Македонија
Одбиени плаќања, банкоматите не се во функција – плаќањата со картички не поминуваат оти некои од банките имаат проблем

Не може да се подигнува готовина од банкомат, ниту да се плаќа со картички – со ваков проблем се соочуваат многумина граѓани, кои се обидуваат денеска да направат трансакција. Плаќањето е одбиено, банкоматите не се во функција. Проблемот го имаат повеќе банки, меѓу кои и НЛБ Тутунска банка. Тие посочуваат дека имаат технички проблеми.
„Макфакс“ побара информации од МВР дали кај нив е пријавен упад во некој банкарски систем, како што се зборува во јавноста, но тие велат дека таква пријава немаат добиено.
„Ве известуваме дека нашата ATM-мрежа моментно се соочува со технички проблем и како резултат на ова, подигнувањето готовина од банкоматите на НЛБ банка е привремено оневозможено. Нашите тимови работат на решавање на проблемот. Доколку имате итна потреба од подигнување готовина од вашата трансакциска сметка, ви препорачуваме да ја посетите најблиската експозитура на банката. Подигнувањето на средствата ќе ви биде овозможено без надоместок. Искрено се извинуваме за непријатностите и го цениме вашето трпение и разбирање“, велат од НЛБ Тутунска банка.
Од таму нема информација зошто со платежните картички не може да се плаќа во продажни објекти.
Од МВР за „Макфакс“ велат дека пријава за упад во банкарски систем немаат.
„Почитувани, до сега нема таква пријава до МВР“, велат од таму за „Макфакс“.
Сервисите на дел од банките поврзани со картичките не се во функција веќе неколку часа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Се укинуваат визите за Обединетите Арапски Емирати

Последната посета на Обединетите Арапски Емирати го донесе првиот конкретен резултат. На наше барање, тие ги укинуваат визите кои беа потребни за патување кон оваа земја, објави премиерот Христијан Мицкоски на социјалните мрежи.
Наскоро, како што појаснува, со конкретната примена на одлуката за без визното патување ќе се влијае на посилна економија, слободно патување, зајакнување на меѓусебното партнерство.
„Се бориме на секој можен начин да се помогне на нашите граѓани, и со секој ден да се носат промени за заедничката иднина“, пишува Мицкоски.
Македонија
Судот и’ го одзеде пасошот на претседателката на антикорупциската комисија која споделувала службени тајни на „Вибер“

На претседателката на антикорупциската комисија, Татјана Димитровска, одземен и’ e пасошот, откако Кривичниот суд го прифати предлогот за определување на мерки за претпазливост, како осомничена во дополнетата истрага за предметот „Адитив“.
Таа се сомничи дека преку апликациите за пораки „Вибер“ и „Ватс ап“ му оддавала службени тајни на друг обвинет за поведени постапки, за отворање предмети и одлуки против сега обвинетите фирми и лица во предметот „Адитив“, како и податоци за проверка на имот и неговото семејство.
Судот определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, воедно не може да гласа и да распределува предмети.
За првоосоничениот Б.Н. кој се товари за злосторничко здружување, злоупотреба на постапка за јавни набавки и перење пари, определена е мерка притвор во траење од 30 дена, соопшти Кривичниот суд.
И за осомничената Б.П.М., определени се мерки за претпазливост, односно привремено одземање на патната исправа и забрана за издавање нова и забрана за преземање одредени работни активности поврзани со кривичното дело.
Против овие решенија странките имаат право на жалба.
Македонија
Девет лица завршија во притвор поради злоупотреби со инвалидските пензии и туѓа нега

На деветмина осомничени од уапсените 23 во акцијата за туѓата нега, судот им одреди мерка притвор од 30 дена.
Едно лице сè уште е недостапно за органите на прогонот.
Притворот за деветмината осомниченни е определен поради опасност од бегство, попречување на истрагата со влијание врз сведоци и опасност од повторување на делото, информираа од Кривичниот суд.
Петмина завршија во куќен притвор, додека за девет лица, судот определи мерки на претпазливост, односно обврс да се јавуваат во судот и привремено одземање на патната исправа и забрана за издавање нова.
Во истрагата на Обвинителството се опфатени вкупно 49 лица. Се работи за две криминални групи чии членови разработиле шема преку која на лица баратели на социјални услуги им овозможувале да добијат право на туѓа нега и инвалидска пензија. Меѓу осомничените има и лекари специјалисти кои биле претседатели Стручната комисија за издавање наод, оцена и мислење за потребата од помош и нега од друго лице.