Македонија
Османи побара Транснистрија да ги почитува принципите и заложбите на ОБСЕ

Претседавачот со ОБСЕ, Бујар Османи денеска се сретна со Вадим Красноселски, лидер на Транснистрија и нивниот главен политички преговарач Виталиј Игњатиев. Транснистрија е самопрогласена држава, на источната граница на Молдавија со Украина.
Во фокусот на дискусијата на овие средби беше иницијативата на ОБСЕ да се поттикнат посуштински преговори помеѓу Владата на Молдавија и авторитетите на Транснистрија. Османи истакна дека за ОБСЕ од голема важност е што страните одбрале мирен пат да ги решаваат предизвиците, имајќи предвид дека врз сето тоа големо влијание има воената агресија на Руската Федерација врз Украина. Претседавачот со Организацијата истакна дека посебно внимание ќе посвети на хуманата димензија на процесот и ќе даде поддршка пред сè на луѓето.
„Го ценам тоа што од самиот почеток на војната во Украина, во многу наврати повторивте дека Транснистрија е посветена на мирот. Овие ваши ставови се многу важни за стабилноста и мирот во регионот. Нашето претседавање останува посветено да им помогне на страните да најдат практични решенија за надминување на предизвиците и да спречат назадување на процесот. Верувам дека ќе опстоите на тоа за доброто на луѓето од двете страни“, посочи Османи на состанокот.
На средбата тој посочи и дека е од исклучителна важност да се интензивира интеракцијата со двајцата главни преговарачи и експертите од работните групи, осврнувајќи се на поддршката од Мисијата на ОБСЕ во Молдавија која има клучна улога во одржувањето на политичкиот дијалог воден од страна на ОБСЕ и напорите на специјалниот претставник за решавање на проблемот со Транснистрија, амбасадорот Томас Мајр-Хартинг.
Главна цел на Организацијата, како што посочи Османи за време на средбите, е двете страни да ја реализираат договорената рамка во 8 области. Тој нагласи дека иако процесот 5+2 е ставен во мирување, ова останува единствениот формален, меѓусебно договорен формат на преговори. „Ја поддржувам идејата да се најде пат за продолжување на формалните или неформалните разговори 5+2, за да се одржи процесот на вистинскиот пат“, рече Османи.
Претседавачот со Организацијата посочи дека ОБСЕ ќе ги искористи сите свои механизми и алатки како би се олесниле преговорите меѓу двете страни, истакнувајќи дека Специјалниот претставник за Транснистрија во координација со теренската Мисија на ОБСЕ во Молдавија ќе направат сè што е во нивна моќ за да изнајдат начини за придвижување на процесите напред.
„Двете страни мора да изградат доверба пред сè, бидејќи тоа е неопходно за да може да се оди кон решавање посложени прашања. Би сакал да ја истакнам важноста од почитување на човекови права во согласност со принципите и заложбите на ОБСЕ, бидејќи овие права ги претставуваат основните столбови на секое демократско општество“ истакна Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Градоначалникот на Центар, Герасимовски да одговори, каде отидоа парите за Работнички, прашува Мемов

Движењето ЗНАМ – За Наша Македонија на денешната прес-конференција потенцира дека недомаќинскиот однос на градоначалникот на општина Центар, Горан Герасимовски го доведе кошаркарскиот клуб „Работнички“ во незавидна ситуација. „Долговите се големи, „Работнички“ има дури шест БАТ-процеси што се водат против „центарци“.
„Фактот дека управата и градоначалникот Герасимовски не успеваат да најдат начин за исплата на средствата пред стартот на сезоната, говори дека чистењето на финансискиот хаос во клубот е невозможна мисија. Прашање е дали „центарци“ ќе успеат да ги решат овие спорови пред БАТ-судот на арбитража на ФИБА“ рече портпаролот на Движењето, Никола Мемов.
Тој го запраша градоначалникот Герасимовски дали Центар полека ја губи својата гордост Кошаркарскиот клуб „Работнички“. „На што се должат овие долгови на клубот и зошто Герасимовски го дозволи тоа?
-Дали Работнички ќе мора да настапи со преполовена екипа во следната сезона и да игра со играчи од младинските категории? Колку пари се двојат од буџетот на општина Центар? Каде се потрошени издвоените пари за „Работнички“.
Мемов нагласи и дека реконструкцијата на салата на „Работничи“ е во застој и запраша дали причината е поради тоа што Герасимовски им должи на изведувачите. „Работнички“ додава тој, мора повторно да застане на здрави нозе, салата да биде завршена и претворена во модерен спортски центар, каде што младите од Центар ќе сонуваат за титули.
„Клубот да има стабилно финансирање и транспарентно работење со јасна стратегија и одговорно управување. Однесувањето на градоначалникот Герасимовски е недомакинско. Никој не смее да си игра со достоинството на „Работнички“ и на Центар. Храмот на спортот ќе биде изграден со помош на општествено одговорни компании кои го сакаат „Работнички“ и спортот. Имаме визија и план во кој ќе се вклучат истакнати поранешни и сегашни спортски работници и ентузијасти, вљубеници во кошарката и ќе придонесат најтрофејниот клуб на Центар да се издигне повторно на пиедесталот, каде што му е местото“, рече на денешната прес конференција портпаролот на Движењето ЗНАМ – За Наша Македонија, Никола Мемов.
Македонија
Македонија од денес и официјално дел од СЕПА: полесни и побрзи плаќања во евра

