Македонија
Објавен јавниот повик за распределба на 62 стана во социјалната зграда во Неготино
Министерството за транспорт и врски денеска го објави јавниот оглас за распределба на 62 стана во социјалната зграда во Неготино.
Јавниот повик трае 30 дена и на него може да аплицираат шест категории граѓани во согласност со одлуката за распределба на социјални станови, и тоа:
– деца без родители, кои до својата 18-та година биле згрижени во институции за деца без родители,
– корисници на право на гарантирана минимална помош,
– лица погодени од елементарни – природни непогоди,
– лица со попреченост и семејства со лица со попреченост,
– лица припадници на ромската заедница – социјално загрозени во согласност со стратегијата за Ромите
– самохрани родители со малолетни деца.
Барање за добивање социјален стан за користење под закуп може да поднесе лице државјанин на Република Северна Македонија, да е со постојано место на живеење во општината каде што е изграден социјалниот стан и лицето да не поседува стан во лична сопственост, на брачниот другар и на полнолетните членови на неговото заедничко домаќинство на територијата на Република Северна Македонија.
Социјалните станови ќе се распределуваат во согласност со методологијата за бодирање кандидати за добивање социјален стан под закуп составен дел на одлуката за распределба на социјални станови, како и условите за нивно користење изградени по Програмата за изградба, продажба и одржување на станбениот простор во сопственост на Република Северна Македонија.
Сите заинтересирани лица ќе може да аплицираат во Центарот за социјални работи во Неготино, а условите и критериумите може да се најдат на веб-страницата на Министерството за транспорт и врски, како и во Центарот за социјални работи во Неготино.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Илинден и Ѓорче Петров денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 09:00 до 13:00 часот, улица Бунарџик. (Општина Илинден)
– во периот од 09-00 до 15-00 часот, дел од корисниците на улиците: Мице Козар и Ѓуро Салај. (Општина Ѓорче Петров)
Македонија
Сончево и релативно топло со мала до умерена облачност
Сончево и релативно топло со мала до умерена облачност. Во утринските часови наместа ќе има зголемена облачност која во текот на денот ќе се намали. Ќе дува слаб ветер од северен правец. Минималната температура ќе биде во интервал од -2 до 3, а максималната ќе достигне од 12 до 17 степени.
Во Скопје, претпладне во делови од котлината ќе има услови за појава на слаба магла. Во текот на денот времето ќе биде сончево со мала до умерена облачност и претежно тивко. Минималната температура ќе се спушти до 1, а максималната ќе достигне до 14 степени.
Времето во наредниот период
Продолжува период на стабилно и релативно топло време. Во текот на ноќите и во утринските часови ќе има појава на магла на одредени места и зголемена облачност која во текот на денот ќе се намалува.
Македонија
Сообраќајот на граничниот премин Евзони (ГП Богородица) се одвива нормално
Сообраќајот на ГП Евзони (ГП Богородица) се одвива нормално, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

