Македонија
Речиси 1.000 лица под закана да ја доживеат судбината на Мемет, живеат без здравствена заштита

Мемет Камбер, кој почина на 19 години, за жал, не е прва жртва на системот. Освен него, има и други примери на лица што го загубиле својот живот или се соочиле со сериозни тешкотии во процесот на добивање здравствена заштита, велат од Институт за истражување и анализа на политики „Ромалитико“.
Според нивните податоци, во моментот има приближно 1.000 лица без документи, кои се под закана да ја доживеат истата судбина како Мемет.
Мемет не можел да пријави адреса оти живеел во дивоградба
Од Институтот рекоа дека Мемет како сиромашно лице немал лична карта затоа што не можел да пријави адреса бидејќи живеел во дом кој е дивоградба. Што значи ова и какви проблеми произлегуваат од оваа состојба?
Најпрвин, ромските населби се соочуваат со проблемот на влез на населбите во урбанистичките планови. За да може еден дом да се легализира, потребно е населбата да е дел од ДУП и/или ГУП. Предлог-законот за легализација на бесправно изградени објекти не успеа да ја реализира својата цел и да обезбеди легализација на овие домови.
„Проблемот со легализација, покрај тоа што им го оневозможува уживањето на основни човекови права, дополнително ја доведува ромската заедница во состојба во која не може да го докажат правото на сопственост врз земјиште и оваа состојба се пресликува на идните генерации со можност/закана за нивно иселување, но исто така им создава тешкотии во пристапот до комунални услуги (вода и електрична енергија). Поради овие проблеми, потребно е итно да се изготви и изгласа законско решение, кое ќе им овозможи основни услови за живеење за оваа категорија граѓани“, велат од „Ромалитико“.
Од тука порачуваат дека конкретно за лица што немаат документи решение може да биде и алтернативна можност за пријава на адреса во Центарот за социјални работи или општината. Здружението апелира дека е време да се извршат промени во Законот за личната карта и во Законот за пријавување живеалиште и престојувалиште и да им се даде можност на лицата што немаат свој дом да може да извадат лична карта.
Проблем има и со лицата што не може да си ја обноват личната карта
Од „Ромалитико“ велат дека, покрај лицата без документи, поради проблемите со урбанизација и легализација, моментно има и лица што не може да си ја обноват личната карта и за кои исто така треба да постои решение.
Остварувањето на здравствената заштита е човеково право, а неможноста за пристап до здравствена заштита е прекршување на човеково право, велат тие.
Апелираат на итно формирање работна група во Владата, која ќе работи на решенија и итно усвојување на потребните измени за пристап до лична карта и други документи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Над 60 илјади лица пријавeни за вакцинација против сезонски грип-превентивни тимови ќе вакцинираат и во домашни услови за повозрасни и неподвижни лица и инвалиди

Министерството за здравство информира дека за вакцинација против сезонски грип се пријавени околу 60 илјади граѓани, а досега се вакцинирани над 8 илјади лица.
„Вакцинацијата се спроведува на вкупно 35 вакцинални пункта низ државата, од кои пет се во Скопје. Сите заинтересирани граѓани можат да се пријават преку апликацијата vakcinacija.mk или преку матичниот лекар.
Со бесплатната вакцинација се опфатени ризичните категории население, како што се: повозрасни лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лицата сместени во установи за социјална заштита на стари лица и вработените во овие установи“.
Во организација на Министерството, превентивни тимови од здравствени установи низ државата започнаа со вакцинација против сезонски грип и во домашни услови, на повозрасни и неподвижни лица, како и лица со попреченост, соопштија од таму.
Македонија
Минчев: Јавната администрација мора да биде место каде што луѓето растат, придонесуваат и се чувствуваат добро

