Македонија
ООУ „Лазо Ангеловски“ домаќин на краткорочна размена на ученици
ООУ „Лазо Ангеловски“ во Аеродром оваа недела, од 11 до 15. 4.2022 година, е домаќин на краткорочна размена на ученици во рамките на проектот на „Еразмус +“ – „Млади новинари денес – одговорни дигитални граѓани утре“, во кој учестуваат 3 партнер-училишта од Хрватска, Србија и од Романија.
Манифестацијата беше отворена на 11 април со пригодна приредба изведена од нашите ученици, на која беше прикажана куса драматизација поврзана со обичаите за Велигден и народни ора. Во текот на денот следуваа активности за тим-билдинг и меѓусебно запознавање на учениците, посета и прием во Општина Аеродром и проследување на првиот дел од презентациите за Македонија, а во пладнивните и вечерните часови во опуштена атмосфера имаше заеднички ручек и вечера со сите гости.
На гостите добредојде им посака директорката на училиштето „Лазо Ангеловски“, м-р Магдалена Петреска, осврнувајќи се на проектот и неговата важност за идните генерации истакнувајќи дека живееме во време на отворено и брзо пласирање информации, во кое нашите деца треба да знаат како да ја проверуваат веродостојноста, да ги препознаваат дезинформациите и како во иднина одговорно самите тие да пласираат информации. Само така може да имаме добро информирани идни граѓани и веродостојни информации. Потоа таа истакна дека проектот придонесува и кон создавање нови пријателства меѓу децата и возрасните од земјите во регионот.
Своето задоволство во врска со манифестацијата го изразија и координаторите на групите учеснички.
Стјепан Лучки, директор на ОУ „Св. Петар“, Ореховац, Хрватска, координатор на проектот, ја изрази својата благодарност и истакна: „Воодушевени сме од приредбата, од драмската изведба и од прикажаното народно оро и од носиите, кои имавме можност да ги видиме. Можевме да видиме дека со голема волја и жар е подготвена приредбата, па големи пофалби до учениците и наставниците што ги подготвуваа“.
Стојанка Лесички, координатор на проектот на „Еразмус+“ – „Млади новинари денес – одговорни дигитални граѓани утре“, изјави дека во рамките на проектот сите училишта успешно формирале свој дигитален училиштен весник и притоа разменувале новинарски натписи. На блогот на проектот реализирани се над 500 објави со текстови испратени од училиштата. Креирани и одржани се многубројни работилници и тркалезна маса на тема „Медиумска писменост“. За потребата од поддршка на вакви и слични проекти, го истакна следново: „Сметаме дека дигитални весници за деца се и повеќе од потребни. Недостига буџет за такво нешто, а потребата од нив секако постои со оглед на тоа дека нашите деца наоѓаат информации само на социјалните мрежи и често се дезинформирани затоа што има многу лажни вести, многу објави, кои децата, всушност, не би требало да ги читаат. Кај нас постојат дигитални весници за студенти, средношколци, но не и за децата од основните училишта, кои всушност се најмалку медиумски писмени, и ние и понатаму ќе се залагаме, дури и по завршувањето на овој проект да се направат обиди да се реализира оваа идеја и се надевам дека овој наш проект ќе поттикне некаква активност во оваа сфера, сферата на медиумска писменос“.
Биљана Вучковиќ, Чичевац, Србија: „Ние доаѓаме од мало место и нам ни е многу мило што ја почнавме новинарската секција во Србија. Денес, тука, присутни се деца кои се нашите најдобри новинари, оние што имаат напишано најголем број текстови. Преку овој проект децата имаат можност преку целата година да бидат активни и да стекнуваат дигитални и вештини за медиумска писменост“.
