Причините за пожарот кај мостот „Беласица“, што ги поврзува железничката станица и „Ист гејт“, се поради настанат пожар на опожарена електрична инсталација, топловодна инсталација, соопшти утрово Центарот за управување со кризи.

Според информациите, оштетен е мостот „Беласица“ на улицата Беласица, во близина на ТЦ „Ист егјт“ кај бензинската пумпа „Макпетрол“. Во гаснењето на пожарот интервенирале 21 пожарникари со 8 ПП-возила, а била зафатена површина од 2.000 м2. Пожарот целосно е изгаснат во 4 часот.

Од ЦУК за настаната состојба биле известени сите надлежни институции што посредно и непосредно имале инсталација на мостот и во близината на мостот што беше зафатен со пожарот.

„Конкретно, известени се МВР, кое целосно го блокира сообраќајот на мостот, бензинската пумпа ‘Макпетрол’, АД ‘Гама’ – Скопје, кои беа на самото место и утврдија дека немаат гасоводна мрежа што поминува на овој потег, ‘Македонски железници’, кои во одреден временски период на траење на пожарот го исклучи напојувањето со електричната енергија, ‘ЕВН Македонија’, АД ЕСМ ‘Балкан енерџи груп’, бидејќи имаше оштетено дел од цевките за парно греење и тие пратија екипа за санација на цевките. Во текот на траењето на настанот дежурните од Секторот за операции и координација на ЦУК беа во постојана комуникација и координација со институциите на терен и редовно одговараа на сите потреби на БППЗ на Град Скопје сè со цел полесно да се локализира пожарот и да не дојде до несакани последици како на пожарникарите што директно учествуваа во гаснењето на пожарот така и на населението што се наоѓа во непосредна близина на пожарот“, велат од ЦУК.

Причината за пожарот и материјалната штета дополнително ќе бидат утврдени.