Заменик-министерот за одбрана, Беким Максути, престојува во посета на Чешка, каде што се сретна со чешкиот колега Јакуб Ландовски и ја предводи македонската делегација која учествуваше на Future Forces Forum, во чии рамки кусо разговара и со чешкиот министер за одбрана, Лубомир Метнар.

Како што информираат од Министерството за одбрана, на средбата двајцата заменици разговарале за безбедносните и одбранбените прашања во регионот и во Европа, како и за актуелната политичка состојба во Македонија, при што Максути информирал за актуелните настани поврзани со интеграцијата на Македонија во НАТО и ЕУ и ги истакнал чекорите и напредокот, кои, како што нагласил, Македонија ги направи во однос на реформите во одбраната, а во поглед на идното членство во НАТО.

Заменикот-министерот информирал и за процесот на опремување и модернизација на АРМ, за зголемувањето на буџетот за одбрана и за идните планови на Министерството за одбрана и Генералштабот на Армијата на Република Македонија.

Двајцата заменици истакнале дека соработката меѓу двете земји е на високо ниво и посочиле дека таа може да се продлабочи. Во однос на интеграцијата на Македонија кон ЕУ и НАТО, Ландовски истакнал дека Чешката Република и во иднина ќе продолжи со поддршката за нашата земја.

Заменикот-министер Максути за време на форумот остварил и средби со претставници на повеќе компании од одбранбениот сектор.