Македонија
„Охрид СОС“: Повторно матно ќе се легализираат дивоградби на атрактивни локации покрај езерото

Општина Охрид повторно матно ќе легализиција дивоградби на атрактивни локации, соопшти невладината организација „Охрид СОС“. Според неа, бидејќи Општина Охрид не е транспарентна и Советот не работи во име на жителите на Охрид и ниеден документ за ниедна седница не е јавно достапен на увид, барем седум дена пред седницата на интернет-страницата на Општината, морале сами да пребараат низ АКН ГИС-системот на Агенцијата за катастар за да видат за што се работи и кои парцели се предложени за легализација на следната 26. седница. Во продолжение ви го пренесуваме нивното соопштение интергрално:
„На страницата на Општината стои само едно соопштение со точките на дневен ред, ништо повеќе. Единствено советниците добиваат некои материјали, но и тие не ги споделуваат со своите гласачи. Останува на седница само да гласаат ‘за’ или ‘против’ и нештата да се донесат.
Во продолжение ставаме на увид за што ќе гласаат, меѓу другото, (односно што треба да легализираат) советниците на ВМРО-ДПМНЕ, СДСМ и на ДУИ. Во описот на секоја слика е наведено под која точка е на дневен ред и за која локација, односно катастарска парцела, се работи, без податоци за тоа што се легализира. Зачудува како земјиште во сопственост на Република Македонија, во Трпејца, кај автокампот „Андон Дуков“, во Велестово, и на други локации каде што нема изградени објекти, се става во категоријата вклопување бесправно изградени објекти, а уште повеќе, некои од катастарските парцели се наоѓаат на самиот брег на Охридското Езеро и во Националниот парк Галичица, на атрактивна местоположба. Се сеќаваме на повлечената точка од дневен ред за месноста Градиште, само пред два месеца, каде што се подготвуваше слична операција имајќи предвид, дополнително, дека тука сè уште не е завршен процесот на денационализација.
Зошто не смее да се легализира
• Некои од локациите се во рамките на НП Галичица и на самиот брег. Дали е добиена согласност од ЈУНПГ и МЖСПП и дали точно знаеле што одобруваат?
• Не се наведува големината на објектите што се легализираат, а некои од парцелите се со големина од илјадници квадратни метри, па дури и 6 хектари во Трпејца, така што воопшто не се знае што се легализира;
• Се легализира на парцели, кои според катастарската евиденција воопшто не се водат како градежно земјиште; некои се во државна сопственост. Државата сама посегнува кон нелегално градење и ги прекршува сопствените закони?
• Барем на една од парцелите нема изградени објекти. Што тоа се легализира? Дали локалната издава бланко-карта (carte blanche) за легализација уште пред да биде изградено за потоа да се гради кој, како и колку сака, можеби да се оттуѓи земјиштето по повисока цена и да се овозможи лесна урбанизација.
• По инцидентот со легализацијата во Градиште пред само 2 месеца и повлекувањето на точките од дневен ред, в.д. градоначалникот Константин Георгиески најави ревизија на сите плански документи и посочи дека во општината „правиме сè да ги спречиме несовесното однесување и бесправното градење“. Дали овие точки на дневниот ред за 26 .седница се уште една грешка со многу поголеми последици?
• Некои од предвидените легализации се однесуваат на Горица Север, која треба да биде заштитна зона на Студенчишкото Блато, што е во постапка за прогласување споменик на природата. Дали со легализација на објекти токму тука се сака да се попречи заштитата на Блатото и да се оневозможи да се заштити во неговата реална големина?
Легализацијата се коси со обврските кон УНЕСКО. Во согласност со барањата од реактивната мисија на УНЕСКО од април 2017 вклучени во препораките 41 COM 7B.34 од истата година, македонската влада имаше обврска да направи инвенторизација на сите нелегални градби во рамките на доброто на УНЕСКО; да се изработи оцена за влијанието врз животната средина (ОВЖС/EIA) и оцена за влијанието врз културното наследство (ОВН/HIA), кои ќе го проценат влијанието на нелегалните градби врз ИУВ (исклучителената универзална вредност) на доброто; да ги отстрани сите нелегални градби, особено во НП Галичица според процените на старешката оцена и да загарантира ригорозна примена на законите и регулативата со цел да оневозможи какво било натамошно нелегално градење во рамките на доброто.
