Македонија
Отворен групен дом за лица со попреченост во Скопје

Градоначалникот Петре Шилегов, министерката за труд и социјална политика, Мила Царовска, претседателот на Сојузот на специјални едукатори и рехабилитатори, Горан Петрушев, и директорката на Специјалниот завод Демир Капија, Александра Велковска, денеска присуствуваа на отворањето на групен дом во Скопје, во кој се сместени деинституционализирани лица од Специјалниот завод Демир Капија.
Градот Скопје се вклучува во поддршката на лицата со најтежок облик на интелектуална попреченост или комбинирани пречки кои се дел од овој групен дом и преку соработката со Сојузот на дефектолози обезбедува 24-часовна нега од негуватели.
„Упатувам благодарност до Министерството за труд и социјална политика зашто го внесовме нашето општество во еден сосема поинаков циклус – деинституционализација на лицата со потешка интелектуална и физичка попреченост. За Градот Скопје, кој учествува во овој проект, е предизвик повеќе, затоа што секој човек има право на топол дом и домашна атмосфера. Суштината е овие лица да ги донесеме во локалната заедница од каде што потекнуваат, со цел заедно со специјализираните едукатори да ја почувствуваат таа топлина зашто тоа се стандардите кон кои тежнееме. Нам секој човек ни е важен, секој човек има право на нормални услови за живот и за развој. Токму ваквите дневни центри се начинот на којшто институционализирањето на овие лица како еден целосно застарен систем конечно ќе го снема од нашата држава и заедно со граѓанските асоцијации, заедно со специјализираните лица за кои помагаме да се стекнат со потребните квалификации да овозможиме сосема поинаква грижа и социјална заштита. Чекор по чекор ги решаваме проблемите кои со години беа напластени“, рече денеска градоначалникот Шилегов.
Групниот дом за лицата со потешка интелектуална и физичка попреченост е сместен во центарот на градот, во близина на Католичката црква.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поддршка од министерот за правда за Пандов чијашто куќа беше запалена: „Случајот бара одлучна акција“

Министерот за правда Игор Филков најостро го осудува палењето на куќата на директорот на Управата за извршување на санкции, Александар Пандов и бара одлучна акција во која ќе се утврдат причините и најстрого казнат можните сторители.
„Најостро го осудувам палењето на куќата на директорот на Управата за извршување санкции, Александар Пандов. Му давам целосна поддршка во неговата истрајност и борба против криминалот и корупцијата. Овој случај како и неколкуте други случаи поврзани со лицата вработени во УИС и затворите, бараат одлучна акција во која ќе се утврдат причините и најстрого ќе се казнат можните сторители“, вели Филков.
Директорот на Управата за извршување на санкции, Александар Пандов, претходно, на социјалните мрежи објави дека му бил запален домот. Нема да не запрат и нема да не поколебаат, напиша тој.
Македонија
Кирков: Вработените во ЗОО последно земале февруарска плата

До Стефан Кирков, којшто е член на Советот на Град Скопје, пристигнала молба од вработените во скопската Зоолошка градина и барање за реакција и помош. Го известиле дека последна плата која ја земале е фебруарската плата и одтогаш немаат никакво примање.
„Веќе сме мај, а овие вработени се оставени без примања и навистина сум запрепастен до каде ќе се оди со непрофесионалноста во ова раководство на Градот и кадрите кој ги поставува?! Вработените од утре ќе бидат и без здравствено осигурување !!! Поминаа празници како 8ми Март, Рамазан Бајрам , Велигден на праг е и 1ви Мај а вработените се оставени и заборавени замислете да им се исплати плата !!! Цели фамилии страдаат од нечија непрофесионалност!“, напиша Кирков на социјалните мрежи.
Тој ги проѕва Град Скопје , Данела Арсовска и Зоран Попов сигнализирајќи и дека состојбата може да доведе до протести.
Македонија
Реконструкција на водоводна мрежа и проширување на мостот на Маркова Река, најави Општина Аеродром

Општина Аеродром најави дека во наредниот период започнува со целосна реконструкција на водоводната мрежа на улица 2 во Долно Лисиче, а исто така се започнува и реализација на проектот за проширување на мостот на Маркова Река што ги поврзува Долно и Горно Лисиче.
Тендерските постапки и за двата проекта се во финална фаза и се очекува наскоро, по нивното комплетирање да се почне со реализација на терен.
„Водоводната мрежа на улица 2 во Долно Лисиче за првпат од нејзината изградба добива целосна реконструкција при што старите и дотраени цевки ќе бидат заменети со нови и пошироки инсталации во должина од околу 1 300 метри. Со ова конечно се става крај на повеќедеценискиот проблем со водоснабдувањето што го имаат жителите во овој дел од Аеродром“, соопштија од Општината.
Наредниот период Општина Аеродром започнува и со реконструкција и проширување на мостот на Маркова Река, меѓу Горно и Долно Лисиче.
„Мостот се наоѓа на многу фреквентна сообраќајница и токму заради зајакнување на безбедноста во сообраќајот се врши реконструкција со проширување на овој мост, со што би се добило побрз проток возилата, но она што е уште позначајно е дека ќе се зголеми и самата носивост на објектот“, се наведува во соопштението.
Реконструкцијата на водоводната мрежа и на мостот,додаваат од таму, се два капитални инфраструктурни прокета од витално значење, особено за жителите на Долно и на Горно Лисиче, и се финансиски поддржани од Владата.
Вкупната вредност на реконструкцијата на водоводната мрежа изнесува 15.457.871 денар, додека вкупната вредност на проширувањето на мостот е во висина од 12.066.494 денари.