Министерството за европски прашања информира дека од денес, 7 октомври 2025 година, Република Северна Македонија официјално започнува со примена на Единствената зона за плаќања во евра (SEPA), со што граѓаните и компаниите ќе можат да вршат и примаат плаќања во евра кон и од земјите членки на SEPA под исти услови како и во Европската Унија.
Денес, со започнување на практичната примена за полесни, побрзи и поевтини трансакции во евра, Северна Македонија и официјално стана активен дел од европската зона за плаќања, што претставува важен чекор во унапредување на интеграцијата со единствениот европски пазар, истакнуваат од министерството.
Приклучувањето кон SEPA, како што е појаснето, е дел од активностите во рамките на Планот за раст на ЕУ за Западен Балкан, кој има за цел да ја забрза економската интеграција на земјите од регионот со Европската Унија преку зголемен пристап до единствениот пазар, поттикнување на инвестиции и унапредување на финансиските услуги.
„Овој значаен напредок претставува конкретен резултат од заложбите на Владата и на Министерството за европски прашања на Република Северна Македонија за спроведување на европските стандарди и подобрување на условите за граѓаните и бизнисите. Со имплементацијата на SEPA плаќањата, нашата земја се приближува кон европските финансиски текови и го потврдува својот континуиран напредок на патот кон членство во Европската Унија“.
Македонија
„Се виде кој вистински управува со СДС, тоа е Зоран Заев, а Венко Филипче е само нем послушник“, велат од ВМРО-ДПМНЕ

„Се докажа дека Заев ја води СДС, додека Филипче е само статист во целата приказна. Иако формално Филипче има водечка улога, реалноста покажува дека сите клучни одлуки и насоки доаѓаат од Заев. Со јавувањето на Заев се гледа кој е вистинскиот лидер на СДС и кој ја има контролата врз партијата и кој ги влече конците во партијата“, велат од ВМРО-ДПМНЕ.
„Филипче и СДС, по наредба на Заев, направија резолуција со која промовираат некакви црвени линии, кои тие веќе ги имаа прегазено и поминато изминативе години, на штета на македонскиот народ.
Како што Заев земаше куферчиња од Бугарија, Филипче да одговори какви куферчиња зема тој сега за да им удоволи на Бугарите, со што ќе си направи уште еден бонбона бизнис.
А, тоа што Заев вели дека не земал куферче пари од Бугарија не значи дека таа изјава е вистинита. Самиот негов обид да се оправда пред јавноста создава сомнеж и отвора прашања за вистинитоста на неговите тврдења.
Неговата акција за потпишување на бугарскиот договор, не е резултат на политичка волја, туку на финансиски интерес.
За сопствени интереси, како што Заев ја продаде државата, така и Филипче е спремен да ги продаде македонските интереси и идентитет за едно полно куферче.
Затоа, Филипче молчи за Заев, за неговите криминали, бидејќи и тој е поврзан со истите.
ВМРО-ДПМНЕ заедно со граѓаните, нема да дозволи уште еден бонбона бизнис, со цел богатење на Заев и Филипче, а распродажба на македонскиот народ“, се додава во соопштението на ВМРО-ДПМНЕ.