Владата во акцискиот план кон извештајот за напредокот во спроведување на препораките од февруари 2018 си зададе задача со рок до ноември 2018 да направи детален инвентар на нелегалните градби. Тоа, се разбира, не се случи, Владата не го испочитува ни планот што самата си го зададе, а следствено не се реализирани ни другите барања. Во извештајот за напредокот во спроведување на препораките од 30 ноември 2018 Владата несмасно посочува дека за градбите што се легализираат, мислење, односно одобрение, дава надлежна установа за заштита на културното наследство, што не е институција што може да направи процена за влијанието врз природното наследство, а секако отсуствува и гореспоменетата неопходна оцена (ОВЖС).
Да нема забуни, иако Владата дава отчет пред Центарот за светско наследство на УНЕСКО, задачите што се во доменот на локалната самоуправа се нејзина обврска. Тоа, секако, ја вклучува урбанизацијата за чие планирање и контрола е задолжена Општината. Тоа е истата Општина Охрид која во 2017 немаше чуено за Препораката бр. 6 за мораториум на урбанизацијата, во летото 2018 сметаше дека прогласувањето мораториум не е во нејзина надлежност за во ноември 2018 да се пофали дека мораториум, всушност, имало бидејќи од ноември 2017 Општината не усвоила нови урбанистички планови. Иако во меѓувреме, само во 2018 до комисијата за Охридскиот Регион беа поднесени десетици барања за урбанизација. Се разбира, продолжија и издавањето дозволи и градењето, помали измени на урбанистички планови, но најфрапантно продолжија изградбата и легализацијата на дивоградбите.
Во реалноста, не само што мораториум не постои туку легализацијата на дивоградбите, што по дефиниција значи кршење на законот, односно незаконско градење, е дрско постапување токму во спротивност не само на препораките на УНЕСКО туку и со законите во земјата. Таа води кон урбанистички хаос, неконтролирана урбанизација, го нарушува планскиот развој и е директно врзана со деградацијата на Охридското Езеро, односно еутрофикацијата на водите. Со тоа Општина Охрид и Владата демонстрираат основно наразбирање за заканите по природното наследство на Охридскиот Регион и свесно го водат единственото УНЕСКО-добро на Македонија на листата на загрозени подрачја за што Комитетот за светско наследство треба да се произнесе оваа година.
Затоа, бараме отфрлање на точките и запирање на легализацијата. Приоритетно да се изготват детаљниот инвентар на нелегални градби, оцената за влијанието врз животната средина и да се постапи по препораките на УНЕСКО. Да се пристапи кон отстранување на градбите за кое е проценето дека штетно влијаат на ИУВ на доброто и за запре легализацијата сè додека не се изработи планот за управување со Охридскиот Регион. Повторно ја потсетуваме Општина Охрид да работи транспарентно и во интерес на трајно зачувување на вредностите на регионот.
Податоци за спорните парцели
КП 1499, КО Трпејца – точка 43. Предлог-одлука за утврдување потреба од донесување урбанистичко-планска документација, со цел вклопување на бесправно изградениот објект на КП бр. 1482 и 1499 КО Трпејца.
Ледина на запад од централното јадро на селото, неизградена, во сопственост на Република Македонија. Огромна површина, веднаш над езерото. Што треба тука да се легализира и зошто толкава површина? За чиј интерес?
КП 869/1, КО Охрид 4 – точка 55. Предлог-одлука за утврдување потреба од донесување урбанистичко-планска документација, со цел вклопување на бесправно изградениот објект на КП бр. 869/1 и 869/2 КО Охрид 4.
Прва во табелата за сопственост е Република Македонија. Парцелата не е сегментирана, туку е претставена како една целина. Тоа е автокампот „Андон Дуков“. Парцелата е на самиот брег, нема 50 метри од највисокиот водостој, иако брегот треба да е јавен простор.
КП 869/2, КО Охрид 4 – точка 55
Изграден објект, во сопственост на Република Македонија. Не е кажано за каков објект се работи, зошто досега бил дивоградба и токму сега се створила потреба да се легализира. Во рамките е на (обиколен од) КП 869/1 и веројатно би влегол во планот за таа парцела.
КП 866/1, КО Охрид 4 – точка 58. Предлог-одлука за утврдување потреба од донесување урбанистичко-планска документација, со цел вклопување на бесправно изградениот објект на КП бр. 860/1, 860/2, 865/1 и Кп.бр.866/1 КО Охрид 4.
