Македонија
Османи: Една земја не дозволи заокружена одлука за почеток на преговорите
Денес 27 земји членки побараа јасно и недвосмислено Република Северна Македонија да добие нов импулс во европските интеграции за да продолжи на патот на реформите за што сме им особено благодарни. Но, денешниот Совет на ЕУ покажа дека и на Унијата ѝ е потребна реформа. Една земја, чие клучно барање е да се напушти принципот на консензус при одлучувањето, денес го искористи ова право за да не дозволи заокружена одлука за почеток на преговорите, напиша вицепремиерот за европски прашања, Бујар Османи, откако земјата не доби датум за почеток на преговорите.
Во продолжение интегрално ја пренесуваме објавата на Османи:
Почитувани пријатели, поддржувачи, почитувани граѓани,
Свесен сум дека изминативе неколку дена секој од нас, на одреден начин, беше под притисок на измешани чувства – на исчекување и надеж, но и на чувство на немир и тензија. И тоа е веројатно нормално имајќи предвид дека европските интеграции се наша суштинска определба, а припадноста во европското семејство наша автентична ориентација.
Сакам да ве уверам дека на овој пат навистина направивме многу; направивме буквално сѐ што е во наша моќ и тоа ни го признаваат сите, буквално сите политички центри на моќ го признаваат напредокот на земјава. Од реформи со кои ја вративме довербата на граѓаните во институциите до зрели политички компромиси со кои создадовме земја опкружена со соседи пријатели.
И не е дека овој резултат не беше вреднуван. Стануваме 30-та членка на НАТО – нашата најважна гаранција за стабилна и безбедна иднина; но минавме и во нова фаза од Спогодбата за стабилизација и асоцијација со ЕУ, со која институционално се поврзуваме со Унијата; го почнавме набљудувачкиот скрининг, а станавме и членки на јадранско-јонската група земји. Едноставно како земја навистина се вративме на евро-атлантскиот пат во најширока смисла на зборот.
И ова не е само наша констатација. За ова добивме потврда и од Европската комисија, и од соседите и од земјите членки на Унијата. Денес, 27 земји членки побараа јасно и недвосмислено Република Северна Македонија да добие нов импулс во европските интеграции за да продолжи на патот на реформите за што сме им особено благодарни. Но, денешниот Совет на ЕУ покажа дека и на Унијата ѝ е потребна реформа. Една земја, чие клучно барање е да се напушти принципот на консензус при одлучувањето, денес го искористи ова право за да не дозволи заокружена одлука за почеток на преговорите.
Јас немам дилеми дека европскиот кредибилитет не само во земјата туку и во целиот регион од денес е нарушен. И тоа е нормална, логична и природна последица кога една Унија изградена на принципи ќе го наруши основниот принцип и нема да го одржи сопствениот збор. Но, тоа не смее да нѐ оддалечи од европските вредности. Ние сме дел од Европа и денешната неправда не смее да нѐ оддалечи од нашите напори да продолжиме со имплементацијата на реформи, да продолжиме во изградбата на добрососедските односи, да продолжиме да ги негуваме соживотот и мултикултурното општество – едноставно, да продолжиме во изградбата на европска Република Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити најави затворање на нестандардната депонија на Липково
Првиот заменик претседател на Владaта, а воедно и министер за животна средина и просторно планирање, Изет Меџити, заедно со вицепремиерот Арбен Фетаи, како и пратеници од регионот и општински советници, денеска најавија затворање на нестандардната депонија на Липково, која се наоѓа во близина на селото Никуштак. Меџити во оваа прилика најави дека во рамките на ИПА2 Програмата за животна средина и климатска акција предвидени се значајни проекти за управување со отпадот во Источниот и Североисточниот регион.
Овие проекти вклучуваат набавка на возила и контејнери, затворање на нестандардни депонии во двата региона како и изградба на регионален систем за управување со отпад.
