Македонија
(Видео) Ориз и соини шницли со ГМО пронајдени во Македонија

Агенцијата за храна и ветеринарство пронашла два производа увезени со генетски модифицирани организми (ГМО). Едниот е кочански ориз, за кој се утврдува од каде потекнува семето, додека другиот производ се соини шницли на „Виталија“, увезени од Србија, објави на прес-конференција директорот на Агенцијата, Зоран Атанасов.
„Производите се наоѓаат под официјален надзор и се чека нивно уништување. Операторите се санкционирани со казна од 5 000 евра, додека одговорното лице во фирмите со казна од 1 700 евра“, изјави Атанасов.
За производите на „Виталија“, додава тој, се чека супер анализа, бидејќи операторот по закон може да побара дополнителни испитувања.
„Првата анализа докажа дека има присуство на генетски модифицирани организми. Но, по закон, операторот има право да побара супер анализа. Ги чекаме резултатите од истата“, посочи тој.
Директорот додава дека граѓаните не можат да препознаат која храна е со ГМО додека истото не биде декларирано на производот.
Според нашето законодавство, подвлече директорот, производството на ГМО-храна е забрането.
„Во светот се консумра и се произведува таква храна. Науката треба да го каже последниот збор колку е тоа штетно. Од нашиот закон за безбедност на храна беа избришани два члена кои порано дозволуваа прозводство на храна со ГМО, но тоа беше регулирано како да се стави во промет. Сега се избришани и ставени во мирување до влегување на Македонија во ЕУ“, појасни директорот на АХВ.
Тој на прес-конференцијата додаде и дека Агенцијата утврдила оти кај 5 оператори покрај декларацијата за говедско и свинско, во меленото месо имало и делови од живинско потекло. Тие се казнети со по 5 илјади евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нов ЕХО апарат на гинекологија во Чаир за побрза и попрецизна дијагностика

Специјалната болница за гинекологија „Мајка Треза“ во Чаир доби нов ЕХО апарат, со кој значително се подобрува дијагностиката кај бремените жени и пациентките со гинеколошки проблеми.
Апаратот, вреден над 3,5 милиони денари, е обезбеден со поддршка од АД МЕПСО, која донираше над 2,7 милиони денари, како и со сопствени средства на болницата во износ од 800 илјади денари.
„Со новата апаратура ја зајакнуваме грижата за здравјето на жените, токму таму каде што е најпотребно. Зад секој апарат стои грижата за секоја жена, за секоја бремена мајка, за секој нов живот“, изјави министерот Азир Алиу за време на денешната посета на установата, придружуван од директорот на МЕПСО, Бурим Љатифи.
Оваа инвестиција претставува чекор кон унапредување на квалитетот на здравствените услуги и грижата за женското здравје.
Македонија
Со метален предмет го убил брата си, па го закопал во дворот од заедничката куќа: расчистено убиство во Кавадарци

Денеска (06.08.2025), ОВР Кавадарци до Основното јавно обвинителство Кавадарци, поднесе кривична пријава против С.И.(43) од Кавадарци поради постоење основи на сомнение дека сторил кривичнo делo „убиство“ по член 123 од Кривичниот законик.
Тој се сомничи дека на 27.07.2025 во семејниот дом во Кавадарци со метален предмет нанел повреди на неговиот брат И.И.(42) од Кавадарци, од кои тој починал, по што телото го закопал во помошен објект во дворот од заедничката куќа.
Имено, вчера (05.08.2025), нивната сестра В.О.(44) во 11:00 часот во ОВР Кавадарци го пријавила за исчезнат нејзиниот брат И.И.. Додека, во 13:00 часот пријавила дека во помошниот објект во дворот од куќата на нејзините браќа, каде што отишла со сопругот, забележале дека има ископ покриен со ровка земја, по што се посомневале дека е можно нејзиниот исчезнат брат да е закопан внатре.
Веднаш по пријавата, на местото излегле јавен обвинител, полициски службеници и претставници од Институт за судска медицина Скопје, а од погребално претпријатие откопана е дупката и било пронајдено телото на И.И..
По наредба на јавен обвинител, телото на починатиот било дадено на обдукција и вештачење. Истиот ден во 14:40 часот, по извршени оперативни проверки и добиени сознанија и во координација со јавен обвинител, полициски службеници го лишиле од слобода С.И., по што го спровеле во јавното обвинителство, каде во службен разговор го признал делото.
Македонија
Само за спортско навивање има место на трибините: МВР најстрого ќе го санкционира говорот на омраза

Министерството за внатрешни работи во континуитет апелира до сите граѓани и членови на навивачки групи да ги бодрат своите спортски клубови, но да навиваат спортски, исклучиво во спортски дух, без говор на омраза, без какви било навреди по лична, етничка, верска или која било друга припадност што не соодветствува на спортски натпревари и е спротивно на законот.
МВР нагласува дека во рамките на обезбедувањето мирни и непречени спортски натпревари, како во минатото така и сега и во иднина, полицијата ќе биде крајно ригорозна по однос на какви било нарушувања на јавниот ред и мир, односно какви било навредливи скандирања и друг начин на ширење говор на омраза.
Потсетуваат дека во врска со кошаркарскиот натпревар, што се одржа на 2.8.2025 во спортската сала во Куманово, во СВР Куманово веќе се повикани неколку осомничени лица, со кои е извршен службен разговор, и по извршените анализи, во координација со ОЈО Куманово, ќе бидат преземени конкретни законски мерки, а едно лице е лишено од слобода и против него ќе следува соодветен поднесок.
Што се однесува за фудбалскиот натпревар, кој се одржа на арената „Тодор Проески“ во Скопје на 5.8.2025, СВР Скопје врз основа на снимениот и документиран материјал презема мерки во координација со надлежен јавен обвинител, информираат од Министерството. Појаснуваат дека е доставено писмено известување до Обвинителството врз основа на веќе утврдениот материјал по што МВР ќе постапува во согласност со своите надлежности во координација со ОЈО и за какви било утврдени законски прекршувања ќе следуваат соодветни поднесоци за што јавноста благовремено ќе биде информирана.