Македонија
Охрид очекува нов градоначалник во април заедно со претседателските избори

Вработените во Општина Охрид очекуваат нов градоначалник да добијат заедно со претседателските избори во април в година. Делегација од Општина Охрид денес ја почна процедурата, која треба да доведе до нови локални избори.
„Лично на рака, денес, делегацијата од Охрид, ќе го достави известувањето за смртта на градоначалникот и новата состојба во Општината во Министерството за локална самоуправа. Известувањето се носи на рака за да ги скратиме роковите, законски се предвидени 15 дена, но ние тоа ќе го направиме денес за да можеме што побргу да избереме вршител на должноста градоначалник кој ќе биде овластен потписник. Заменик-градоначалникот нема овластување, па во моментот нема кој да потпише ниту плата за вработените“, велат од Општина Охрид.
Тие се свесни дека најмалку еден месец ќе им доцни платата и покрај напорите да ги скратат роковите. Законот за локалната самоуправа предвидува, кога ќе го добие известувањето, Министерството за локална самоуправа во рок од 15 дена да достави известување до Владата, која во рок од 30 дена од приемот на известувањето треба да констатира дека мандатот на градоначалникот престанал и истовремено да иницира постапка за распишување нови избори.
Од денот на објавување на одлуката на Владата, Советот на Општина Охрид во рок од 30 дена треба да избере еден од членовите на Советот што ќе ја врши должноста градоначалник за периодот до изборот на нов градоначалник. Тој ќе биде овластен потписник.
Од Охрид велат дека се согласни за вршител на должноста да го предложат сегашниот заменик-градоначалник Константин Георгиевски и очекуваат изборот да се биде веднаш по новогодишните празници бидејќи во разговори со претставници од Владата добиле ветување дека нема да се чекаат максимално предвидените законски рокови, туку ќе се настојува процедурата да заврши побргу.
„Владата ќе направи сè што е во рамките на својата можност за да не бидат доведени во неповолна состојба вработените во Општина Охрид. Законските процедури предвидуваат рок од шест месеци, сега треба да се констатира состојбата формално-правно од страна на Министерството за локална самоуправа, потоа Владата да го информира Собранието и Собранието во координација со ДИК да го почне процесот за нови избори во Охрид. Не би можел во моментот да прецизирам конкретен рок, но ова е постапката“, вели Миле Бошњаковски, портпарол на Владата.
Од Министерството за локална самоуправа најавија дека известувањето веднаш ќе го испратат во Владата и ќе бараат тоа да се најде на дневен ред на следната владина седница.
„Министерството за локална самоуправа ќе постапи во законскиот рок веднаш по добивањето и на формалното известување од Општина Охрид со цел да се обезбедат законските услови за нормално извршување на функциите на Општината“, велат од Министерството за локална самоуправа.
Освен за општина Охрид, процедура за нови градоначалнички избори е почната и за Ново Село и Дебар. Ново Село остана без градоначалник бидејќи Боро Стојчев, осуден на шестмесечна затворска казна за шверц на цигари, си поднесе оставка на почетокот на октомври. Без градоначалник е и општина Дебар по смртта на градоначалникот Ружди Љата.
„За општините Ново Село и Дебар од страна на Министерството за локална самоуправа е почната постапката за констатирање престанок на мандатот на градоначалникот по сила на законот, што значи дека Владата е известена во законски утврдениот рок дека настапил еден од случаите наведени во Законот за локалната самоуправа, чл. 54, став 1, врз основа на што Владата констатирала престанок на мандатот и се почнати другите законски дејства, со цел да се создадат услови за распишување нови избори за градоначалник на овие општини. Одлуките на Владата, со кои се констатира престанок на мандатот на градоначалниците во овие две општини, се објавени во ‘Службен весник на РМ’ од 4 декември“, велат од Министерството за локална самоуправа.
Во Државната изборна комисија сè уште не се размислува дали изборите за градоначалници ќе бидат заедно со претседателските избори.
„Претседателот на Собранието треба да донесе одлука за распишување избори за градоначалник, па тогаш да почнат сите дејства“, изјавија од Државната изборна комисија за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бујар Османи најави механизми за ефикасност „Чаир 48“ и јавно табло