Проектот опфаќа набавка на возила и контејнери на соодветните региони, вклучително и општина Липково, која ќе добие камион за собирање смет и 139 контејнери. Дополнително, планирано е затворање на повеќе нестандардни депонии, вклучително и депонијата во Липково (Никуштак) и пет други помали депонии во Матејче, Горна Рупа, Лојане 1, Лојане и Гору.
Во моментов проектот е во фаза на тендерирање по претходното откажување на избран изведувач. Новата проценка започна на 6 јуни 2024 година и се очекува да биде завршена до крајот на август 2024 година, кога ќе биде потпишан Договорот и ќе започне теренската работа.
Во меѓувреме, мал дел од депонијата ќе остане отворен до изградбата на регионалната депонија во Свети Николе. Во втората фаза од проектот, во рамките на ИПА 3 Програмата, депонијата ќе биде целосно затворена. По изградбата на регионалната депонија, отпадот од Липково ќе се транспортира до друг пункт во Куманово, а потоа до регионалната депонија во Свети Никола.
Во нестандардната депонија во Липково, која се наоѓа во близина на селото Никуштак, ќе се вршат активности како преобликување на телото на депонијата, тампонирање стар отпад, изградба на пасивен систем за собирање гас и покривање на депонијата со здрава почва. Депонијата се наоѓа на стрмна падина и е далеку од секакво водно тело.
„Дејствуваме за доброто на граѓаните, за поздрав живот и почиста животна средина“, изјави првиот вицепремиер и министер за животна средина и просторно планирање Изет Меџити.
Македонија
Зеќирија Ибрахими е новиот претседател на Алтернатива
Денеска во Домот на културата во Куманово се одржа вонредниот изборен конгрес на Алтернатива. По оставката на Африм Гаши од функцијата претседател на партијата откако беше избран за претседател на Собранието на Република Северна Македонија, се појави потребата Алтернатива да го избере својот претседател. Поради оваа причина беше свикан овој изборен Конгрес.
Конгресот ја водеше својата работа во две сесии. На првата седница, која беше свечена, учествуваа и претставници на други политички партии, дипломати, новинари, претставници на бизнис секторот и невладини организации, додека на втората се работеше на изборот на новиот претседател.
Во првиот дел од Конгресот, присутните ги поздрави в.д. претседателот на Алтернатива, Беким Сали, кој посакувајќи им добредојде на гостите и делегатите, откако му се заблагодари на Африм Гаши за досегашната работа на оваа задача, истакна: „Завршувајќи го овој циклус на нашата политичка активност, денес се собравме овде да го избереме новиот претседател на Алтернатива. Последниов месец се обидов да ја покријам оваа задача, но оценивме дека нашето членство, структурите и гласачите заслужуваат да имаат претседател излезен од Конгресот, кој ќе биде правосилен да ја претставува партијата и да биде политичка алтернатива на политичката сцена. Фала му на Бога и благодарение на придонесот на секој од вас, овој процес го развиваме на демократски начин, така што денес, кога Алтернатива ќе има претседател, прво ќе бидам растеретен и среќен, додека мислам дека ова ќе биде празник за сите нас“.
По него, говор имаше и досегашниот претседател на Алтернатива, Африм Гаши, кој им се заблагодари на структурите и органите на партијата за поддршката и додаде: „Колку често ни изгледа мачна активност, колку и да е тешка, колку и да ни изгледа неблагодарно, сепак политиката останува единствениот најмоќен начин директно да влијае на животите на луѓето, а ние имаме обврска да се занимаваме со политика. Бидејќи вакумот не постои, ако ВЛЕН не ја водеше оваа битка, вие добро знаете кој ќе беше на власт денес. Затоа, почитувани делегати на Алтернатива, знајте дека вашиот политички активизам има мисионерска и историска вредност. Можеби не ви изгледа ништо што сте активист во некој разгранок, но знајте дека сте и активен учесник во јавниот живот, додека и најслабиот активизам е подобар од рамнодушноста“.
