Македонија
Ова лето ЕУ со јасен план да го приближи регионот кон членство, порача Маричиќ

Заменик претседателот на Владата задолжен за европски прашања Бојан Маричиќ денеска на Преспа форум дијалог имаше воведно излагање на сесијата со наслов: „Проширувањето на ЕУ во променливата геополитичка динамика“, на која рече дека мора да го обновиме ветувањето од Самитот во Солун и ова лето со јасен план ЕУ да го приближи регионот кон членство.
„Потребна е јасна визија кон Западен Балкан и потребна ни е поблиску Европската Унија. Нема време процесот на проширување да се одолговлекува, со проактивен и поефективен пристап и од ЕУ и од наша страна треба да дадеме шанса ветената перспектива да ја исполниме заеднички“, посочи вицепремиерот.
Тој додаде дека геополитичките околности отсекогаш влијаеле на динамиката на проширувањето на ЕУ и затоа руската агресија врз Украина го врати фокусот на Западот кон Западен Балкан, што Маричиќ го гледа како вистинска шанса што треба да се искористи мудро од земјите во регионот.
Соговорник на панел сесијата беше и ирскиот министер за Европа, Питер Бурк, кој кажа дека ЕУ е повеќе од заеднички пазар и дека претставува заеднички вредности и обединетост во различностите, посочуваји дека е силен поддржувач на проширувањето бидејќи членството во ЕУ донесе многу предности во ирското општество и дека тоа вреди.
Учеснички на панелот беа и министерката за евроинтеграции на Србија, Тања Мишчевиќ и главната преговарачка со ЕУ на Република Албанија, Мајлинда Дука, кои посочија дека е потребна забрзана интеграција во приоритетните области за да има опиплив напредок, за што како што рече Мишчевиќ потребно е да се премине од пријателски кон сојузнички однос помеѓу Западен Балкан и ЕУ.
„Домашните реформи во клучни области како правосудството придонесува за инвестирање во кредибилноста на процесот – мотивот за спроведување на тешки и болни реформите треба да е подобрување на животниот стандард на граѓаните, а не признанија“, смета Дука.
Симонида Кацарска, директорката на Институтот за европска политика рече дека „во последните десет години нема проширување во ЕУ, па се чини како домашниот капацитет и ангажманот од ЕУ е изгубен.
Анжеј Франгеш пак беше јасен дека е потребна позитивна условеност и јасна рамка за проширување, сè со цел овозможување на покредибилно и побрзо проширување на ЕУ.
„Национална кохезија и стратешки компас насочен кон ЕУ е прав начин за пристапување во Унијата. Словенија ќе продолжи да го поддржува регионот и да ги потенција достигнувањата на земјите од Западен Балкан кај европските партнери“, додаде словеничкиот дипломат, Франгеш.
На сесијата учествуваа и Мартин Дворак, Хелене Холм-Петерсен и Деа Елмаслари, под модераторство на Програмската директорка на Центарот за европска политика (CEP), Милена Лазаревиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Николоски во Атина: во фокусот економската соработка меѓу двете земји и подобро регионално поврзување

Заменик претседателот на Владата и министер за транспорт Александар Николоски од денеска е во дводневна работна посета на Атина, каде ќе оствари работни средби со високи претставници на Владата на Грција.
Во рамки на посетата, планирана е средба со вицепремиерот Костис Катзидакис, министерот за инфраструктура и транспорт Христос Димас, како и со алтернативниот министер за инфраструктура и член на Парламентот, Константинос Киранакис.
Исто така предвидена е средба и со менаџментот на пристаништето Пиреа.
На средбите предвидено е да се разговара за економската соработка меѓу двете земји, како и за подобро регионално поврзување.
Ќе се разговара и за изградбата на брзата пруга на коридорот 10, што многу ќе приоднесе за развој на трговијата и размената меѓу двете држави, а ќе преставува и главен крвоток за поврзување на грчките пристаништа со Централна Европа.
Во рамки на средбите планирано е да се отворат теми за унапредување на сообраќајот на Коридор 10 и 10 -д, зголемување на ефикасноста во патниот и железничкиот транспорт, за промовирање на ависообраќајот, како и унапредување на регионалната соработка.
Македонија
Доаѓаат тешки моменти за корумпираните судии, обвинители, политичари и бандити, најави ВМРО-ДПМНЕ

Со судството и обвинителството во Македонија, како што велат од владејачката ВМРО-ДПМНЕ, раководи кланот Заеви и кланот Ахмети.
Тие, според партијата на Мицкоски, се директните виновници кои држат судии и обвинители затоа што се уплашени поради криминалот кој го имаат направено.
„Затоа секој случај кој ќе почне завршува со неуспех.
Затоа секоја пријава на МВР или докази или допрен глас и укажување од Владата или јавноста за криминал на луѓе од СДС и ДУИ завршуваат без епилог, во нечија фиока или затворени се како случаи.
Но, имаме една порака. Ако до Нова година не се смени ова и нема чекори за борба против корупцијата за еклатантни примери на криминал на разни политичко мафијашки групации во земјава, ние ќе објавиме и тргнеме во одлучна акција и чекори кои тоа ќе го променат од корен.
Укажувавме, повикувавме, апелиравме, молевме, но безуспешно“.
Народот, според ВМРО-ДПМНЕ, е разочаран.
Апатијата, како што оценуваат се зголемува.
„Довербата во правна држава ја нема. Надежта се губи.
Нема да го дозволиме тоа. Ќе биде или тие или Македонија. Или тие сите криминалците без разлика на политичка и етничка припадност на една страна, или ние со народот на другата.
Доаѓаат тешки моменти за корумпираните судии, обвинители, и политичари и бандити“.
Македонија
Поради нерегуларности, привремено запира со работа приватниот Факултет за бизнис економија во Скопје , одлучи МОН

Поради констатирани нерегуларности во работењето и непостапување по задолжение за отстранување на истите, Министерството за образование и наука информира дека е донесена одлука за привремено запирање на работата на приватната висока стручна школа – Факултет за бизнис економија во Скопје.
Нерегуларностите се констатирани од страна на посебна комисија во рамки на МОН за вршење надзор над законитоста во работењето, а одлуката за времено запирање на работата на оваа приватна високообразовна установа е донесена и врз основа на мислење од страна на Одборот за акредитација на високото образование.
На Факултетот за бизнис економија, појаснуваат од МОН, нема запишани нови студенти во академската 2025-2026 година. Кон веќе запишаните студенти, високообразовната установа ќе ги исполни обврските предвидени во Законот за високо образование со цел овозможување непречена понатамошна едукација, односно префрлање на други факултети.
„Почитувањето на законските прописи мора да биде основен принцип во работењето на сите образовни установи. Тоа е единствениот начин да се обезбеди одржлив квалитет кон корисниците на образовните услуги.
Во изминатите 15 месеци затворени се и 14 приватни научни институти, од кои дел поради неактивност, а дел поради неисполнување на условите за работа. МОН и во иднина неселективно ќе продолжи да ја контролира работата на образовните и научните установи и да презема соодветни мерки онаму каде ќе бидат констатирани отстапувања од правните норми“.