Огромна парцела, многу блиску до брегот. Се забележува напред, на плажата дека е исчистена трската, прекинат е појасот, веројатно некој од локалните сопственици правел отворен простор за чамци, пристап од вода. Дали е и тука брегот приватизиран?
КП 5863/2, КО Охрид 4 (Горица Север) – точка 56. Предлог-одлука за утврдување потреба од донесување урбанистичко-планска документација, со цел вклопување на бесправно изградениот објект на KП бр. 5.863/2 KO Oхрид 4.
Горица Север треба да е заштитна зона за Блатото. Дали сега се легализира за да се отежне или оневозможи заштитата?
КП 645/2, КО Велестово – точка 17. Предлог-одлука за утврдување потреба од донесување урбанистичко-планска документација, со цел вклопување на бесправно изградениот објект на КП бр. 645/1 и КП бр. 645/2 КО Велестово.
Парцелата 645/2 е во сопственост на Република Македонија, нема изграден објект, се води како нива. Кој и зошто ја легализира?“, се наведува во соопштението на „Охрид СОС“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нов удар за СДСМ, Партијата на пензионери преминува кај ВМРО-ДПМНЕ

Уште една партија ја напушта коалицијата на СДСМ. Партијата на пензионери официјално соопшти дека излегува од досегашната коалиција со СДСМ и дека на наредните локални избори ќе настапи во коалиција со ВМРО-ДПМНЕ.
Претседателот на партијата, Илија Николовски, изјави дека одлуката е донесена врз основа на волјата на членството, при што околу 90% од членовите се изјасниле дека сакаат коалиција со актуелната власт.
„Ние како Партија на пензионери досега бевме дел од коалицијата со СДСМ. Водевме дискусија во извршниот и централниот одбор. Од 100 присутни членови, само неколкумина предложија да настапиме самостојно, ниту еден не беше за останување со СДСМ, а дури 90% се изјаснија за коалиција со актуелната власт. Желбата на членството е јасна, да одиме со власта“, изјави Николовски.
Партијата на пензионери ќе учествува на локалните избори со свои листи за советници во неколку општини, а во Карбинци ќе настапат и со кандидат за градоначалник.
„Имаме кандидати и ќе предложиме советник во Штип, во Карбинци ќе имаме и кандидат за градоначалник, а ќе настапиме и во Делчево и Пехчево“, додаде Николовски.
Покрај настапот на локалните избори, партијата најави дека ќе бара и учество во извршната власт на државно ниво – конкретно, министерски и директорски позиции.
Николовски истакна дека очекуваат зголемена вклученост на членството и подобра застапеност на интересите на пензионерите преку зголемен број на советнички места во општините.
Македонија
Јаневска: Учебници на 1 септември, повисоки плати, 7 нови училишта и обнова на студентските домови

Во првата година од мандатот на министерката за образование и наука, Весна Јаневска, се испорачани значајни резултати – учебници на 1 септември, зголемени плати за наставниците и универзитетските професори, изградба на нови училишта и сали, како и темелна обнова на студентски домови.
На денешната прес-конференција во МОН, Јаневска, придружувана од заменик-министерот, државниот секретар и директорите на клучните сектори, порача дека заеднички се поставуваат темелите на модерен, конкурентен и ефикасен образовен систем кој нуди еднаквост, знаење и вистински вредности за сите.
„Недостигот на учебници беше првиот предизвик со кој се соочивме. Го надминавме, и покрај кратките рокови. Испечативме и испорачавме веќе одобрени учебници, а подготвивме и нови наставни материјали за предмети за кои претходно немаше ниту едно помагало. За средното стручно образование печатени се над 100 нови наслови. Учениците имаат и ќе имаат од што да учат“, истакна Јаневска.
Министерката додаде дека веќе се во тек постапките за набавка и печатење на нови учебници за наредната учебна година, вклучително и оние по странски јазици кои недостасуваа шест години.
Посебна благодарност упати до наставниците, кои, како што рече, активно учествувале во сите реформи.
„Одлучивме за етапно, но реално покачување на платите на наставниците во наредните четири години. Веќе добија зголемување над 12%. Универзитетските професори од јануари годинава добија зголемување од 14%“, рече министерката.
Истовремено, наставниците се ослободени од тројно внесување идентични податоци, со што добиваат повеќе време за квалитетна настава.
