Македонија
ОМД бара Ескобар да се залага за правата на Македонците во Бугарија

Обединетата македонска дијаспора (ОМД), водечката организација на Македонците надвор од Македонија, испрати писмо до американскиот заменик-помошник државен секретар на САД, Габриел Ескобар, и побара тој да се залага за правата на македонците во Бугарија и да ја посети Софија веднаш по посетата во Скопје.
„Повторните еднострани притисоци и уцени кон Македонија не создаваат клима за добрососедски односи во регионот.
За потсетување, Бугарија има 14 пресуди од Европскиот суд за човекови права за дискриминација на македонското малцинство во Бугарија. Следствено, ОМД бара реципроцитет: доколку САД и ЕУ бараат уставни промени од Македонија, тогаш е сосема логично и Бугарија да го признае македонското малцинство. Хипокритично е да се бара заштита на правата на малцинствата кај членка кандидат, а да се занемаруваат правата на малцинствата во полноправна членка, како што е Бугарија“, се наведува во соопштението на ОМД.
„Бугарија треба Македонците да ги стави во својот Устав.
Исто така, по контроверзната посетата на косовскиот премиер Курти во Македонија, ОМД испрати уште една комуникација до господинот Ескобар и побара да даде изјава дека САД не поддржуваат иредентистички идеи и промена на границите во Балканот.
Во тој допис ОМД ја искористи можноста да го потсети Ескобар дека Македонците не се северномакедонци и дека Македонците не се само православен народ, како што Ескобар не има наречено во интервјуа во минатото. Македонскиот народ е разнолик, со луѓе од разчни вероисповеди, иако мнозинството се православни.
САД е иницијатор и потписник на декларацијата на човекови права на Обединетите нации, која полни 75 години во декември. САД имаат должност да го бранат и правото на самоопределување и човековите права на македонскиот народ, како што тоа веќе го прават многу погласно за некој од другите народи во регионот“, се додава во соопштението на ОМД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Андоновски: Дигиталниот самит ја става Македонија на мапата на дигитално развиени држави

Министерот за дигитална трансформација, Стефан Андоновски во гостување на македонско радио, говореше за Дигиталниот самит кој ќе се одржи во Скопје на 1 и 2 октомври, во Музејот на современа уметност, на кој ќе бидат присутни над 800 учесници од државата, но и од другите земји од регионот и од Европа.
Андоновски истакна дека оваа година самитот е малку реорганизиран, со тоа што ако порано бил само за функционери и членови на владите, сега и граѓаните, бизнис секторот, универзитетите, ќе може да присуствуваат и да ги слушаат говорниците кои се поканети на самитот.
Како главни теми на самитот ќе бидат сајбер-безбедноста и дигиталните услуги, но на самитот ќе се говори и за вештачката интелигенција, најави Андоновски.
„Главен интерес ќе ставиме на сајбер-безбедноста, 3 панели ќе бидат посветени на неа, затоа што имаше голем интерес и од учесниците и од панелистите. Потоа, дигиталните услуги, ќе ја преставиме како што ветив македонската мобилна супер апликација, секако ќе разговараме за дигитален паричник, дигитален идентитет, интероперабилност, нови услуги, поврзување на институциите, иновации, вештачка интелигенција и итн’’, рече министерот за дигитална трансформација.
Во однос на промоција на настанот, Андоновски напомена дека сите панели и свеченото отворање, како и обраќањето на премиерот Христијан Мицкоски и неговото обраќање ќе бидат дигитално пренесувани на социјалните мрежи.
„Сите заинтересирани кои нема да можат да бидат во можност да присуствуваат на настанот, ќе можат истото да го следат на социјалните медиуми, мислам дека ќе биде одличен настан’’, заклучи Андоновски.
Македонија
Во полициската станица во Пробиштип ќе биде поставена биста на Тоше Тодоровски кој загина во дискотеката „Пулс“

Утре, 27.09.2025 година, во 10.00 часот, во кругот на полициската станица во Пробиштип ќе се одржи свечена церемонија на откривање на спомен бистата на Тоше Тодоровски, кој трагично го загуби животот извршувајќи работни задачи во дискотеката ,,Пулс” во Кочани, соопшти Независниот полициски синдикат.
„Во овие тешки моменти во кои навршија 6 месеци од трагедијата и сѐ уште се чуствува длабока тага и болка не е време за поделби, туку е момент кој треба да не обедини сите кои сочуствуваме со фамилиите кои загубија свои блиски, достоинствено да одадеме почит и да побараме правда за сите“, велат од Синдикатот.
Македонија
МВР објави анкета за неговите услуги

Министерството за внатрешни работи објави анкета да го истражи задоволството на граѓаните од користење на услугите на МВР.
„Во насока на подобрување на квалитетот на услугите во Министерството за внатрешни работи Ве известуваме дека е поставен анкетен прашалник преку кој може да го изразите Вашето задоволство од користењето на услугите на Министерството за Внатрешни работи“, велат од МВР.
Анкетата е објавена на следниот линк: https://mvr.gov.mk/mk-MK/anketen-prasalnik