Македонија
Османи од Брисел: Интеграција во ЕУ уште пред полноправното членство во ЕУ

Министерот за надворешни работи Бујар Османи, денес, во рамки на неговата работна посета на Брисел, одржа брифинг во реномираниот Бриселски институт – Центар за европски политики (EPC), на тема „Северна Македонија и ЕУ: Движејќи се кон повеќе интеграција“.
Во своето обраќање, Министерот го претстави концептот на прогресивна интеграција во ЕУ пред полноправното членство, истакнувајќи ги напорите на државата да ги усогласи политиките и законодавството со оние на ЕУ. Во таа смисла, Османи предложи неколку мерки, како на пример, земјите кандидати да бидат поканети да присуствуваат на состаноците на Советот за надворешни работи, како и да станат корисници на структурните и кохезионите фондови уште за време на преговорите.
Во врска со процесот на пристапување на Северна Македонија во ЕУ, Османи ги поздрави позитивните сигнали од ЕУ, цитирајќи ги зборовите на претседателот на Европскиот совет Мишел во Блед, со кој е поставена временска рамка до 2030 година за новите земји-членки.
„Наша цел е да го исполниме преостанатиот политички услов за уставните амандмани и без натамошно одлагање да продолжиме кон отворање на Првиот кластер до крајот на 2023 година. Од друга страна, време е ЕУ да дејствува сега и да го направи тоа без двоумење. И судејќи според неодамнешните изјави, мислам дека овој начин на размислување конечно пристигна во сите главни градови на ЕУ“, предочи Османи.
Османи се осврна на долгиот пат на државата кон членство во ЕУ, истакнувајќи го доследното придржување кон Копенхашките критериуми и цврстата определба за добрососедски односи и регионална соработка. Го истакна членството на Северна Македонија во НАТО и нејзиниот 100-отстотен придонес во надворешната и безбедносната политика на ЕУ, а ја нагласи и улогата на Северна Македонија како актуелен претседавач со Организацијата за безбедност и соработка во Европа (ОБСЕ) и претседавањето со Процесот за соработка во Југоисточна Европа (ПСЈИЕ) и А5-Јадранската повелба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зголемен интензитет на сообраќај поради летните одмори

На 27.08.2025 од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на граничните преминиод македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
На ГП Меџитлија откриени над 300 шишиња со хемиски препарати за прскање: спречен обид за криумчарење

Царинските службеници на граничниот премин Меџитлија спречија обид за криумчарење на поголема количина препарати за заштита на растенија.
Во раните утрински часови, на 26.08.2025 година, при вршење на редовна царинска контрола на патничко моторно возило Mercedes со македонски регистарски таблички, со кое патувало семејство што изјавило дека се враќа од одмор во Турција и преку Грција пристигнало на влез во нашата земја, од страна на царинските службеници биле откриени 322 шишиња хемиски препарати за прскање, од кои 300 шишиња инсектицид CORAGEN 20 SC и 22 шишиња фунгицид Bellis BASF со вкупна вредност од 16.058,00 евра.
Препаратите биле сокриени на повеќе места во возилото – во багажниот простор зад куферите со лични работи, во просторот за резервна гума и на задните седишта. Возачот не поседувал соодветна дозвола за увоз, иако станува збор за стока што подлежи на посебен режим на дозволи со што безбедноста на производите не е гарантирана .
Стоката е задржана, возилото со кое била транспортирана е одземено, а против лицето ќе биде поведена кривична постапка. Случајот е предаден на Одделението за истраги при Сектор за контрола и истраги за понатамошно постапување.
Македонија
Претежно сончево и топло со температури до 36 степени

Времето денеска, претежно сончево и топло. Ќе дува слаб до умерен ветер од јужен правец. Минималната температура ќе биде во интервал од 6 до 14, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува слаб ветер од јужен правец. Минималната температура ќе се спушти до 12, а максималната ќе достигне до 36 степени.
Во следните два дена ќе се задржи претежно сончево и топло време со постепен пораст на дневните температури. Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен југозападен, а во недела северен ветер, кој ќе услови опаѓање на дневните температури. Потоа следува период на стабилно и потопло време.