За помалку од една година мандат, одбележан со светска и домашна енергетска и економска криза, жителите на Аеродром се уверија дека Општината може да функционира подобро, а дадените ветувања да се остварат, велат од Општина Аеродром.

„Во овие неполни 365 дена, аеродромци забележуваат огромна разлика во начинот на кој функционира општината, а инвестициите и проектите што се спроведуваат се видливи за сите.

Аеродромци за една година добија повеќе инфраструктурни проекти, сериозни инвестиции во образованието, нови современи содржини за спорт, забава, рекреација, како и нов начин на работа кој е неспоредлив со четирите години запоставување на Општина Аеродром.

Од ветените 4 нови градинки, со ребалансот обезбедивме средства за изработка на проект за 2, а едната градинка во Стар Аеродром ќе биде пуштена во употреба во наредните неколку недели“, додаваат од оваа општина.

Инвестициите во образованието, според нив, се повеќе од видливи и се неспоредливи со 4те години неработење кои оставија училишта во руини и преполни градинки со стотици деца на листите на чекање. Завршена беше реконструкцијата на ОУ „Димитар Македонски“, ОУ „Блаже Конески“ доби нова фасада и проект за доградба и проширување на капацитетите, ОУ „Ѓорѓија Пулевски“ доби нов велодром и игралишта за фудбал и кошарка, а ОУ „Браќа Миладиновци“ наскоро ќе биде етапно реконструирано. Учениците од 4 одделение за помалку од еден месец ќе добијат таблет уреди за следење на наставата, а сите училишта беа опремени со смарт табли. Училиштата и градинките добија нови фотоволтаици, со што значително се ублажи ударот од енергетската криза. Децата од прво одделение и дечињата со посебни потреби за првпат добиваат бесплатни часови по пливање.

„Наместо самоволие на градежната мафија и гушење на урбаното јадро, градежните парцели ги претворивме во локации на кои ќе има нови паркови и зелени површини. Најфреквентните места добиваат нови плоштади, со што значително се разубавува сликата за Аеродром.

Целосно беа обновени спортските игралишта во СЦ „Марко Божиновски“ и игралиштето „Никола Христовски – Кољо“, а нова подлога добија и неколку други спортски терени низ општината. Најубавите детски катчиња во Скопје се наоѓаат токму во Аеродром, а родителите имаат соодветни услови за игра и забава на своите најмили на разни локации низ општината.

Аеродром константно поддржува настани за сите категории на луѓе, а одлучната поддршка за МЗТ Скопје го врати клубот во АБА 1 лигата.

Благодарение на новиот начин на работа, Општината започна со процесот на дигитализација на услугите, а за само неколку месеци, се издадоа повеќе решенија за легализација од претходните четири години“, се истакнува во соопштението од Општина Аеродром.