Македонија
Отворен ден во Центарот за обука на пилоти
На денешниот отворен ден во Центарот за обука на пилоти присуствуваа голем број млади граѓани кои имаа можност да се уверат во капацитетите и условите со кои што располага Центарот и да поразговараат со дел од инструкторскиот кадар, како и со завршените кадети и пилотите од воздухопловната бригада.
„Горд сум што денес на овој отворен ден можам да кажам дека Армијата на Република Македонија ќе се збогати за уште три нови пилоти. Нема поголема инвестиција за секој млад човек од инвестиција во неговото образование и вештини што може да ги добие додека е млад. Јас ве повикувам да се пријавите на Конкурсот и да бидете дел од идната класа на пилоти кои ќе бидат дел од АРМ. Да се биде пилот е голема чест и човек мора да биде многу храбар за оваа професија. Ние сме многу горди на нашите храбри пилоти кои се дел од Армијата“, истакна министерот за одбрана, Зоран Јолевски на денешниот отворен ден во Центарот за обука на пилоти во касарната „Страшо Пинџур“.
Тој додаде дека многу голем е предизвикот да се стане воен пилот, секогаш подготвен да го брани територијалниот интегритет на својата татковина, но и да биде од помош за своите сограѓани секогаш и секаде.
Министерот Јолевски упати порака до денешните посетители, млади, мотивирани луѓе со цврсто зацртана цел пред себе – да ги стават на тест своите капацитети и способности како дел од еден од најсофистицираните и технолошки најразвиените Центри за обука на пилоти во Европа. „Центарот за обука на пилоти кој е уникатен и капитален проект на Владата, заедно со партнерот од Израел, компанијата Елбит системи, ви нуди несекојдневна можност да завршите обука за воен пилот и да станете дел од Армијата на Република Македонија. Користејќи најсовремени методи во обуката, со искусни инструктори од земјава и од Израел, Центарот за обука на пилоти ќе ве воведе во сите тајни на пилотската професија“, рече Јолевски.
Директорот на Центарот, Јаари Шрага во своето обраќање најнапред упати честитки од негово и од име на целиот персонал на Центарот за обука на пилоти до кадетите Виктор Бојковски, Љубомир Панев и Никола Силигунис за успешно завршената осумнаесет месечна обука и им посака многу успех во новата професија како воени пилоти. Во пораката до идните пилоти тој додаде дека овој Центар ја нуди уникатната можност да се едуцираат и да се квалификуваат како професионални пилоти и дека ова е можеби единствената работа каде професијата и хобито се споени.
Во рамки на денешниот ден беа доделени сертификати за завршена обука на петтата класа кадети во Центарот. Кадетот Никола Силигунис во име на тројцата кадети кои ја завршија обуката упати благодарност на целокупниот персонал кој бил извор на поддршка и мотивација и до сите инструктори кои несебично ги споделувале своите искуства и знаење со цел пронаоѓање на патот до небесните височини./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

