Македонија
Петровска во посета на компанијата „Актива“, која доби пристап до пазарот на НАТО
Министерката за одбрана, Славјанка Петровска, денеска во Штип ја посети компанијата „Актива“, која од крајот на февруари е впишана во евиденцијата за економски оператори што имаат пристап до НАТО-пазарот.
По обиколката на производствените капацитети на компанијата, министерката Петровска порача дека е импресионирана од процесот на производство и дека вратите до значајниот НАТО-пазар се отворени за сите компании во Северна Македонија.
„Јас позитивниот пример на оваа компанија би го дала како пример и за другите компании во Република Северна Македонија, кои досега не пристапиле до Министерството за одбрана за нивна регистрација на НАТО-пазарот да го искористат како успешен пример, се разбира, тоа да го направат, а конкретно на компанијата ѝ посакувам во наредниот период да биде и учесничка на НАТО-пазарот и во кратко време да нè извести за позитивно склучен договор во алијансата“, рече министерката.
Петровска ги истакна големината на НАТО-пазарот и можноста компании од разни сектори, кои ги исполнуваат стандардите и критериумите, да учествуваат и порача дека во идниот период преку испраќање свој претставник во НАТО – Агенцијата за набавки, Министерството за одбрана ќе продолжи да им ја дава сета потребна поддршка на компаниите.
„Свесни сме дека тој НАТО-пазар е предизвикувачки и бара исполнување високи стандарди и критериуми, меѓутоа, се разбира, затоа се тука и државата, Владата, министерствата соодветно да го поддржат тој процес“, заклучи министерката.
Сопственикот на компанијата, Иле Николов, истакна дека можноста за учество на компанијата на НАТО-пазарот отвора една нова визија во нивниот производствен програм.
„Цениме дека покрај досегашните сериозни партнери кшто ги имаме од Европа и пошироко и овој сегмент, кој сега го добивме како сертификат, за да можеме да присуствуваме на тендерите, ќе биде уште една можност да се докажеме и на овој пазар и се надевам дека со нашиот производен програм ќе можеме да се вклучиме во делот на потребите за НАТО-индустријата“, рече Николов.
„Актива“ е компанија со високи стандарди од металопреработувачката индустрија, има повеќе сегменти во своето работење, од кои два се издвојуваат, а тоа се металните конструкции, како изградба на фабрички хали и производство во автомобилската индустрија, како и во индустријата за градежни машини.
На почетокот на март Министерството за одбрана организира НАТО-индустриски ден, на кој генералната менаџерка на НАТО – Агенцијата за поддршка и набавки, Стејси Камингс, и шефицата за набавки во НАТО – Агенцијата за комуникации и информации, Џенифер Аптон, со своите тимови во детали го објаснија процесот на учество на тендерите на НАТО.
Досега 44 македонски компании се впишани во евиденцијата на економски оператори, кои може да учествуваат на овој пазар, a две компании, кои имаат учествувано на тендери на НАТО, имаат добиено три поединечни договори – два договора за компанија во градежниот сектор и еден договор за компанија во секторот – организација на настани.
Секоја година по членството во НАТО забележано е зголемување на интересот на македонските компании за упис во евиденцијата за економски оператори. Ако во 2021 година впишани се 8 компании, а во 2022 – 11, минатата 2023 – 21 компанија биле внесени во оваа евиденција, а само во првите два месеца годинава бројот на компании е 4.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Маричиќ: Европската интеграција на Северна Македонија е важен стратешки план и приоритет за државата и за сите граѓани во неа
Првиот заменик-претседател на Владата за европски прашања, Бојан Маричиќ, денес одржа средба со амбасадорот на Република Унгарија, Андраш Клајн, заменик-амбасадорката Кристина Тиханји и претставникот Золтан Марки.
На средбата унгарската делегација ги презентира приоритетите на унгарското претседателство со цел зајакнување на процесот на европските интеграции во претстојниот период. Унгарија претседава со Советот на Европа од 1 јули 2024 до крајот на годината.
Маричиќ со заложба дека европеизацијата на државата мора да продолжи со засилен тек ја истакна важноста од носење важни одлуки за понатамошно реализирање на стратешките цели на Северна Македонија и регионот.
Aмбасадорот Клајн се заблагодари за досегашниот успех и постигнатите резултати од процесот на евроинтеграција, скрининг-процесот, почнувањето на преговорите за државата и комплетната подготовка за реализација на европската агенда на државата.
„Европската интеграција е важен стратешки план и приоритет за државата и за сите граѓани во неа“, истакна Маричиќ.
Македонија
Давкова официјално ќе го применува уставното име, а во јавните настапи има право да каже Македонија како чин на самоопределување, велат од нејзиниот кабинет
Во своите јавни настапи македонската претседателка има право да го употребува името Македонија како чин на лично право на самоопределување и самоидентификација почитувајќи ги основните човекови права и слободи и во согласност со европските вредности и начела, велат од Кабинетот на претседателката Гордана Силјановска-Давкова.
Од тука наведуваат дека Давкова ќе се придржува до официјалната примена на уставното име. Во согласност со Уставот, како што беше подготвена од службите на Собранието, свечената заклетва беше потпишана со користење на уставното име.
Македонските институции во последните 5 години речиси целосно ги исполнија обврските од преспанскиот договор и претседателката очекува сите македонски партнери да ги почитуваат билатералните и мултилатералните обврски, кои ги презеле кон земјата.
Македонија
Во важечкиот Изборен законик стои Македонија во делот на свечената изјава – Каракамишева вели дека Силјановска го кажала она што било напишано
Во важечкиот Изборен законик, со прочистен текст во март оваа година, во делот на свечената изјава стои Македонија, а не Северна Македонија.
Професорката по уставно право и политички систем, Тања Каракамишева, на социјалните мрежи го објави делот од Изборниот законик со коментар дека новата претседателка Гордана Силјановска-Давкова го кажала името на државата во свечената изјава, онака како што стои во текстот.
„Член 123 од важечкиот Изборен законик го содржи текстот на свечената изјава што претседателката на Македонија, проф. д-р Гордана Силјановска-Давкова, требаше да го каже во својата заклетва и го кажа“, пишува Каракамишева.
Во членот 123 стои: „Изјавувам дека функцијата претседател на Република Македонија ќе ја вршам совесно и одговорно, ќе ги почитувам Уставот и законите и ќе ги штитам суверенитетот, територијалниот интегритет и независноста на Република Македонија“.
Вчера, претседателот на Собранието, Јован Митрески, во читањето на текстот на свечената изјава државата ја именува Севрена Македонија по што Силјановска повторуваше, но без делот Северна.
Грција и ЕУ реагираа дека уставното име мора да се почитува во согласност со договорот со Грција.