Група граѓани на насилен и вандалски начин оневозможија да се одржи јавната презентација за предлог-планот за делот околу Трнодол, велат од Општина Карпош по инцидентот во Општината , каде што беше нападнат службеник и беше направена материјална штета во просториите на УЗ „Кузман Јосифовски – Питу“. Очигледна е намерата, додаваат од таму, на одредена група граѓани од политички или други побуди да прават кризни ситуации во Трнодол.

Како што велат од Општината, група граѓани уште на самиот почеток свесно и со намера сакале да предизвикаат инцидент.

„Општина Карпош целиот процес го води транспарентно. Токму затоа го продолжи временскиот рок на спроведување на јавната анкета, која ќе трае 11 дена, и покрај тоа што законскиот минимум е пет дена. Во интерес на граѓаните локалната самоуправа, наместо до 15.30, го стави на увид новиот предлог ДУП секој работен ден од 8 до 18 часот, каде што карпошани преку пополнување анкетни листови може да ги дадат и своите сугестии.
Во изминатиот период службите и градоначалникот Стефан Богоев одржаа средба со засегнатите граѓани, на која се постигна согласност за сите суштински работи. Исто така, постојано се информираа и медиумите за овој предлог-ДУП, а се одржа и брифинг со новинарите“, велат од Општината.

Од таму велат дека категорично се оградуваат од какви било напади или притисоци кон медиумските работници.

„Општина Карпош продолжува да работи транспарентно и одговорно и секогаш ќе биде достапна за новинарите, бидејќи вистината останува општиот интерес на граѓаните, институциите и медиумите“, се наведува во соопштението.