Македонија
Османи со план за позелена и побезбедна Северна Македонија

Кандидатот за претседател на Европскиот фронт, Бујар Османи, вети дека доколку биде избран за прв човек на државата, ќе работи на трансформација на Северна Македонија во зелена држава која ќе се грижи за животната средина. На денешната прес-конференција во Градскиот парк во Скопје, Османи истакна дека ќе формира одбор за валидација, односно ветинг и нема да потпише ниту еден закон што ќе биде спротивен на стандардите за заштита на природата.
“Како кандидат за претседател, се посветувам на зелената агенда која го става на прво место здравјето на нашата планета и доброто на нашиот народ. За да го оствариме ова, предлагам основање на одбор за валидација, посветено тело кое ќе прави скрининг на сите проекти и закони за нивното влијание врз околината. Овој одбор ќе служи како чувар на нашето природно наследство, осигурувајќи дека секоја одлука која ја донесуваме како нација е во согласност со принципите на одржливост и заштита на околината. Тоа ќе биде доказ за нашата посветеност кон идните генерации, осигурувајќи дека тие ќе наследат земја која не само што е просперитетна, туку и зелена и безбедна” истакна Османи.
“Додека се соочуваме со предизвиците на 21 век, е неопходно да ја признаеме нераскинливата врска помеѓу нашата околина и националната безбедност. Безбедноста не е само за граници и армии; таа е за создавање општество кое е отпорно, самоодржливо и во хармонија со природата. Со интегрирање на еколошките размислувања во нашиот безбедносен оквир, земаме целосен пристап за заштита на иднината на нашата земја” рече кандидатот за Претседател.
Османи додаде дека нашата земја е благословена со природна убавина, од мирните води на Охридското Езеро до величествените врвови на Шар Планината и дека е наша обврска да ги чуваме истите во патот кон една позелена и посигурна Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски го свикува кризниот штаб поради состојбата со ѓубрето

Општина Центар свика кризен штаб поради состојбата со сметот во градот, а со тоа и во општината, оценувајќи ја како крајно загрижувачка.
Бидејќи нема информација дали и кога Градот и ЈП „Комунална хигиена“ ќе продолжат со собирањето на сметот неопходни се итни и кризни мерки на општинско ниво, велат од Општината.
Се додава дека во текот на вчерашниот ден и ноќта, ЈП „ПОЦ“ продолжи со собирање на сметот и се работи во две смени. Акцијата продолжува секој ден.
Македонија
Лабудовиќ: За секој ученик во центар субвенција за таблет или лаптоп

Кандидатот за градоначалник на општина Центар, Мирослав Лабудовиќ, ја најави новата мерка што ќе биде дел од неговата програма за дигиталната писменост како поддршка на младите – субвенции за таблети и лаптопи за сите ученици од петто одделение во општина Центар.
„Денес дигиталната писменост е исто толку важна колку и учебникот. Ако сакаме децата да бидат во чекор со времето, мора да им овозможиме еднаков пристап до современи алатки за учење. Затоа, воведуваме мерка со која секое дете ќе добие поддршка од 3.000 денари за таблет или 6.000 денари за лаптоп. Ова е конкретна помош за родителите, но и вистински чекор кон модерно, рамноправно и достапно образование за сите,“ изјави Лабудовиќ.
Според него, оваа мерка не е само финансиска поддршка, туку инвестиција во знаење, иднина и еднакви шанси за сите ученици. Со неа, Општина Центар ќе стане пример за тоа како една локална самоуправа може да придонесе за поголемо ниво на дигитална писменост и поддршка на младите генерации.
„Сакаме децата во Центар да имаат исти услови за учење – без разлика на тоа од какво семејство доаѓаат. Сакаме сите да имаат еднаква можност да учат, да истражуваат и да се надградуваат. Затоа што секое дете заслужува поддршка, а секој родител заслужува сигурност дека неговото дете има фер старт во животот,“ истакна Лабудовиќ.
Оваа мерка е дел од пошироката визија за модерна, дигитална и напредна општина, која вложува во младите како највреден капитал на општеството.
„Образованието е највредната инвестиција што можеме да ја направиме – затоа што вложувајќи во нив, вложуваме во нашата иднина. Центар ќе биде општина што ги отвора
вратите кон дигиталниот свет, општина која стои зад секое дете со конкретна поддршка, визија и верба дека секој ученик може да успее,“ додаде Лабудовиќ.
Со оваа иницијатива, Центар ќе направи уште еден голем чекор напред кон еднакво, достапно и современо образование, подготвувајќи ги најмладите за предизвиците на новото време.
Македонија
ВЛЕН: Изборите беа локални, но поразите на НАИ се национални

Очајните обиди на поразената НАИ да ги преведе изборите од 19 октомври во „мандати за пратеници“ се доказ дека оваа коалиција не само што изгубила гласови, туку и контакт со реалноста, велат од „Влен“.
„Ова беа локални избори. И токму тука Албанците проговорија појасно од кога било, тие избраа промени, тие избраа ВЛЕН. Во повеќе од десет општини, Албанците ја дадоа својата доверба во нова енергија, во лица кои работат, а не во оние кои се кријат зад лажен патриотизам кога немаат што да му понудат на народот. Тие избраа политика на резултати, а не политика на страв.
Дури ни телевизиските толкувања на превртените бројки не можат да го променат фактот дека сега е неоспорно дека ВЛЕН ја покрива целата политичка карта на Албанците. И ова е единствената карта што се брои, онаа на слободната волја на граѓаните.
Изјавите на Арбер Адеми, Блерант Рамадани, Кренар Љога и некои други, кои смислуваат имагинарни графикони за „идни пратеници“ што никогаш нема да ги видиме, се доказ за паниката што ја зафати селотејп коалицијата. Тие сè уште не ја разбрале пораката на народот дека е време за реформи, а не за измислување бајки за да ги држат будни милитантите.
Четири дена по ред, нивниот „неоспорен“ лидер, Али Ахмети, не се појави никаде. Можеби сè уште чека да му бидат прикажани резултатите од „референдумот“.
Им посакуваме на Арбер Адеми, Блерант Рамадани и Кренар Љога почести јавни настапи. Секој пат кога ќе проговорат, НАИ губи илјада гласови. И ние, искрено, немаме ништо против тоа“, се додава во соопптението.