Кандидатот за градоначалник на Чаир, Бујар Османи, денеска пред зградата на општината излезе со пакет механизми, меѓу кои јавно табло со неделен план и статус на задачи, проект „Чаир 48“ за одговор/решение на пријави во рок од 48 часа, вторник како „отворен ден“ без закажување, брза комунална екипа и јавен календар на средби и одлуки на општината.
„Оваа рамка директно го погодува коренот на проблемот кој со години ја следи општината: неефикасност, слаба координација меѓу службите и отсуство на видливи рокови. Граѓаните ретко знаат кој е задолжен за конкретен проблем, кога ќе биде решен и зошто доцни. Јавното табло, ако навистина се ажурира редовно и прецизно може да внесе најосновна, но пресудна промена: дневна видливост на работата“, велат од ДУИ.
Се додава дека воведувањето рок од 48 часа за „мали“ комунални интервенции (дупки, улично осветлување, отпад, небезбедни точки) е амбициозен зафат. Во пракса, ваков стандард бара дисциплина во прием и класификација на пријавите, доволно екипи на терен и резерви во буџетот за брзи поправки. Добро е да се разграничат активностите на општината меѓу „брзи“ или интервентни и „капитални“ работи и во таа насока ова е добра идеја.
„Отворен ден“ без закажување и јавен календар на активностите се чекори што веќе постојат во некои општини, но ретко функционираат доследно, велат од ДУИ.
Клучно ќе биде, дали градоначалничкиот кабинет навистина ќе биде достапен секој вторник, дали ќе има протокол за следење на случаите што ќе стигнат тој ден и дали ќе се објавуваат резимеи/исходи за јавноста. Во спротивно, и ова може да се претвори во уште еден симболичен гест, но Османи го ветува спротивното.
Во говорот, Османи најави и утрински брифинзи со службите секој работен ден во 07:30 часот, со јавно објавување на дневниот план.
Македонија
МВР: На ниту еден граѓанин не му беше скратено правото да присуствува на вчерашниот протест во Кочани

Министерството за внатрешни работи реагира со демант по објавите во дел од порталите и на социјалните мрежи дека наводно полицијата вчеране дозволила влез на граѓани во Кочани, кои сакале да учествуваат на протестот „Маршот на ангелите”. Напротив, велат од МВР, ниту еден граѓанин не беше спречен да влезе во Кочани.
„Со цел остварување на своите законски надлежности, меѓу кои и безбедно одвивање на протестот „Маршот на ангелите” на 15.08.2025 во Кочани, СВР Штип вршеше редовни контроли на сообраќајот (возила и возачи) на подрачјето на СВР Штип, вклучувајќи го и градот Кочани. Но, на ниту еден граѓанин на кој му беше извршена редовна сообраќајна контрола, не му беше скратено правото на слободно учество на протестот „Маршот на ангелите” и не е задржан повеќе од нормално потребното време за вршење на полициска контрола“, велат од МВР.
Апелираат да не се шират дезинформации со кои се вознемируваат граѓаните.
Македонија
ВМРО-ДПМНЕ: Фрчкоски добил 200 илјади евра од Еразмус+, наместо младите

ВМРО-ДПМНЕ обвини дека пари од програмата Еразмус+, наменети за образовни проекти за младите, завршувале кај поединци блиски до СДСМ.
Во денешното соопштение од партијата се наведува дека преку Агенцијата за европски образовни програми и мобилност, со која раководела Лидија Димова, биле доделени 200 илјади евра на проект на професорот Љубомир Фрчкоски.
„Димова и Зоран Заев со пари од Еразмус+ си ги плаќаа послушните и подобните кои требало да им завршат некоја работа или пак јавно да ги бранат. Покрај што со пари од агенцијата, преку Лазар Нанев, Заев си ја купуваше слободата исто така си ги плаќаше и неговите идеолози и јавни поддржувачи“ се наведува.
Од ВМРО-ДПМНЕ тврдат дека Еразмус+ бил користен за „плаќање судии, професори и експерти блиски до власта“ и дека тоа е уште еден пример за, како што велат, злоупотреба на институциите за партиски интереси.