Во делот на инфраструктурата, Јаневска информираше дека со 2 милијарди денари се градат седум нови училишни објекти, се реконструирани 20, се градат четири спортски сали, а темелно се обновуваат два студентски дома во Скопје. Над 50 училишта ќе добијат фотоволтаици, продолжува изградбата на ФИНКИ и Факултетот за физичка култура, а наскоро ќе започне изградба на кампуси за Универзитетот „Мајка Тереза“ и за Медицинскиот факултет во Штип.
„Од почетокот се залагам за оптимизација на училишната мрежа и воведување на едносменска работа. Тие два процеса ќе овозможат поквалитетна настава, поголема социјализација, заштеда и ефективно реинвестирање. Оваа година 153 училишта работеа во една смена, а наскоро ќе се приклучат уште шест“, рече министерката.
Посебно задоволство изрази од соработката со студентите, кои доставиле 10-тина прифатени предлози за проширување на нивните права и можности.
„Науката ни е во фокусот. Двојно го зголемивме буџетот за научно-истражувачка дејност – 680 милиони денари. Објавивме три повици за финансирање на иновативни проекти и станавме партнери со Истражувачкиот центар на Европската комисија, кој отвори врати за нашите истражувачи. Web of Science и Scopus се достапни бесплатно за сите студенти и вработени на државните универзитети“, додаде Јаневска.
Во изминатата година, Државниот просветен инспекторат и службите на МОН извршиле над 2.000 надзори. Поради непостапување по насоки, затворени се 14 приватни научни институти и школи. По години занемарување, повторно се активирани лекторатите по македонски јазик – шест лектори работат во Хрватска, Словачка, Кина, Италија, Романија и Полска.
Јаневска информираше и за пет нови закони: ангажирање образовни асистенти, поддршка за талентирани ученици и ментори, финансиска помош за наставнички здруженија и организатори на олимпијади, како и за формално образование за лица во казнено-поправни установи и за возрасни ученици кои не посетувале училиште.
„Времето го покажа резултатот од негрижата – деца последни на ПИСА тестирања, универзитети кои ги нема на ранг-листи и научници кои бегаат во странство. Затоа темпото мора да продолжи. Ви благодарам и на вас, медиумите, што ги следите институциите и со критика ни помагате да бидеме поефикасни“, заврши Јаневска.
Македонија
Алиу: Првите термини се веќе резервирани и граѓаните имаат што да кажат, „Отворен кабинет“ стартува силно

Министерот за здравство Азир Алиу ја претстави новата алатка „Отворен кабинет“, која, како што посочи, ќе овозможи директна комуникација меѓу граѓаните и Министерството – без бариери, без бирократија и со човечки пристап.
„Вистинската реформа почнува тогаш кога институцијата престанува да зборува сама со себе и почнува да го слуша народот со отворен ум и јасна намера за промена“, изјави министерот Алиу, нагласувајќи дека новата алатка не е само веб-страница, туку целосна трансформација на односот институција – граѓанин.
Со „Отворен кабинет“, секој граѓанин ќе може директно да закаже средба со министерот секој петок, без никакви формални процедури.
„Првите 15 термини веќе се резервирани. Ова е доказ дека граѓаните имаат што да кажат и конечно имаат каде да бидат слушнати. Јас сум тука да ги слушнам“, порача Алиу.
Според министерот, ова не е само нов сервис, туку јасна порака за визијата што Министерството ја има за здравствениот систем.
„Оваа иницијатива не е само услуга. Таа е став. Став дека здравството не смее да биде затворен систем, туку жив организам што комуницира, што вклучува и реагира навреме“, рече Алиу.
Тој додаде дека граѓаните имаат право на пристапност, транспарентност и одговорност од својата институција.
„Здравство што комуницира, вклучува и реагира, не смее да биде само слоган. Тоа е јавна обврска. Обврска што јас како министер ја прифаќам со целосна одговорност и секојдневно ќе ја исполнувам со работа, отчетност и лично присуство“, изјави министерот.
Алиу посочи и дека приоритет е создавање здравствен систем што се води од податоци, анализа и реалните потреби на граѓаните, а не од политички притисоци или лични интереси.
„Сакаме систем што не се плаши од вистината, не се губи во бирократија и никогаш не го заборава човекот – како причина зашто постои самиот систем“, заклучи министерот.