Македонија
Османи: Интеграцијата на Западен Балкан мора да почне сега, а да се финализира со членството

Министерот за надворешни работи, Бујар Османи, на покана на германската министерка за надворешни работи,, Аналена Бербок, денес учествуваше на министерската конференција „Проширена, посилна Унија“ во Берлин, организирана од Сојузното министерство за надворешни работи.
„Северна Македонија е лакмус-тестот за кредибилитетот на Европската Унија. Од ставовите на Јункер до оние на Фон дер Лајен пред неколку дена, можам емпириски да посведочам дека Европа денес е соочена со геополитичко будење, кое треба да обезбеди геостратешка инвестиција во безбедноста на ЕУ“, истакна Османи.
Во своето обраќање министерот се осврна на концептот „Повеќе интеграција пред членство во ЕУ“ како еден од модалитетите како ефективно да фатиме чекор со економиите на земјите членки на ЕУ и да го премостиме јазот што моментно се зголемува наместо да се стеснува. Воедно, го поздрави уште еднаш планот за раст на ЕУ за Западен Балкан, претставен од претседателката на Европската комисија, Урсула фон дер Лајен, кој се дополнува со овој концепт.
Што се однесува до дебатата за потребата од внатрешни реформи со цел земјите да бидат подготвени за прием како нови членки во догледна иднина, Османи рече дека тие треба да се третираат како комплементарни со проширувањето, а не како едната да ја исклучува другата или да биде предуслов.
„По 20 години од солунската агенда, потребно е да се смени сегашниот бинарен пристап на сè или ништо, каде што една земја сè додека не е членка на Унијата не е вклучена во политиките или институциите на ЕУ или нема пристап до фондовите на ЕУ. Наместо тоа, секој кандидат, преку успешно спроведување на реформите и усогласувањето на своите политики со оние на ЕУ, треба да напредува со сопствено темпо преку постепена интеграција“, истакна Османи.
Министерот се обрати на првиот дел од конференцијата заедно со министрите за надворешни работи на Германија – Аналена Бербок, на Словенија – Тања Фајон и на Украина – Дмитро Кулеба.
Министерската конференција, чија цел е размена на мислења во однос на подготвеноста на Унијата за проширување и на идните земји членки за членство во ЕУ, се одржа непосредно пред Европската комисија да го објави својот пакет за проширување заедно со извештаите за земјите, кои ќе дадат препораки за конкретни чекори за кои ќе одлучува Европскиот совет во декември.
На маргините на конференцијата Османи ќе оствари и билатерални средби со свои колеги од земјите членки на ЕУ и од регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Условната казна за случајот со терапијата за рак е непочитување на жртвите, рече Андоновска

Пратеничката Викторија Андоновска од ВМРО-ДПМНЕ денеска оцени дека условната казна изречена за злоупотребата на терапијата за пациенти со рак претставува „потценување на интелигенцијата на народот и непочитување на жртвите“.
„Со години пациентите добивале физиолошки раствор наместо вистинска терапија. Додека тие мислеле дека се лекуваат, тие всушност умирале,“ рече Андоновска.
Таа додаде дека според обвинението, со оваа злоупотреба е направена штета од 2.2 милијарди денари врз буџетот, а истовремено стотици пациенти биле лишени од можност за продолжување на животот.
Андоновска порача дека по ваква пресуда во нормални околности би следеле разрешувања и оставки во судскиот систем, кој, како што нагласи, е „зрел за ремонт“.
Македонија
Засилен систем за енергетска транзиција – стартува Единица за техничка поддршка

Министерството за енергетика, рударство и минерални суровини поддржа формирање на Единица за техничка поддршка (ЕТП) чија цел е помош во координација на процесот на енергетска транзиција.
ЕТП ќе претставува клучна алка во поврзувањето на сите релевантни чинители: државните институции, јавните претпријатија, приватниот сектор, синдикатите, регулаторните тела и меѓународните партнери.
„Со формирањето на оваа Единица воспоставуваме јасен систем за поддршка на целиот процес, координација, следење и дијалог со сите засегнати страни. Целта е да обезбедиме забрзана и поорганизирана транзиција, со конкретни резултати и со целосна отчетност пред јавноста,“ порача министерката Сања Божиновска.
„Процесот на праведна транзиција е сложен и бара целосна координација, одговорност и заедничка работа. Нашата земја има амбиција да постигне јаглеродна неутралност до 2050 година и да го напушти јагленот како ресурс за производство на електрична енергија. Но еднакво важно е да се осигураме дека ниту една заедница или поединец нема да биде запоставен,“ нагласи министерката Божиновска.
ЕТП ќе функционира под надзор на Министерството за енергетика, а во неговиот состав се вклучени експерти од области како енергетика, комуникации и проектен менаџмент.
„Само преку систематски и транспарентен пристап можеме да ја обезбедиме довербата на граѓаните и поддршката на сите засегнати страни. Формирањето на оваа Единица е чекор напред во градење на силна институционална основа за успешна и праведна енергетска транзиција,“ додаде министерката Божиновска.
Македонија
СДСМ: Учебници сè уште нема, потребно е итно решение

СДСМ денеска преку портпаролката Богданка Кузеска потсети дека е поминат еден месец од почетокот на учебната година, а голем дел од учениците сè уште немаат учебници.
Од партијата посочуваат дека дел од учениците се приморани да учат без учебници, а дел располагаат со стари и оштетени изданија. Родителите не треба да печатат материјали дома, ниту наставниците да импровизираат, велат од СДСМ.
Според нив, обврска на Министерството за образование и наука е да обезбеди учебници навремено за сите ученици. Од таму бараат итно да се најде решение и учебниците да бидат доставени во најкраток рок.