Македонија
Османи: Договорот од Преспа е мало дипломатско чудо што станува пример за решавање билатерални спорови

Вицепремиерот задолжен за европски прашања, Бујар Османи, оствари средба со делегација на Постојаната комисија за европски прашања на парламентот на Кралството Холандија, предводена од претседателот на Комисијата и шефот на делегацијата, Хаjке Велдман.
„Република Северна Македонија покажа исклучителна зрелост и подготвеност за почнување на пристапните преговори со Унијата, и тоа не само со исклучителните успеси во решавањето на поголемите отворени прашања со соседите туку и со интензитетот и квалитетот на спроведените реформи“, истакна Османи притоа посочувајќи на договорот од Преспа, неговото создавање, верификацијата и сега неговото спроведување, кое, како што рече, како мало дипломатско чудо сè повеќе станува пример за решавање билатерални прашања.
Тој на средбата нагласи дека постои сериозен напредок во имплементацијата на реформите во сите клучни области дефинирани од страна на Европскиот совет минатата година.
„Станува збор за напредок за кој е нотиран и соодветен трак-рекорд, кој е во постојана надградба“, додаде Османи посочувајќи притоа и на успешно спроведените претседателски избори во земјата.
Како што информираат од неговиот кабинет, на средбата биле отворени и темите поврзани со билатералната соработка помеѓу Кралството Холандија и државата, која се реализирала во изминатите две децении, а е во износ од над 150 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МВР интензивно работи на законските измени за побезбеден сообраќај, рече Тошковски

Министерот за внатрешни работи Панче Тошковски денеска учествуваше на јавната дебата „Безбедноста на пешаците – одговорност на сите нас“ во Центарот за обука на МВР – Идризово, во организација на Републичкиот совет за безбедност на сообраќајот на патиштата и Факултетот за безбедност – Скопје, .
Тошковски нагласи дека мора професионално да се пристапи кон соодветна измена на законската регулатива која во еден дел за жал не е соодветна со потребите коишто ги имаме сите како граѓани.
„Само минатата година имаме околу 30 жртви пешаци и околу 140 жртви во сообраќајни незгоди ширум државата што се бројки многу над европскиот просек. Човековиот живот нема цена. Правилата на игра коишто ќе ги ставиме на хартија ќе мора доследно да ги почитуваме сите и преку правно процесирање низ институциите секој еден ќе сноси одговорност при нивно кршење, непочитување или неприменување.“, потенцираше Тошковски.
Министерот уште еднаш нагласи дека МВР интензивно работи на законски измени коишто би требало да имплементираат еден круцијален проект кој би требало да доведе до побезбедни улици, побезбеден сообраќај и побезбедни граѓани.
„Со имплементација на проектот „Безбеден град“ во Скопје, Куманово и Тетово а потоа и на територија на цела држава, верувам дека во иднина ќе спасиме многу човечки животи коишто сме го губеле во минатото.“, нагласи на крај министерот Тошковски.
Македонија
Гаши, Меџити и Фетаи се сретнаа со албанскиот претседател, Бајрам Бегај

Вицепремиерот задолжен за политики на добро владеење, Арбен Фетаи, денес во Скопје, заедно со претседателот на Собранието, Африм Гаши, и првиот заменик-претседател на Владата, Изет Меџити, имаше средба со претседателот на Албанија, Бајрам Бегај.
За време на средбата се разговараше за зајакнување на соработката меѓу Албанија и Северна Македонија во рамките на процесот на интеграција во Европската Унија, како и за други прашања од заемен интерес.
„Главните теми на разговорот беа Коридорот VIII, безбедноста, претстојната посета на претседателот Бегај на Северна Македонија и најновите политички случувања во нашата земја“, напиша Фетаи на својот профил на Фејсбук.
Тој оцени дека соработката меѓу Северна Македонија и Албанија е клучна за стабилноста и просперитетот на регионот.
Македонија
Голема крводарителска акција во Центарот за култура во Ѓорче Петров

Во организација на Општина Ѓорче Петров, Црвениот крст и Институтот за трансфузиона медицина на Република Македонија, денеска во Центарот за култура се одржа голема крводарителска акција, која обедини бројни хумани граѓани под заедничка мисија – спасување животи.
Градоначалникот Александар Стојкоски, кој исто така е крводарител и даруваше крв денес, истакна дека крводарувањето е едно од најголемите хумани дела што секој може да го направи. „Секој дарител е херој. Вашиот гест може да биде од пресудно значење за некого што се бори за живот“, нагласи Стојкоски.
Со оваа акција, уште еднаш се потенцира важноста на солидарноста и заедништвото во нашата заедница. Општина Ѓорче Петров упатува голема благодарност до сите кои се вклучија и дадоа свој придонес.
Акцијата продолжува до 18 часот, а сите заинтересирани имаат можност да се приклучат и да станат дел од оваа значајна иницијатива.