Македонија
ОМД ја повика меѓународната заедница да реагира за споменикот со голема Албанија во Сопот, а Владата да го отстрани
Обединетата македонска дијаспора (ОМД) најостро го осудува неодамнешното создавање на Музејот на жртвите, накитен со споменик што ја симболизира голема Албанија, во Сопот, Куманово, Македонија.
Од тука велат дека овој споменик, финансиран со јавни средства од повеќе од 300.000 евра, не е само дрзок приказ на иридентистичко однесување кон Македонија, туку претставува и значајна закана за регионалната стабилност на Балканот.
„Музејот на жртвите, заедно со споменикот што ја симболизира голема Албанија, служи како болен потсетник за историските неправди и територијалните претензии што предизвикаа огромно страдање и поделба во регионот. Нужно е македонската влада да заземе цврст став против ваквите провокативни дејства, кои служат само за влошување на тензиите и попречување на напредокот кон траен мир и стабилност“, велат од Обединетата македонска дијаспора.
ОМД ја препознава важноста од зачувување на историската меморија и промовирање на дијалогот меѓу народите. Сепак, како што се додава, изградбата на споменик што ја велича територијалната експанзионистичка идеологија не е погодна за поттикнување разбирање и помирување. Наместо тоа, таа овековечува опасен наратив, кој ја загрозува деликатната рамнотежа на Балканот.
ОМД ја повикува македонската Влада да преземе итни мерки за отстранување на овој споменик. Исто така, ги повикуваат странските амбасади и Европската Унија веднаш најостро да го осудат овој чин.
ОМД изрази подготвеност да ја поддржи владата во нејзините напори да ја поправи оваа ситуација. Ја повикуваат меѓународната заедница, особено соседните земји на Балканот, да им се придружат во осудата на овој споменик и да се залагаат за негово итно отстранување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја делови од Гази Баба и Ѓорче Петров
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 14.30 часот, корисниците на обејкт на Меркур Македонија. (општина Гази Баба)
· во периодот од 09.00 до 14.30 часот, корисниците на дел од улицата Радушка (општина Ѓорче Петров)
Македонија
Променливо облачно со повремени локални врнежи од дожд
Променливо облачно со повремени локални врнежи од дожд. Ќе дува умерен, а долж Повардарието повремено засилен ветер од северозападен правец. Минималната температура ќе биде во интервал од 3 до 6, а максималната ќе достигне од 10 до 17 степени.
Во Скопје, променливо облачно, претпладне со повремени локални врнежи од дожд. Ќе дува умерен ветер претежно од северен правец. Минималната температура ќе се спушти до 6, а максималната ќе достигне до 16 степени.
Времето во наредните денови
Под влијание на стабилна воздушна маса следува период на суво и стабилно време. Утринската температура ќе се спушти под нулата, а во одредени котлини ќе има услови за појава на магла.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.

