Македонија
Османи: Успехот од Преспа се рефлектира и во економските односи со Грција
Заменик-претседателот на Владата задолжен за европски прашања, Бујар Османи, оствари средба со генералниот секретар за меѓународни и економски односи на Министерството за надворешни работи на Република Грција, Јоанис Брахос.
На средбата беа отворени темите за исполнувањето на обврските кои произлегуваат од преспанскиот договор, економската соработка помеѓу двете земји, со посебен фокус на регионалната економска интеграција и досега реализираните економски реформи. Целта на разговорот беа можностите за унапредување на меѓусебната соработка во сите наведени области, со посебен фокус на проектите за прекугранична соработка кои се реализираат со финансирање преку ИПА-средствата на Европската Унија.
„Напредокот во меѓусебната комуникација и економската соработка ја одбележува новата ера на билатерални односи помеѓу двете земји по потпишувањето на договорот од Преспа и е веројатно најважната придобивка од напредокот во политичките односи “, истакна Османи на средбата, посочувајќи на одлуката на Владата за поддршка и реализација на проектот за развој на Преспанскиот Регион и отворањето на граничниот премин „Маркова нога“.
Во рамките на средбата беа отворени и останатите прашања за билатерална соработка, особено во рамките на размената на знаење и искуство, со кое Република Грција ќе ѝ помогне на Република Северна Македонија во подготовките на администрацијата и останатиот дел од преговарачката структура за успешен старт на преговорите со Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
223 санкции за брзо возење на територијата на Македонија
Вчера Министерството за внатрешни работи спроведе акциска контрола на територијата на Република Северна Македонија за санкционирање на возила кои се движат со брзина поголема од дозволената, при што санкционирани се 223 возачи. Од нив 20 возила се движеле со брзина над 50 километри на час повеќе од дозволеното, а осум возила се движеле со дури над 70 километри на час повеќе од дозволената брзина. Притоа, 114 возила ја пречекориле брзината во населено место, а 109 надвор од населено место.
„Сообраќајните контроли продолжуваат и во наредните денови. Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта“, велат од МВР.
Македонија
Мицкоски најави нова инвестиција со која ќе бидат вработени над 110 граѓани
Премиерот Христијан Мицкоски преку социјалната мрежа „Фејсбук“ најави германско-белгиска инвестиција
Станува збор за германската компанија ЕПСОТЕХ која во партнерство со белгиската АИМ ќе инвестира во изградба на нов производствен погон во земјава, за што ќе бидат вложени 20 милиони евра.
– Објектот ќе биде лоциран во општината Петровец, надвор од технолошко-развојните зони и во него ќе се произведуваат елементи од автомобилската, железничката и здравствената индустрија. Со градежни активности се започнува на крајот на август, а за една година се планира вработување на повеќе од 110 наши сограѓани. Toa што е значајно дека дел од инвестицијата е и Центар за истражување и развој што дава голема додадена вредност на истата и ќе значи ангажирање на високо стручни вработувања, напиша Мицкоски на Фејсбук.
Македонија
Изгаснати девет пожари на отворено, во Гевгелија пронајдени неексплодирани гранати, соопшти ЦУК
Центарот за управување со кризи (ЦУК) информира дека имало вкупно 1. 975 повици на Единствениот повикувачки број за итни случаи 112 во ЦУК, во последното деноноќие.
Од центраот информираат и за вчерашната конституитивна седница на Управувачкиот комитет за координација и управување со системот за управување со кризи на којашто присуствуваа членовите, министерот за внатрешни работи Панче Тошковски, министерот за надворешни работи и надворешна трговија Тимчо Муцунски, министерот за одбрана Владо Мисајловски и министерот за здравство Арбен Таравари, како и раководителот на Група за процена на ризици и опасности и директор на ЦУК, Стојанче Ангелов. На седницата присуствуваше и министерот за земјоделство, шумарство и водостопанство Цветан Трипуновски. Со седницата раководеше министерот за внатрешни работи, Панче Тошковски.
Директорот на ЦУК и раководител на групата за процена, Стојанче Ангелов, ги запозна присутните со прогласената, популарано именувана, „мигрантска“ кризна состојба на јужната и северната граница, како и кризната состојба во КПУ „Идризово“. Воедно, Ангелов, даде детална информација за бројот на пожари на отворен простор, штетите од пожарите, начинот на функционирање на системот за гаснење на пожарите како и за ресурси што се на располагање за гаснење пожари на отворено. Инаку, вицепремиерот и министер за транспорт и врски, Александар Николоски, заради неодложни обврски не присуствуваше на седницата.
Вчера имаше девет пожари на отворено, сите се изгаснати од пожарникарите и активни пожари утрово нема. Пожарите на отворено биле во општините: Општина Гази Баба, ул.Зендел Џемаил (горело ѓубре); Карпош, покрај ул.„Скупи“ (горело ѓубре и сува трева); Арачиново, крај стариот пат за Арачиново (сува трева и грмушки); Сарај, с.Копаница (стрниште); Битола, с.Габалавци (ѓубриште); Струга, во реон кон ГП „Ќафасан“ (ѓубриште); Свети Николе, кај с.Горобинци (изгореле грмушки и сува трева, нискостеблеста шума и помошен објект); Општина Кочани, кај с.Облешево (стрниште) и во Општина Куманово, кај населбата „Диво Насеље“ (горела сува трева).
Регионалниот ЦУК Струмица, известува дека преку Единствениот повикувачки број за итни случаи 112 во ЦУК, била добиена дојава за пронајдени стари неексплодирани убојни средства (НУС), кај с.Моин, Општина Гевгелија, во близина на границата со Република Грција, и веднаш е известен пиротехничар од ДЗС Струмица за безбедно да се отстранат опасните стари неексплодирани убојни средства. Се препорачува на граѓаните кога ќе најдат НУС од минатите војни, да не ги фаќаат и поместуваат, туку едноставно да се јават на 112 во ЦУК за нивно безбедно неутрализирање според стандардни оперативни постапки.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации.