Македонија
Османи – Докерти: Британска поддршка за пристапниот процес во ЕУ како инвестиција во стабилноста и просперитетот на државата

Министерот за надворешни работи, Бујар Османи, во Тирана, оствари средба со министерот за Европа на Обединетото Кралство на Велика Британија и Северна Ирска, Лео Докерти, на маргините на министерскиот состанок во рамките на Берлинскиот процес.
Двајцата соговорници ги поздравија одличните билатерални односи, кои постојат меѓу двете партнерски земји, при што Османи се заблагодари за континуираната британска поддршка на демократскиот и економски развој на Северна Македонија и регионот.
Министерот брифира за европското досие на државата и процесот на уставните измени како неопходен чекор за продолжување на пристапните преговори со Европската Унија.
„Новата геополитичка реалност вшприца нова динамика на евроинтегративните процеси на државите од регионот. Обединувањето на континентот во рамките на Унијата веќе не е само прашање на економска или политичка интеграција, туку безбедносно прашање. Оттука, мора да ја искористиме оваа еднократна шанса и да го исполниме преостанатиот политички услов за уставните амандмани и без натамошно одлагање да продолжиме кон отворање на Првиот кластер до крајот на 2023 година“, истакна Османи.
Докерти го повтори ставот на Обединетото Кралство дека продолжувањето на нашиот пристапен процес е инвестиција во стабилноста и просперитетот на државата, а ќе го зацврсти и кредибилитетот на Европската Унија.
На средбата беа разменети ставови за актуелните политичко-безбедносни состојби во регионот и други актуелни меѓународни теми.
Османи во својство на претседавач со ОБСЕ информира за следните активности на Организацијата, како и за претстојните предизвици, кои бараат заеднички одговор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.