Министерот за јавна администрација, Горан Минчев, денеска се обрати на отворањето на националната програма за сертификација „Quintaum МАЦЕКС 2025/2026“, организирана од Македонската асоцијација за искуство на клиенти и вработени – МАЦЕКС, во партнерство со Вита Институт и глобалната методологија Quintaum.
Настанот ги обедини претставниците на јавниот и приватниот сектор, академската заедница и граѓанското општество, а присуствуваше и амбасадорот на Република Словенија, Грегор Прескер.
Минчев нагласи дека Министерството за јавна администрација ќе биде првата институција од јавниот сектор која се приклучува на оваа програма, како јасен сигнал дека промените во администрацијата започнуваат одвнатре, преку слушање на гласот на вработените и мерење на нивното вистинско искуство.
„Горди сме што токму Министерството за јавна администрација ќе биде првата институција која се приклучува на програмата „Quintaum МАЦЕКС“.
Со тоа покажуваме дека реформите не се само законски измени, туку и нов начин на размислување – администрација што ги слуша своите луѓе, ги вреднува нивните искуства и гради култура на припадност и мотивација,“ изјави министерот.
Тој се осврна и на соработката со Република Словенија, истакнувајќи дека токму ова партнерство претставува силен поттик за развој на современи политики во управувањето со човечки ресурси и организациска култура.
„Со Словенија воспоставивме вистинско партнерство – преку Меморандумот за соработка меѓу двете министерства, а дополнително со учеството на Амбасадата на Република Словенија во програмата, отвораме ново поглавје на размена на знаења, искуства и добри практики.
Тоа е најдобриот доказ дека оваа иницијатива има европска димензија и кредибилитет“, нагласи тој.
Програмата „Quintaum МАЦЕКС 2025/2026“ претставува иновативен пристап за мерење и подобрување на искуството на вработените во јавниот и приватниот сектор, со цел создавање на повеќе мотивирана, посилна и човечка администрација.
Во своето обраќање, Минчев порача дека јавната администрација не е изолирана структура, туку жива организација што се развива со луѓето и за луѓето.
„Нашата цел е да изградиме јавен сектор што инспирира, а не само функционира. Сектор што е силен, човечки и достоен за довербата на граѓаните“, додаде Минчев.
Министерството за јавна администрација останува двигател на реформите во јавниот сектор, насочени кон градење современа, мотивирана и европска администрација која работи за доброто на граѓаните, додаваат од таму.
Македонија
УЈП со повик: Поднесете ги ДДВ-04 пријавите и платете го даночниот долг

Управата за јавни приходи упатува повик до сите даночни обврзници: поднесете ги ДДВ-04 пријавите и платете го даночниот долг за изминатиот даночен период навреме и одговорно.
„Поради скратената работна недела, даночните обврзници располагаат со пократок рок за навремена подготовка и поднесување на даночните пријави и плаќање на даночниот долг. Законскиот рок за поднесување и плаќање на ДДВ-04 пријавите е 25 октомври (сабота), а бидејќи е неработен ден, тој се поместува за првиот нареден работен ден – понеделник, 27 октомври 2025 година. Во овој период се поднесуваат месечни и тримесечни ДДВ-04 пријави, па во таа насока апелираме до даночните обврзници обврските да се исполнат навремено и да не го чекаат последниот ден од законски утврдениот рок со цел да се избегне преоптоварување на системот и можни технички пречки во последен момент“, велат од УЈП.
Од таму напоменуваат дека поднесувањето на пријавата, без истовремено плаќање на долгот, не ги исполнува законските обврски.
„Само со целосно точно и навремено поднесување на пријавата и плаќање на обврските се избегнуваат дополнителни камати, санкции и непотребен стрес. Навременото исполнување на даночните обврски не само што придонесува за финансиска стабилност на деловните субјекти туку и за правилно усогласување со даночните прописи, што е од клучно значење за стабилноста и ефикасноста на даночниот систем. Дејствувајте одговорно и исполнете ги обврските навреме за да придонесете кон стабилна и функционална даночна практика“, велат од УЈП.