Правилен е ставот на Бугарија за одвојување на Северна Македонија и Албанија бидејќи така ќе се види дека и Тирана има проблеми, а Софија не е основната пречка за двете земји, вели бугарскиот дипломат и експерт по меѓународни односи, Милен Керемедчиев,, пренесе „Дојче веле“.

Керемедчиев во интервју за „Радио фокус“ вели дека колку побргу се формира владата и Бугарија добие навистина репрезентативен министер за надворешни работи, се надева дека толку побргу ќе се вратат на преговарачката маса со силни позиции и со јасна перспектива.

„Сметам дека е правилен последниот став на Бугарија за разделување на Албанија и Република Северна Македонија бидејќи така ќе се види дека и Албанија, всушност, има проблеми за почнување на преговорите за членство, кои произлегуваат од други западноевропски држави, како Холандија и Франција, кои имаат стравови од брз прием на Албанија во ЕУ. Така повеќе ќе се види и дека Бугарија не е основната сопка и пречка за членство на двете држави во ЕУ“, вели Керемедчиев.

Тој смета дека двете земји се разликуваат во својата подготвеност и дека е логично да бидат одвоени во процесот, но не верува дека тоа ќе се случи бидејќи политиката на ЕУ е да ги поврзува кандидатите и да бидат примени заедно. Потсетува дека таков бил случајот и со Бугарија и Романија, иако двете земји меѓусебно постојано се обвинувале дека едната ја кочи другата.