Македонија
Османи: Целта е Охридскиот рамковен договор да го претвориме во политичко движење
Кандидатот за претседател Бујар Османи рече дека се залага за еднаква држава за сите, каде што и покрај ограничената моќ, како иден претседател ќе стане авторитет кој ќе ги обедини различните политички и етнички наративи и активен адвокат на правата на граѓаните, во борба против било која форма на дискриминација. На јавната дебата по повод одбележување на 8-ми април, Меѓународниот ден на Ромите, Османи истакна дека целта на Европскиот Фронт е да го претвори Охридскиот рамковен договор во политичко движење.
„Одбележувајќи го овој ден, стојам пред Вас, не само како кандидат за претседател на Република Северна Македонија туку како еден посветен адвокат на создавање на еднаква држава, со еднакви можности за сите граѓани” рече Османи, образложувајќи дека разликата меѓу едно општество за сите и еднакво општество за сите е дека во првиот концепт најбројните ќе доминираат додека на вториот, без разлика на бројот на припадниците на одредена етничка припадност, сите се еднакви во правата и привилегиите.
Османи ја опиша ситуацијата на која се наоѓаат Ромите и презентираше конкретни решенија за подобрување на нивната позиција, меѓу кои ангажирање на главен советник во кабинетот на претседателот за ромските прашања, создавање на механизми за пристап на Ромите до здравствените услуги со фокус превентивно здравство, задолжително пред-школско образование со што државата да обезбеди доволно градинки, воведување на програма за професионална обука на Ромите за стекнување вештини компатибилни со пазарот на трудот со цел намалување на невработеноста итн.
„Овој ден е ден кога не треба да ги ублажиме ставовите, тука да ја кажеме реалноста. Ромите имаат помал животен век, отколку другите етнички заедници. Ромите имаат поголема смртност на новороденчиња. Ромите имаат многу повеќе хронични заболувања отколку што имаат другите етнички заедници. И тоа не е генетика. Тоа се само услови коишто ги создава државата за пристап до превентивна нега, здравствени услуги. Тоа мора да се констатира. Ромите се дискриминирани” рече Османи.
Со свое обраќање претседателката на партијата, Унијата на Ромите, Фатима Османовска ја пренесе оптимизмот дека со Бујар Османи и Европскиот Фронт, гласот на Ромите ќе биде слушнат.
„Искрено многу верувам дека овој глас што тргнува од нас не само што ќе биде слушнат, туку ќе биде ставен и во програмата на идната влада и ќе биде реализиран. Верувам дека оваа ќе биде преточено во една политика владина и дека конечно, после 4 години на 8-ми април ќе може да говориме што сме направиле. Верувам во заложбите на претседателот иако е мала моќта на претседателот, сепак верувам на моќта на индивидуата и авторитетот што го има. г.Бујар има авторитет стекнат низ своето политичко досегашно искуство за да може да го пренесе гласот на нас како заедница” рече Османовска.
На дебата учествуваа и кандидатката за пратеничка на Европскиот Фронт, Дијана Тоска која ја истакна потребата за повеќе заложби за надминување на бариерите меѓу етничките заедници и претседателката на комисијата за еднакви можности, Имране Морина која побара поголемо и поактивно вклучување на сите заинтересирани страни кон јавните политики, според нејзе, битно за успешна држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Oбединетата македонска дијаспора: Инаугурацијата на Силјановска е историска
Организацијата Обединета Македонска Дијаспора (ОМД), и честита на професорката Гордана Силјановска Давкова за нејзината значајна инаугурација како прва жена претседател на Македонија.
„Претседателката Силјановска Давкова на историската церемонија го реафирмираше уставното име на нашата Македонија, потврдувајќи го основното право на Македонците на самоопределување. ОМД ја поздравува нејзината непоколеблива заложба за зачувување на нашиот национален идентитет и суверенитет, чувство што се повторува во нејзините обемни придонеси, вклучително и основниот труд „За „Договорот од Преспа“ и понатаму“, објавен од ОМД во октомври 2018 година, достапен на нашата веб-страница со кликнување овде.
