Македонија
Основната плата на полицајците е 16.300 денари, објави Синдикатот на полицијата и побара покачување од најмалку 15 отсто

Синдикатот на полицијата во Македонија (СПМ), кој се разликува од Македонскиот полициски синдикат (МПС), денес повторно јавно побара од министерот за внатрешни работи, Оливер Спасовски, зголемување на платите на полицајците за најмалку 15 % и објави дека основната плата на полицаецот е 16.300 денари. Орце Коцевски, претседател на Синдикатот, побара покачувањето на платите за полицајците да биде од овој месец и го обвини МПС за саботирање на процесот за зголемување.
„Бидејќи самонаречениот и самопрогласен за единствен, МПС, толку помпезно си молчи за ова прашање и со измислениот нивен збор ‘социјален дијалог’ не прават ништо за ова прашање, како Синдикат претходно јавно побаравме да го објават износот на основната плата за да дознаат нивните членови колку е основната плата на полицаец во МВР. Но, одговор не добивме до денес и веројатно нема да добиеме затоа што износот на основната плата на полицаец во моментот е ни помалку ни повеќе, туку 16.332 денара. Паралелно на тоа, ‘единствениот’, како што знае да се претставува само пред министерот, за да купи време и да ја скрие својата неспособност, од неодамна излезе со манипулативно барање пред Комисијата за финансирање и буџет во Собранието на Република Македонија за наводни 20 % зголемување на платата. Јавноста и вработените треба да знаат дека правото на покачување на платите во МВР единствено и во согласност со законот го има министерот за внатрешни работи. Со самото тоа очигледен беше обидот на МПС со нивниот претседател за намерно саботирање на процесот за зголемување на платите бидејќи очигледно не е во полза за нив.
Денес, како Синдикат, до министерот јавно испраќаме барање од јануари 2024 година платите на сите вработени во МВР да бидат зголемени за 15 %“, вели претседателот на Синдикатот, Коцевски.
Тој уверува дека МВР може да ги покачи платите на полицајците од сопствениот буџет оти во моментот има пари за повисоки плати.
Коцевски нагласи дека не се откажуваат од нивното првично барање еден бод да биде платен по едно евро.
„СПМ во ниту еден момент не се откажа од барањето за 1 евро 1 бод, па нема ни сега. Но, мораме да се движиме со постојните можности и ќе продолжиме да го бараме тоа и да се надеваме дека во блиска иднина некој министер реално ќе може да го согледа тоа и ќе го претвори нашето барање за 1 евро 1 бод во реалност, која полицаецот апсолутно ја заслужува. ‘Да направиме од професијата полицаец една професија што ќе биде вреднувана во општеството, а особено во нашата држава. Зар не се тоа ваши зборови, господине Спасовски?“, рече Коцевски и најави дека во борбата за покачување на платата на полицајците не е исклучена можноста да го искористат и правото на штрајк.
Тој не сакаше да ги коментира тврдењата на министерот и дека платата на полицајците изминативе години е покачена 35 %, но рече дека полицајците пред неколку години живееле многу подобро отколку сега со тоа покачување.
Марјан Кицев, пак, претседателот на Македонскиот полициски синдикат, чии членови се далеку помногубројни од Синдикатот на полицијата во Македонија, во новогодишното обраќање го потсети членството дека во 2023 година во два наврата имало покачување на платите од 10 % и линеарно покачување од 2.000 денари за сите вработени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче до Мицкоски: Прочитан си како буквар, не направи ниту една реформа во судството, не те интересира правда

„Јавно ги прашувам ВМРО-ДПМНЕ и Мицкоски, до кога Венко Филипче и СДСМ ќе им бидат криви што не можат да спроведат ништо, ниту една реформа, ВМРО-ДПМНЕ веќе е очајно кога зборува за судството“, рече претседателот на Социјалдемократскиот сојуз на Македонија, Венко Филипче.
„Година и пол наназад поставуваат свои судии, свои обвинители и само го партизираат судството. Нема ништо суштински од спроведувањето на реформите. Јас бев тој којшто понудив рака бев на состанок кај примерот да направиме заеднички работни групи да се спроведе реформската агенда досега не е донесен ниту еден реформски закон од сферата на правосудството“, рече Филипче.
Во изјавата тој додаде дека од вкупно 12 закони кои што требаше да се донесат оваа година, седум од нив до јуни 2025 година и уште пет до крај на годинава – ниту еден, не само што не е донесен, не е ниту поднесен од страна на министерството за правда во Собранието, додаде Филипче.
Очигледно е како што кажа Филипче дека ВМРО-ДПМНЕ сака да го контролира судството.
„Не може партиски портпароли да кажуваат кој треба да биде зад решетки, тоа треба да го каже независно и целосно функционално судство. Тоа го бараат граѓаните.
Сакам да им порачам дека се прочитани како буквар. Еднаш граѓаните тој филм го гледаа со партизирано судство кога го користеа да се закануваат да го користат политички, да го користат како инструмент за политички прогон. Репризата во филмот ниту некој сака да ја гледа, ниту пак поминува и сметам дека граѓаните треба да ги казнат на изборите за ова однесување“, изјави Филипче.
Македонија
За формирање многудетно семејство потребен е достоинствен приход, Мицкоски ги уништи приходите, велат од СДСМ

Додека Мицкоски продолжува да ги убедува граѓаните дека треба да имаме многудетни семејства, неговата Влада прави сè за да не им го овозможи тоа. Мицкоски, кој доаѓа од високата класа и има часовници од 60.000 евра и бизнис од 10 милиони евра, не може да разбере дека за одгледување на повеќе деца се потребни пари и услови, реагираат од СДСМ откако премиерот Христијан Мицкоски кажа дека формирањето многудетно семејство е највисок патриотски чин.
Од СДСМ прашуваат, знае ли Мицкоски дека според последните статистики дури 22% од децата живеат во сиромаштија?
„Наместо да работи на политики за зајакнување на стандардот, покачување на платите, обезбедување поддршка за мајките и жените, наместо да се бори со конкретни механизми за да ги мотивира младите брачни парови да имаат деца, тој им беседи за патриотизам.
На Мицкоски треба да му е јасно дека сите сакаат деца, но за да се имаат повеќе деца потребно е родителите да се чувствуваат сигурни, со стабилни приходи и да живеат во перспективна држава. Ништо од тоа не е Македонија на Мицкоски во овој момент.
Граѓаните се иселуваат, перспективата не постои, платите не растат, економијата тоне. Владее несигурност како никогаш досега. Улиците не се безбедни, има убиства секој ден. Во ваква држава, џабе се пораките на Мицкоски за патриотизам“.
Патриотизам, како што оценуваат од опозициската партија, е да се бориш за луѓето, за секое семејство, да ги покачуваш платите, а не да ја штитиш олигархијата.
Македонија
Шукова: „Вардариште“ ќе стане современа претоварна станица, а не дива депонија

Кандидатката за градоначалник на Скопје од СДСМ, Каја Шукова, денеска изјави дека Вардариште ќе добие конечно и трајно решение како дел од планот за Скопје без диви депонии.
„Вардариште мора да се затвори како дива депонија и да се уреди како претоварна станица по европски стандарди,“ истакна Шукова.
Таа нагласи дека изминатите четири години на оваа локација не биле преземени никакви интервенции, што резултирало со сериозни еколошки и здравствени последици за граѓаните.
Во нејзината програма е предвидено Вардариште да се огради и обезбеди со 24/7 чуварска служба, да се исчисти и уреди, да функционира како регуларна претоварна станица со селекција на отпад и да биде дел од интегриран систем за управување со отпадот во Скопје.