корито и на потпорните ѕидови.

Министерот Перински истакна дека Владата продолжува со поддршката за локалните самоуправи, најавувајќи значајни инвестиции во Општина Кисела Вода, вклучувајќи го уредувањето на речното корито на реката Мала Рада, што ќе спречи идни поплави и ќе придонесе за економски развој.

„Владата и нејзината заложба во насока на поддршка за сите локални самоуправи продолжува и понатаму, се со цел да помогнеме и да го подобриме животот на сите наши сограѓани. Денес сме во општина Кисела Вода, во населбата Драчево, каде што практично воведуваме градежни активности за изградба и уредување на речното корито на реката Мала Рада. Ова е многу значаен и битен проект за граѓаните кои циркулираат на оваа територија од општина Кисела Вода, поради тоа што во изминатите декади, нивните имоти и поседи беа загрозени кога се случуваше оваа река да надојде. Сите овие работи кои се случуваа во минатото, со имплементација на овој градежен зафат и проект ќе се превенираат, и во иднина нема да имаме вакви несакани случки и состојби. За пофалба е заложбата на Владата, бидејќи преку првиот Јавен повик за општина Кисела Вода издвои околу 160 милиони денари, а веќе во вториот Јавен повик предвидени се повеќе од 8 милиони евра, што значи дека покрај градежниот бум којшто ќе го доживее општината, индиректно ќе предизвика и економски бум. Практично тоа се и целите на оваа Влада, од една страна да ја стимулира економијата, а од друга страна да го подобрува квалитетот на живот на сите наши граѓани.“, изјави Перински.

Премиерот Христијан Мицкоски, при посетата на Кисела Вода, истакна дека инвестициите во општините се од клучно значење за развојот на локалната заедница, нагласувајќи ја посветеноста на Владата кон реализирање на проекти вредни стотици милиони евра.

„Навистина ми претставува чест и задоволство што сум денес овде со жителите во Кисела Вода. Секогаш кога се гради и се создава, неминовно е чувството на радост и среќа. Можам само да му честитам на градоначалникот, советниците и администрацијата, да им се заблагодарам на моите колеги од Владата, на потпретседателот и министерот за животна средина, министерот за локална самоуправа и неговиот заменик, како и на пратениците од овој регион, за нивната борба и желба да се направи проект повеќе. Можам да им посакам само така да продолжат и во периодот којшто следи. Потпретседателот и министерот за животна средина истакаа дека 350 милиони евра веќе се во оптек, но јас би додал дека на негова иницијатива и на негово залагање, проекти којшто во минатото бе закочени од поранешните министри, сега се откочени, и тука станува збор за дополнителни стотина милиони евра коишто ќе бидат распределени по општините преку Министерството за животна средина. На тој начин, веќе доаѓаме до бројка од половина милијарда евра, нешто што е историски значајно и нешто што досега било невозможно, а сега се случува“, истакна Мицкоски.

Владата реагира на неточните информации за набавка на овошје и зеленчук.

„Таквите дезинформации се со цел да се креира лажна слика, и да се манипулира вистината, иако изворот на такви дезинформации е добро запознаен со фактичката состојба. Времето на државна „јагма“ како што постоеше за време на минатата власт, заврши. Не е точно дека набавката ја прави Владата, туку редовната набавка ја спроведува Службата за општи и заеднички работи (СОЗР) и истата е наменета за непречено функционирање на рестораните во сопственост на СОЗР“, велат од Владата.

Според нив оваа набавка се спроведува долги години по истиот принцип, како што е случај и со секој ресторан во државата, кој мора да располага со различни прехранбени продукти, иако некои од нив не секогаш се користат.

„Сакаме да потенцираме дека производи како манго, аспарагус и слични специфични намирници никогаш не биле набавени или нарачани од страна на фирмата која ја добила јавната набавка. Доколку постои барање од одредена висока меѓународна делегација кое вклучува вакви продукти, само тогаш тие би биле набавени согласно потребите.

Важно е да се напомни дека производите што се набавуваат се наплатуваат од крајните корисници. Или за споредба: во периодот од 01.01.2024 до 01.07.2024 година, кога Владата беше предводена од СДСМ, пријавениот промет во рестораните изнесуваше 73.257 MKD. Од 01.07.2024 до 31.12.2024, под раководство на Владата предводена од ВМРО-ДПМНЕ, пријавениот промет достигна 1.263.582 MKD.

Во 2024 година, јавната набавка за овие продукти заврши со аукциска постапка во износ од 2.625.000 MKD. За споредба, истата набавка во време на владата предводена од ВМРО-ДПМНЕ изнесувала 2.190.045 MKD.

Економските показатели ја потврдуваат намерата на владата да работи одговорно, транспарентно и без непродуктивни трошоци. Воедно напомнуваме дека и цените на услугите и јадењата на СОЗР беа поскапени со цел да нема привилегирани во поглед на користењето на истите услуги“, завршуваат од Владата.

Договор во кој приватникот треба да изгради две монтажни катни гаражи и да одвојува еден отсто од годишниот приход за државата, а граѓаните да плаќаат поскап паркинг отколку досега е на штета на јавниот интерес, вели за „Макфакс“ Зоран Лазаревски, претседател на Алијансата за јавно -приватно партнерство Ц.Р.Е.А.М., заедница за реализација европска помош.  Без двоумење, вели дека сите досегашни процедури треба да се поништат, а министерот за здравство и Владата да преземат повнимателни чекори и на нов оглас навистина да го заштитат јавниот интерес.

„Ова партнерство за мене е преседан. Не навлегувам во тоа  дали е запазена процедурата за јавно-приватни партнерство за што има конкретно пропишани постапки, има надлежни институции кои може и треба да проверат. Овде јас се прашувам кој е интересот на граѓаните, кој јавниот интерес, оти овде јавен интерес не е интересот на институцијата туку на граѓаните. Воопшто го нема ако граѓаните мораат да платат паркинг, притоа и поскап отколку досега. За да се спроведе едно јавно – приватни партнерство на право место треба да е јавниот интерес кој со физибилити студија го пропишува Владата. Јавниот интерес, односно интересот на граѓаните, не е заштитен со 50 денари за час паркирање. Можело тоа да биде барем привилегирана цена, на пример половина од сегашната, иако има начини и паркирањето да биде бесплатно за граѓаните на сметка на други услуги кои во Клиничкиот центар можат да бидат на принципот јавно-приватни партнерство кои би му носеле профит на приватникот“, вели Лазаревски.

Министерот за здравство Арбен Таравари денес објасни дека договорот со албанската компанија „Ѓока констракшн“ единствената пријавена за јавно – приватно партнерство за паркирањето во Клиничкиот центар, се уште не е потпишан. Поминати се сите постапки во Министерството за здравство, но пред да биде потпишан, треба да помине уште неколку филтри во Владата. Министерот Таравари рече дека доколку Владата не го одобри при филтрирањето и доколку граѓаните се против ваков договор, тој нема да го потпише и ќе ја поништи постапката.