Во оваа значајна пригода, додека го славиме Денот на мајката, ОМД упатува срдечни честитки не само до претседателката Силјановска Давкова, туку и до сите извонредни мајки ширум светот. Денешниот ден симболизира не само триумф на родовата еднаквост, туку и доказ за силата и издржливоста на жените лидери насекаде.
Историската победа на претседателката Силјановска Давкова означува ново поглавје во патувањето на Македонија, влевајќи надеж и оптимизам за посветла иднина. ОМД со нетрпение очекува да соработува со нејзината администрација за зајакнување на врските меѓу македонската дијаспора и нашата татковина, поттикнувајќи просперитет и напредок за генерациите што доаѓаат.
Додека ја славиме оваа значајна пригода, да ја потврдиме нашата посветеност на единството, напредокот и трајниот дух на македонскиот народ“, се наведува во реакцијата.
Обединета македонска дијаспора (ОМД) е водечка меѓународна невладина организација која се занимава со интересите и потребите на Македонците и македонските заедници ширум светот. ОМД работи на промовирање на кохезивна глобална македонска заедница.
Македонија
Бугарскиот претседател и премиерот: Не прифаќаме изјави од Северна Македонија што се во спротивност со меѓународните договори
Бугарија не прифаќа изјави и однесувања што се во спротивност со договорот за пријателство, добрососедство и соработка од 2017 година, како и со другите меѓународни договори што ги има потпишано Северна Македонија. Бугарија постојано и јасно го кажува својот став дека договорите мора да се реализираат, наведува во својот став бугарскиот претседател, Румен Радев.
„Европската перспектива на Северна Македонија зависи од строгото спроведување на меѓународните договори во кои таа е страна, како и од преговарачката рамка одобрена од Европскиот совет во јули 2022 година, која нема да се ревидира“, нагласува шефот на бугарската држава.
Реагира и премиерот Димитар Главчев.
„По повод церемонијата на инаугурацијата на новиот претседател на Република Северна Македонија, Бугарија не прифаќа изјави и однесување што се во спротивност и со договорот за пријателство, добрососедство и соработка од 2017 година и во принцип со договорите меѓу Европската Унија и Република Северна Македонија“, се наведува во реакцијата, пренесе „БНР.бг“.
Главчев додава и дека Северна Македонија е земја членка на НАТО, од која произлегуваат соодветните обврски и одговорности.
Новоизбраната претседателка Гордана Силјановска-Давкова вчера предизвика остра реакција и предупредувања од Грција и ЕУ кога при полагањето заклетва како шеф на државата изјави дека ќе го почитува Уставот и ќе ја брани независноста на Македонија користејќи го името што го имаше земјата пред договорот од Преспа со Грција во 2018 година, потсетуваат бугарските медуими.
Македонија
МНР повика на внимателност од државните функционери: Со Грција развивме политички дијалог на високо ниво
Министерството за надворешни работи објави дека ја потврдува цврстата определба на земјата кон недвојбено почитување на уставните одредби, како и сите меѓународно преземени обврски, како што е целосното почитување на договорот за стратешко партнерство меѓу Северна Македонија и Грција, познат како договорот од Преспа.
„Изминативе седум години двете соседни земји развија исклучително високо ниво на политички дијалог, кое резултира и со неколкукратно зголемување на економската соработка и изградбата на позитивни врски меѓу луѓето. Овие придобивки резултираа со членството на земјата во НАТО, отворање на преговорите со Европската Унија, како и со надградба на стратешкото партнерство во стратешки дијалог со САД“, велат од МНР.
Повикуваат на внимателност од страна на сите политички фактори, особено на избраните државни функционери.
Од тука додаваат дека задржувањето на евро-атлантскиот курс на земјата претставува основен стратешки интерес и гарант за долгорочната безбедност и стабилност на земјата.
Новоизбраната претседателка Гордана Силјановска-Давкова на вчерашната инаугурација во Собранието положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција коментирајќи дека се прекршува договорот од Преспа. ЕУ повика на почитување на договорите, кои, како што велат, се неопходни за продолжување по патот во Европската Унија. Утрово, реагира и грчкиот премиер Киријакос Мицотакис, кој рече дека нема да прифатат слични лапсузи.