Секоја промена на границите на Балканот ќе има домино-ефект поради што е неприфатливо да се разговара на оваа тема, изјави вицепремиерот Бујар Османи во интервју за албанската телевизија „Клан“.

Османи во најгледаната емисија во Албанија, „Опинион“, на новинарот Бленди Фејзиу му изјави дека НАТО е единствена гаранција за безбедноста и стабилноста на Македонија, па Албанците во Македонија се цврсто определени земјата да стане членка на алијансата. Тој додаде дека ако се најде решение за името со Грција, се очекува Македонија во јуни и јули да ги започне преговорите за членство во ЕУ и да стане членка на НАТО.

„Никогаш не биле поблиску преговорите за надминување на проблемите за името со Грција“, истакна Османи и додаде дека сепак во финалната фаза на билатералните преговори ќе има потреба од посредник за конечно решавање на спорот.

Во врска со законот за јазиците во Македонија, Османи во интервјуто рече дека се очекува идната недела да се надмине актуелниот грч што се случи по ветото на претседателот Иванов и покрај тоа што законот е изгласан двапати.

„Со усвојувањето на законот, конечно ќе се исполнуваат сите обврски што се предвидени со Охридскиот договор“, исткна Османи.

Според него, новата Влада предводена од премиерот Зоран Заев нуди порелаксирани меѓуетничките односи. На прашањето дали има верски радикализам во земјата, Османи истакна дека нема отворен верски радикализам и додаде дека е опасно ако политичкото организирање се врши врз основа на верата. Според Османи, во Македонија има руско влијание и тоа е присутно и во активноста на некои организации, здруженија, медиуми, а во последно време и во политичкото организирање. Коментирајќи ги билатералните односи на Македонија и Албанија, Османи оцени дека тие односи се коректни и тие покрај на билатерален план, треба да се развиваат и на регионално ниво. К. М.