Потоа следуваа поздравите на делегациите на политичките партии, при што тие ги поздравија Билал Касами од Движењето Беса, Изет Меџити од Демократското движење, Арбен Таравари од Алијанса за Албанците, од ВМРО-ДПМНЕ Ѓорѓија Сајкоски како и Петар Арсовски од ЗНАМ.
Така заврши свечениот дел од Конгресот. Во вториот, изборниот дел, откако беше избрано раководството и го претстави дневниот ред, најпрвин беше разгледан и одобрен извештајот на досегашниот претседател на Алтернатива, Африм Гаши, а потоа помина точката за избор на нов претседател.
Во оваа прилика, делегатите за претседател го предложија Зеќирија Ибрахими, досегашниот генерален секретар на Алтернатива. Овој предлог беше ставен на гласање и едногласно одобрен од делегатите на Конгресот.
Потоа на Конгресот се обрати Зеќирија Ибрахими. Заблагодарувајќи им се на делегатите за поддршката, рече: „Ако во годините 1991-2001 се боревме за еднаквост, ако во годините 2002-2008 се боревме за институционално достоинство, ако по 2011 година деградиравме во корупција, сиромаштија, масовна миграција, во уништено образование и во корумпиран општествен живот, во 2024 година отвораме ново поглавје од нашата национална историја. Не се веќе патриотизам церемониите за дипломирање, туку ПИСА тестовите и рангирањето на универзитетите.
Тој понатаму додаде: „Можеби на некого му изгледа утопично, но моја должност во согласност со програмата на Алтернатива е да му помогнам на албанскиот бизнис, да ги направам Албанците што е можно побогати, бидејќи така се наметнува општиот квалитет на живот. Општеството со економско изобилство наметнува квалитетно образование, квалитетно здравје, богат спортски живот и просперитетна култура“.
„За крај, треба да разбереме дека не стануваме народ без образование и економија. На крајот на краиштата, политичката нација се гради со капитал и образование, како што се уништува со сиромаштија и незнаење“, заклучи новоизбраниот претседател, Ибрахими.
На крајот, делегатите на вонредниот изборен Конгрес на Алтернатива ја одобрија ажурираната листа на Централното собрание на Алтернатива и после тоа Конгресот беше прогласен за затворен.
Македонија
(Видео) Македонска делегација предводена од Мицкоски патува за Вашингтон, на НАТО самитот можна е средба и со Мицотакис
Премиерот на Македонија Христијан Мицкоски заедно со министрите за надворешни работи и трговија Тимчо Муцунски, за одбрана Владо Мисајловски и за внатрешни работи Панче Тошковски денескаа заминаа во Америка.
Македонската делегација, според информациите, првите активности ќе ги има веќе во понеделник.
„Делегација предводена од премиерот Мицкоски на НАТО Самитот во САД. Денес патуваме за САД. Делегација предводена од премиерот Христијан Мицкоски ќе учествува на НАТО Самитот во Вашингтон, каде ќе одбележиме 75 години од формирањето на Алијансата. Благодарност до нашите стратешки партнери“, напиша министерот Муцунски на ФБ.
Очекувањата се дека на самитот ќе се случи и средба на македонскиот премиер Мицкоски со неговиот грчки колега Мицотакис. Тоа ќе биде прва средба откако Грција остро се спротивстави на изјавите со користењето на името „Македонија“, без додавката „Северна“.
Мицотакис најави дека Мицкоски ќе се најде во многу непријатна позиција во рамките на Самитот на НАТО доколку опстојува на оваа реторика.
Директорот за Европа и НАТО во Пентагон, Бјуланд, пак, порача билатералните односи да останат надвор од НАТО, а САД ќе продолжат силно да го поддржуваат Договорот од Преспа.
Самитот во Вашингтон започнува во вторник, а во фокусот ќе биде прашањето за помош на Украина и нејзиното влегување во НАТО.