Македонија
Обвинителството ја отфрли кривичната пријава против 10 судии што ја поднесе „Зелена лупа“

Основното јавно обвинителство Скопје ја отфрли кривичната пријава поднесена од Здружението за истражување, развој и анализа – Зелена лупа против десет судии за сторено кривично дело злоупотреба на службената положба и овластување.
Во кривичната пријава се наведуваше дека пријавените тројца судии во Основниот суд Скопје 1 Скопје, ја злоупотребиле службената положба, со намера за други да прибават некаква корист. Тие како членови на Советот на Основен суд Скопје 1 Скопје, во кривична постапка против двајца обвинети и покрај постоење на докази за опасност од бегство за сторени потешки кривични дела по поднесено обвинение од страна на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите го одбиле предлогот за определување мерка притвор спрема обвинетите.
Пријавените тројца судии од Апелациониот суд Скопје, пак, според наводите во пријавата како членови на Советот на Апелациониот суд Скопје, донеле решение со кое ја прифатиле жалбата на обвинителството и го преиначиле решението на Советот на Основен суд Скопје 1 Скопје спрема обвинетите, но во решението навеле дека против истото е дозволено право на жалба која го одложува извршувањето.
Според пријавата пак, четворицата судии на Врховниот суд на Република Македонија како членови на Советот на Врховниот суд на Република Македонија одлучувале по жалбата на обвинетите, наместо да ја отфрлат како неоснована.
Здружението за истражување, развој и анализа – Зелена лупа во пријавата тврди дека пријавените со своето постапување ја злоупотребиле службената положба и овластување, постапувале пристрасно, ги повредиле правилата на еднаков третман на странките, правилата на правично судење и правилата на Судскиот кодекс.
„По проучување на наводите во поднесената кривична пријава, надлежниот јавен обвинител изврши увид во судските предмети во кои постапувале судиите со цел да ја утврди фактичката состојба. Притоа било утврдено дека пријавените судии од Основниот суд Скопје 1 Скопје, постапувајќи по предлогот на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите за определување мерка притвор спрема двајца обвинети донеле Решение за отфрлање, притоа ценејќи ја исполнетоста на законските основи за определување на мерката притвор, видот, карактерот и тежината на кривичните дела кои им се ставаат на обвинетите, како и видот и висината на запретената санкција. Наместо притвор, на обвинетите лица им биле определени мерки на претпазливост за кои судиите сметале дека ќе ги исполнат целите и очекувањата за обезбедување на присуство на обвинетите и за непречено и успешно водење на постапката“, велат од Обвинителството.
Од таму наведуваат дека пријавените судии од Апелациониот суд Скопје, кои донеле решение со кое се уважува жалбата на обвинителството, во поглед на дозволеноста на правото на жалба против нивното решение, постапиле во согласност со членот 5 став 4 од Европската конвенција за заштита на човековите права, кој пропишува дека секое лице лишено од слобода со апсење или притворање има право да вложи жалба до судот и тој во кус рок да ја разгледа законитоста на тоа лишување од слобода и ако тоа не било законско, да нареди негово ослободување.
Од четворицата пријавени судии на Врховниот суд на Република Македонија, надлежниот јавен обвинител утврдил дека еден воопшто не постапувал во конкретниот предмет, додека останатите тројца одлучиле по изјавената жалба на обвинетите, бидејќи оцениле дека во конкретниот случај има можност да се примени одредбата од чл.440 ст.1 од Законот за кривична постапка за дозволеност на жалбата против решението заради остварување на правата на обвинетите на правична судска постапка.
Надлежниот јавен обвинител, имајќи го во вид постапувањето на судиите, оцени дека во пријавеното дело не се содржани суштествените обележја на кривичното дело – Злоупотреба на службена положба и овластување од чл.353 ст.3 во врска со ст.1 од Кривичниот законик. Истовремено, пријавените почитувајќи ги основните начела на кривичната постапка, постапиле согласно чл.11 ст.1 од Законот за судовите кој пропишува дека судијата одлучува непристрасно со примена на законот врз основа на слободна оцена на доказите. Во донесените одлуки пријавените јасно ги образложиле причините за одлуката што ја донеле.
„Пријавените со своето постапување не ја искористиле службената положба, не ги пречекориле границите на своето службено овластување, ниту пак со неизвршување на својата службена должност прибавиле за себе или за некој друг имотна корист или нанеле штета на друго лице, што претставува законско битие на пријавеното кривично дело. Од тие причини, надлежниот јавен обвинител оцени дека за деветмина од пријавените пријавата треба да се отфрли бидејќи пријавеното дело не е кривично дело кое се гони по службена должност, додека за еден од пријавените кривичната пријава се отфрла, бидејќи не постои основано сомневање дека пријавениот го сторил кривичното дело“, велат од Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стабилно снабдување на онкологија и хематологија, за само една година, две промени во позитивната листа на лекови која не беше обновена 10 години, се пофали Клековски

