Македонија
Обновена сцената на Античкиот театар за „Охридско лето“

Националната установа Заводот за заштита на спомениците на културата и Музеј – Охрид во соработка со Националната установа „Охридско лето“ ја реконструира сцената на Античкиот театар. Станува збор сцена со површина од 270 метри квадратни која поради дотраеност беше во исклучително лоша состојба. Градежните зафати ги извршија екипи на јавното локално претпријатие „Градски гробишта “ и технички лица вработени во Завод и Музеј – Охрид, кои неуморно работеа во текот на изминатите осум дена.
Директорот на претпријатието „Градски гробишта“, Ванчо Костоски, вели дека сцената е комплетно реконструирана и сите настани што се закажани на Античкиот театар можат да почнат непречено.
„Како и во текот на изминатите години, нашето претпријатие помага во активностите на фестивалот ‘Охридско лето’ и Заводот за заштита на спомениците на културата и Музеј – Охрид. На сцената на Античкиот театар комплетно го заменивме дрвениот под со ново и квалитетно дрво, поставивме соодветна изолација, а во најгорниот слој е ставена водоотпорна иверка“, појаснува Костоски.
В.д. директорката на Заводот за заштита на спомениците на културата и Музеј – Охрид, Елеонора Новаковска, потсетува дека претходно оваа национална установа ги префарба платформите и пристапните скали до платформите на Античкиот театар, кои беа целосно реконструирани пред почетокот на минатогодишната сезона .
„Целосната обнова на сцената на Античкиот театар се одвиваше во соработка помеѓу двете национални установи, Завод за заштита на спомениците на културата и Музеј и Охридско лето”, вели Новаковска.
Според неа, за ваквите зафати врз културно-историските добра е особено важна соработката, не само помеѓу институциите од областа на културата туку и со локалната самоуправа, која, како што вели, излегува во пресрет преку ангажирање на јавните локални претпријатија.
„На тој начин се придонесува не само за афирмација и промоција на нашето културно наследство, туку и за јакнење на јавната свест за неговите вредности и значење. Ваквиот начин на работа и воспоставување соработка е многу е важен и за одржливиот развој. Ние како институција инвестираме, но со издавање на објектите, парите се враќаат назад и повторно ги користиме за одржување на објектите и локалитетите што се под наша надлежност. Така, сите интервенции околу сцената, платформите и скалилата на Античкиот театар ги правиме со средства од сопствената сметка, поточно од сметката на нашата институција“, додава Новаковска.
Новата сцена на Античкиот театар, како што објаснува директорката на „Охридско лето“, Наташа Поповиќ, ќе биде од исклучително значење за уметниците коишто настапуваат на овој археолошки локалитет, особено за отворањето на оваа најголема музичко-сценска манифестација во Македонија кое по традиција секоја година на 12 јули се одвива токму на Античкиот театар.
„Реконструкцијата на сцената на Античкиот театар значи многу за нас, како национална установа која ги носи најзвучните светски имиња од светот на музиката и театарот. Ние, заедно со мегапопуларната британска виолинистка Ванеса Меј, ја имаме честа први да застанеме на обновената сцена на овој наш најголем археолошки локалитет. Ванеса Меј на 12 јули на Античкиот театар ќе го отвори 59-тото издание на фестивалот ‘Охридско лето’“ , вели директорката на НУ „Охридско лето“, Наташа Поповиќ.
Педесет и деветтото издание на фестивалот „Охридско лето“ свечено ќе биде отворено в петок на Античкиот театар со почеток во 21 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.