Ciofalca Mihaela Cristina, претставник на партнер-училиштето од Романија: „Ние ја почнавме нашата соработка со координаторот Стојанка Лeсички и координаторот од вашето училиште Љубица Ружинска на платформата eTwinning, а заедничката цел ни беше да ги подобриме дигиталните вештини и медиумската писменост на нашите ученици. Нашите ученици и наставници работат на зголемувањето на свесноста за сајбер-насилството, како да го препознаат, како да препознаат лажни вести, како да проверат веродостојност на вести и особено во време на пандемијата се појави потреба да пишуваме токму на овие теми. Им благодариме на нашите партнери од Македонија, кои одлично ја подготвија оваа размена“.
Во текот на другите четири дена од ученичката размена се реализираа повеќе работилници поврзани со темата на размената и во склад на целите на проектот, и тоа: „Моќта на медиумите“, „Да бидеме реални“, „Дали е трик или го заслужува мојот клик?“ и „Филтирани меурчиња“. Учесниците на размената исто така имаа можност да се запознаат со културата, обичаите и знаменитостите на градот Скопје и нашата држава преку презентации што сами ги подготвија, како и културните посети, кои се реалзираа во текот на размената: шетачка тура низ градот Скопје, проследена со лов на богатство, како и посета на археолошкото наоѓалиште „Стоби“. Истовремено, преку разните видови неформални активности во училиштето и надвор од него учесниците имаа можност да се дружат, забавуваат и да формираат нови пријателства со своите соучесници од државите.
Учениците учесници на ученичката размена, кои воедно се членови на медиумската група во училиштето, која е дел од овој проект, напишаа натписи во училишниот дигитален весник „Л.А ИН-форматор“ за активностите и впечатоците од секој ден на размената. Тие се достапни на следниот линк https://lainformator.wordpress.com/home/
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска се заблагодари за честитката од ЕУ: Со нетпрение очекувам да ја продолжиме соработката
Силјановска Давкова се заблагодари за честитката од ЕУ и порачува дека со нетпрение очекува да ја продолжам соработка со Европската Унија за конечно заокружување на европската интеграција на целиот регион.
„Денеска, како избрана претседателка, добив официјално соопштение од Европската Унија со кое ми се честита победата на изборите. Темелот на мојата на кампања беше градењето на консензус помеѓу сите политички партии во Собранието, како од власта, така и од опозицијата, граѓанското општество и македонските граѓани, независно од нивните разлики. Нашиот клучен стратешки проект е европската интеграција и истата останува да биде темел за градењето на консензус помеѓу различните чинители во општеството. Потенцирам дека под мое водство нашата надворешна политика ќе продолжи да биде целосно усогласена со заедничката надворешна и безбедносна политика на Европската Унија. Со нетпрение очекувам да ја продолжам соработка со Европската Унија за конечно заокружување на европската интеграција на целиот регион“, се наведува во соопштенеито испратено од тимот на Гордана Силјановска Давкова.
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархеи.
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
Македонија
(Видео) Стоилковски го поздрави лидерот на ДУИ јадејќи бисквита: „Поздрав, Али“
Портпаролот на ВМРО-ДПМНЕ, Наум Стоилковски, на социјалните мрежи објави видео во кое, јадејќи бисквита го поздрави лидерот на ДУИ, Али Ахмети.
Стоилковски вели дека оди на состанок со коалициските партнери на ВМРО-ДПМНЕ, а потоа зема бисквита и почнува да ја јаде.
„Поздрав, Али“ , вели Стоилковски.
Стоилковски алудира на изјавата на Ахмети која тој ја даде од митингот на „Европскиот фронт“ во Скопје пред одржувањето на првиот круг од претседателските избори кога рече оти лидерот на ВМРО-ДПМНЕ е израснат со бисквити и гурабии.
Македонија
ЕУ: Очекуваме соработка со претседателката на Македонија, парламентот и владата за да работиме на европскиот пат
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархељи
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
„Двете институции треба да работат заедно на подобрување на европскиот пат на Северна Македонија, кој вклучува имплементација на клучните реформи, особено во областа на владеењето на правото и борбата против корупцијата, во интерес на сите нејзини граѓани“, се вели во заедничката изјава на Борел и Вархеи.