„Не почнавме од нула, туку од минус. 10 години во Македонија не беше обновена позитивната листа на лекови. 10 години од 2014-та година ниедна промена на позитивната листа, за една година ние успеавме да направиме две промени. Во првата промена 9 генерички лекови, во последната 2 онколошки лекови кои од следниот понеделник ќе бидат достапни во аптеките“, истакна членот на ИК на ВМРО-ДПМНЕ и директор на ФЗОМ, Сашо Клековски на денешната трибина во Штип на тема „Реформи во здравството – Ги градиме темелите на промените“.
Клековски додаде дека фокусот бил ставен на лековите.
„Благодарејќи на поддршката на владата одвоивме неверојатни пет милијарди денари за иновативни лекови, тоа е 70% повеќе од 2024-та година или двојно повеќе до 2023-та година. Тоа се многу повеќе пари, една милијарда повеќе за онкологија, повеќе пари за хематологија, педијатрија. Ова не се само пари, ова се животи спасени и олеснети. Стабилно снабдување на онкологија и хематологија, сите пациенти на неврологија со мултипла склероза опфатени. Луѓето на кои им треба хормон раст не чекаат веќе на тоа, и многу такви примери“, вели Клековски.
Тој истакна дека бројот на ин витро што го покрива ФЗОМ наместо 3 сега е зголемено на 6 и исто така процесот за добивање известување за барателите на ин витро е дигитализиран.
Македонија
Повторно се разгоре на Готен, шест пожари активни во државата

Денес попладне повторно се разгоре пожарот над селото Подареш на планината Готен од радовишка страна, информира директорот на ДЗС, Стојанче Ангелов. Како што рече со овој пожар надлежните борба водат над 15 дена и е исклучително тежок пожар за гаснење. Ангелов уверува дека пожарот нема да го загрози селото. Прашање е како што рече, колкава штета ќе нанесе на природата околу селото.
Според него ангажирани се сите ресурси, меѓу нив и полицискиот хеликоптер и чешкиот „Блек Хок“ како и противпожарни служби на општината и месното население.
Инаку на територијата на државата до 18 часот попладнево има вкупно 24 пожари на отворен простор, од кои шест се активни, два се под контрола а 16 се изгаснати, соопшти ЦУК.
Активни се шест пожари:
1. Општина Василево, Радовиш и Берово – с. Нивичино, планина Голем Готен и Малешевските планини (нискостеблеста шума, смрека, грмушки и ниска вегетација);
2. Општина Прилеп – с. Бешиште, место викано Бешишки Рид (под контрола), друг крак кон с. Градешница (Опш. Новаци) и трет крак кон границата со Р. Грција (мешана шума, не се интервенира поради детонации);
3. Општина Прилеп и Кавадарци – помеѓу селата Царевиќ, Смолани, Радобил и Дрен (Опш. Прилеп) и Галиште и Трстеник (Опш. Кавадарци) (мешана шума и ниска вегетација);
4. Општина Крушево – Градска депонија кај м.в. Струнга (ѓубре, сува трева и нискостеблеста шума);
5. Општина Струга – делницата Струга – Калишта (трска и ниска вегетација);
6. Општина Штип – с. Чардаклија – с. Караорман (ниска вегетација);
Под контрола се два:
1. Општина Карбинци – с. Јунузлија (шума);
2. Општина Делчево – Градска депонија Острец (ѓубре);
Изгаснати се 16 пожари:
1. Општина Штип – помеѓу селата Драгоево и Селце (нискостеблеста шума, прнар и ниска вегетација);
2. Македонски Брод 1 – с. Грешница (мешана шума и ниска вегетација);
3. Македонски Брод 2 – помеѓу с. Црешево, Локвица и Крапа (деградирана дабова шума, грмушки и ниска вегетација);
4. Македонска Каменица – с. Ќосевица (борова шума);
5. Општина Прилеп – ул. Јоска Јорданоски (ниска вегетација);
6. Општина Струмица – с. Просениково (трска);
7. Општина Гевгелија – с. Миравци (грмушки и ниска вегетација);
8. Општина Радовиш – кај базенот во Радовиш (грмушки и ниска вегетација);
9. Општина Валандово – с. Јосифово (грмушки и ниска вегетација);
10. Општина Чашка – с. Оморани (грмушки и ниска вегетација);
11. Општина Росоман – с. Трстеник (напуштени лозови и овошни насади);
12. Општина Делчево – с. Звегор (ниска вегетација);
13. Куманово 1 – с. Градиште (ниска шума и ниска вегетација);
14. Куманово 2 – населба Баново трло (ѓубре);
15. Куманово 3 – населба Баново трло кај Туш маркет (ѓубре);
16. Општина Боговиње – кај Рио Компани (ниска вегетација).
Македонија
Сиљановска-Давкова-Бирн: изразена надеж дека Ирска ќе продолжи да се залага за кредибилен процес на пристапување кон ЕУ

Претседателката Гордана Сиљановска-Давкова денеска го прими Томас Бирн, државен министер за европски прашања и одбрана на Ирска.
На средбата беа разменети мислења за севкупните билатерални односи, како и за процесот на пристапување кон Европската Унија.
Претседателката оцени дека политичките односи се пријателски и без отворени прашања, но со скромна динамика и посочи на потребата од интензивирање на контактите на највисоко политичко ниво. Таа ја истакна потребата за поголема економска соработка и трговска размена меѓу двете држави.
Сиљановска-Давкова се заблагодари за принципиелната и континуирана поддршка од Ирска за нашите аспирации за членство во Европската Унија. Потсети дека и по 21 година од формалната апликација за членство за време на ирското претседателство во 2004 година, процесот е заглавен во лавиринт од двојни стандарди.
Барајќи фер шанса за земјата, таа изрази надеж дека Ирска, за време на нејзиното претседателство во втората половина на 2026 година, како поддржувач на политиката на проширување ќе продолжи да се залага за кредибилен процес на пристапување, базиран на заслуги.
Таа уште еднаш укажа на опасноста по процесот на проширување, од неговата билатерализација и оптовареност со идентитетски и историски прашања.