Градоначалничката на општина Битола, Наташа Петровска, делегација од Советот на Општина Битола, претставници на Општинската организација на Сојузот на борците од Битола и претставници на Здружението на лицата што потекнуваат од Егејска Македонија, ја одбележаа 75-годишнината од формирањето на Првата народноослободителна ударна бригада од Егејска Македонија.

По тој повод, пред спомен-плочата кај Противпожарната единица положија свежо цвеќе.

„Живееме како Македонци во сопствена држава благодарение на сите влогови на нашите предци. Токму тука припаѓаат и оние што учествувале во оваа бригада и затоа сме овде, ја одбележуваме 75-годишнината од нејзиното формирање. Во оваа пригода сакам да им укажам слава и голема благодарност затоа што ние денес се наоѓаме овде благодарение на нив“, рече Наташа Петровска, градоначалник на општина Битола.

Пред присутните и новинарите се обрати и претседателот на Општинската организација на Сојузот на борците, Александар Трајковски, говорејќи за формирањето на Бригадата и нејзините активности во регионот во 1944 година, како и активностите во Западна Македонија во 1945 година. На 2 април 1945 година Бригадата била расформирана, а нејзиниот боречки состав распореден во други единици. Нешто подоцна повеќето од борците на Бригадата се вратиле во егејскиот дел на Македонија и ги создале првите одреди на Народноослободителниот фронт (НОФ), а подоцна станале борци во единиците на Демократската армија на Грција, каде што повторно покажале огромна пожртвуваност во борбата за националните и социјалните права и слободи.

Спомен-плочата на чешмата е поставена во 1984 година.