Македонија
Османи: Во периодот што следи, ќе биде многу важно да се избегне стратешка нејасност околу нашата перспектива во ЕУ

Во рамки на Преспа форумот за дијалог во Струга, министерот за надворешни работи, Бујар Османи ја отвори панел дискусијата насловена „Дали француско-германската иницијатива за реформа на ЕУ го означува враќањето на локомотивата во погон?“.
Министерот Османи потсети дека руската воена агресија против Украина и драматично променетата геополитичка ситуација ја нагласија потребата да се зајакне капацитетот на ЕУ да дејствува, да ги зачува нејзините основни вредности и да ја зајакне нејзината отпорност.
Во периодот што следи, според Османи, ќе биде многу важно да се избегне стратешка нејасност околу нашата перспектива за членство во ЕУ.
„Во врска со прашањето за обезбедување иновативни начини како да се заживее и внесе повеќе кредибилитет во процесот на пристапување во ЕУ, заедно со нашите колеги од Б6, но исто така и преку вредниот придонес од нашите тинк-тенкови веќе обезбедивме многу предлози за вбризгување на нова содржина во однос на можностите што ги дава новата методологија. Ја нарековме – повеќе интеграција пред членството, која ќе биде повидлива и поопиплива за нашите граѓани и оттаму охрабрува најавата за новиот Развоен план од страна на Претседателката на Европската комисија Вон дер Лајен кој до есен ќе операционализира дел од овие можности, рече Османи.
Кои би биле следните чекори? Дали француско-германскиот мотор може да ја води Европа низ денешните и утрешните предизвици? На овие прашања дискутираа: Ларс Вахлунд, амбасадор во Министерството за надворешни работи на Шведска, Симонида Кацарска, директорка на Институтот за европска политика Скопје, Мартон Шоберл, директор на унгарскиот Институт за надворешни работи, Лукаш Мачек, парискиот Институт Жак Делор, Вутер Цверс, Институтот Клингендел од Хаг и Срѓан Мајсторовиќ, Центар за европски политики од Белград.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.