Ечат свирчиња и песната „Бела, чао“ пред Кривичниот суд во Скопје, каде што и денес е излезена судската администрација откако министерот за финансии, Фатмир Бесими, вчера не им го потпиша одобреното покачување од 15 % за додатоци на плата. Со централен транспарент „Европски плати за вас и за нас“ судската администрација бара да им се вратат додатоците на плата укинати со истиот член, кој им овозможи зголемување на платите на избраните и именуваните лица од 78 %, бараат нов закон за независен судски буџет и нов закон за судска служба.

Од 1 септември најавија генерален штрајк.

„Денес, штрајкуваме во сите судови, Основен Битола, Струга, Охрид, Штип, Свети Николе, Тетово… Најавуваме генерален штрајк од 1 септември. Ќе блокираме и улици и нема да може од наши средства да се полни буџетот. Нема да се вадат ни уверенија за неосудуваност ни за трето дете, да видиме каде одат овие пари“, рече Јасмина Величкова, претседателка на Независниот синдикат на судската администрација.

Таа вели дека судската администрација нема претстава зошто министерот не ја потпишал одлуката на Судскиот буџетски совет за исплата на додатоци на плата од 15 %, а на денешниот протест судските административци рекоа и дека се против усвоеното покачување на платите од 10 %.

„Ние не се согласуваме со покачување на плата од 10 %, што Владата и Сојузот на синдикатите го договорија. Исто така, не се согласуваме ни со К15 во висина од десет илјади денари, а многу револтирачки е што од нашите средства доделени од Судскиот совет, 15 % на плата, вчера министерот за финансии ги одби“, рече претседателката Величкова.

Таа на денешниот протест во детали реферира колку средства се слеале во буџетот врз основа на она што судовите го наплатиле за да покаже дека средства за 15 % за додатоци на плата – има.

„Реформите во судската власт треба да почнат од судската служба“, Рената Георгиевска, потпретседателка Здружението на судската администрација

Рената Георгиевска, потпретседателка на Здружението на судската администрација, побара менување на законите на начин што ќе одговара на должностите, правата и одговорностите што ги има судската администрација.

„Судската служба се собра и излезе на протест за да го искаже револтот за пониски плати, немаме додатоци и бараме самостојна судска власт. Апелираме и бараме поддршка од Судскиот совет, Судско-буџетскиот совет и од Здружението на судиите да издејствуваат донесување нов закон за судски буџет, со кој судската власт ќе има самостоен буџет, и донесување нов закон за судска служба, со кој статусот на судската служба ќе биде регулиран на начин што одговара на нејзината работа, должности, права и одговорности. Реформите во судската власт треба да почнат од судската служба“, рече Георгиевска.

Претседателката на Независниот синдикат на судската администрација нагласи дека со покачувањето на платите на функционерите, што ги опфати и судиите, се појавиле досега невидени разлики во платите кај вработените во судовите.

„Од наши средства се двои за буџетот, а на крајот се доведовме до ситуација избраните и именуваните лица да добијат покачување на плата од 78 %, а нам вработените во судската служба да ни се скратат додатоците. Има енормна разлика во платите. Службеник со судија соодносот е 1:5 и судија со стручен соработник 1:3 како никогаш досега и никаде во развиениот свет“, рече претседателката Величкова.

Вработените во судската администрација во мај годинава останаа без додатоци на плата оти беше укинат истиот член од законот со кој избраните и именуваните лица добија покачување од 78 % на платите.