Македонија
Пак фрчат административни казни за матичните лекари; 15 илјади за грешна шифра иако пациентот го добил лекот што му треба

Казните за кои со поранешниот министер за здравство, Венко Филипче, и поранешниот директор на Фондот за здравствено осигурување, Стево Крстевски, беше ставен мораториум, матичните лекари се жалат дека повторно им стигнуваат. Неколкумина матични лекари добиле казна од 15.000 денари за административен, т.е. немедицински прекршок направен пред неколку години.
„Од Велес веќе двајца колеги се пожалија дека ја добиле истата казна за која се договаравме и со поранешниот министер и со поранешниот директор на Фондот дека треба да се поништи и Фондот повеќе да не казнува за такви прекршоци. Се работи за внесена погрешна шифра на некој рецепт, административно, која не ја менува терапијата за пациентот, тој го добива она што специјалистот напишал дека треба да го добие. На толкав обем на работа не е ни чудо да се згреши шифра, матичните не се роботи, но тоа административно може да се исправи. Токму затоа беше ставен мораториум на ваквите казни за кои има и приговори, но еве колегите веќе се жалат дека повторно ги добиваат и тоа за прекршоци направени пред повеќе од две години“, вели Лилија Чолакова-Дервишова, претседателка на Здружението на приватните лекари на Република Македонија.
На социјалните мрежи матичните лекари споделуваат повици да не се потпишуваат казните, но казнетите лекари велат дека им е преку глава од преписките со Фондот и најавуваат дека ќе ги платат и со душа ќе чекаат да се пензионираат.
Од Фондот за здравствено осигурување најавија одговори на прашањата од „Макфакс“ за казните на матичните лекари во текот на денот.
На сите досегашни протести едно од барањата на матичните беше да се укинат административните казни и да се поедностави начинот на издавање рецепти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ослободена од стапица мечка во Ресенско

Регионалниот ЦУК Битола, известува дека преку Единствениот број за итни случаи 112 во ЦУК била добиена пријава за заробено диво животно како последица од поставена криволовна замка во атарот на помеѓу селата Љубојно и Брајчино (Општина Ресен).
Пријавителот претпоставил во пријавата дека најверојатно се работи за мечка поради гласното рикање што се слушало во непосредна близина на мостот на Брајчинска Река.
„За оваа ситуација, од страна на ЦУК веднаш е известена Гранична полиција Маркова Нога, Полициска станица Ресен, Концесионерот – ловното друштво и други субјекти за понатамошно постапување. По интервенцијата на надлежните служби од Концесионерот -Ловното друштво, со присутен ветринар, од НП „Пелистер“ и од полицајци од МВР мечката е успиена и безбедно ослободена“, соопшти ЦУК.
Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.