Во пресрет на одбележувањето на Меѓународниот ден на борбата против аутизмот, 2 Април, Националната галерија на Северна Македонија вложува напори во подигање на јавната свест за оваа ранлива категорија деца.

„Тенденцијата на пораст на аутизамот е факт и токму поради тоа, потребни се поголем ангажман, подобар пристап и координација на сите засегнати страни во битката за справување со нарушувањето на психофизичкиот развој кај најмладата популација“, велат од таму.

Како институција од културата, во рамките на својата годишна програма Националната галерија традиционално спроведува проекти наменети токму за оваа категорија деца.

Годинешниот проект е со наслов: „Пссст… Каменот има нешто да ви каже“. Во рамките на проектот беа реализирани работилници во текот на февруари 2020 година во Чифте амам пред да се појави епидемијата на коронавирусот. Тие беа водени под менторство на едукаторот Маја Димитрова. Во работилниците учествуваа учениците од ДСУРО „Св. Наум Охридски“, ПОУ „Иднина“ и здруженијата за деца со посебни потреби „Имаго плус“ и „Дама ел“.

„Досега секоја година креациите од работилниците ги претставувавме на изложба, со која воедно официјално го одбележувавме 2 Април. Оваа година, поради настанатата ситуација кај нас и во светот, изложбата ќе биде прикажана виртуелно, во електронска форма на нашата фејсбук-страница. Ваквите проекти испраќаат порака за повеќе грижа и повисоко ниво на општествена свесност, обезбедување услови за секојдневно функционирање на децата со интелектуална попреченост и нивна културолошко-социјална инклузија, поддржана, пред сè, на институционално ниво“, рече директорката на Националната галерија, д-р Дита Старова-Ќерими.