Македонија
Парада на гордоста под слоганот „Спектакуларно непослушни“ во паркот „Жена борец“
Петтата по ред Парада на гордоста, Скопје Прајд, годинава ќе се одржи на 22 јуни под мотото „Спектакуларно непослушни!“
Националната мрежа против хомофобија и трансфобија денеска одржа прес-конференција посветена на овогодишното издание на Парадата на гордоста, чија што појдовна точка, како и досега, ќе биде во паркот „Жена борец“, каде во 17 часот ќе започне собирањето на учесниците, а во 19 часот по кратките поздравни говори ќе започне протестниот марш по скопските улици, според истата рута како и минатите години и ќе заврши со културно-музичката програма на стадионот на АРМ во Градскиот парк.
„Со гордост може да кажеме дека минатите четири Паради на гордоста поминаа во најдобар ред, со максимално ниво на безбедност и со ниту еден инцидент за време на парадите, освен два инциденти кои се случија по завршувањето на Парадата. За двата инциденти институциите реагираа навремено, а за едниот беше отворена и постапка што се водеше како кривично дело од омраза, за кое сметаме дека е соодветен одговор од страна на институциите и показател за тоа дека државата сака да ги заштити правата на сите граѓани на оваа држава“,порача Уранија Пировска, извршна директорка на Хелсиншки комитет за човекови права.
Нејзините очекувања се дека и оваа година нивото на безбедност ќе биде запазено.
„Очекуваме дека и оваа година ќе биде обезбедено тоа ниво на безбедност, како и во минатите години. Сега се наоѓаме во една деликатна ситуација бидејќи се’ уште официјално не се завршени изборите, затоа што имаше прегласување на неколку места, а Државната изборна комисија се’ уште не излегла со крајните резултати од изборите и поради тоа се’ уште немаме официјална комуникација со Министерството за внатрешни работи за да ги започнеме подготовките околу Парадата на гордоста од безбедносен аспект. Тоа ќе го сториме кога официјално ќе бидат завршени изборите, но сметам дека и новата владејачка гарнитура ќе сака да покаже дека оваа држава има демократски капацитети, бидејќи успешноста на една Парада на гордоста зборува токму за тоа какви се демократските капацитети на државата и колку институциите ги почитуваат правата на сите граѓани, па и на оние кои што не се мнозинство“,додава Пировска.
Оваа година слоганот на Парадата на гордоста во Скопје гласи „Спектакуларно непослушни!“
„Непослушни затоа што сакаме да ја реафирмираме таа наша опозиција на патријахатот кој не’ владее доста векови. Спектакуларно како едно обележје на самата заедница која е забележителна и како одбележување на јубилејот на петти Прајд. Дури и „Њујорк тајмс“ објави фотографии на првата Парада на гордоста во Скопје и ништо помалку спектакуларно не очекуваме и за овој Прајд. Тој ќе биде еден од најдобрите и најпосетените настани во Скопје како и претходните години“, рече Кочо Андоновски, програмски директор на ЛГБТИ Центар за поддршка и додаде дека говорот на омраза што ескалира после најавата на Парадата само докажува колу има потреба од одржувањето на Скопје Прајд.
Тој додава дека парадата на гордоста е само еден ден во кој ЛГБТИ луѓето можат да бидат видливи, свои и автентични.
„Во нашиот слоган оваа година го одбравме концептот на непослушност, како политички концепт токму затоа што желбата да се живее слободно на ЛГБТИ+ луѓето често пати била обележана како каприц, како претерано барање или како непотребна желба за внимание. Барањето да се живее достоинствено и без насилство не е каприц. Потребата да бидеме видени, да се движеме во јавниот простор, да учествуваме во политичкиот живот- наместо постојано да сме затрпувавани во нашите четири ѕида, не е желба за внимание, туку барање за нашето еднакво место како и на сите други луѓе во ова општество. Можноста ЛГБТИ+ луѓето да ги посетат своите партнери во болница, да го наследат имотот на луѓето со коишто живееле цел живот, да не мора да се соблекуваат до последно парче облека за да го докажат својот родов идентитет- ова се наши основни права. Ако нашата идеја за еднаквост, за достоинство и буквално право на живот е спорно, тогаш ДА, одбираме да бидеме непослушни“, истакна Ангел Димитриевски, извршен директор на ЕКВЛИС и додаде дека се чини дека желбата и отпорот ЛГБТИ+ заедницата да биде замолчена и уште повеќе избришана од јавниот простор се’ повеќе расте.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски поседува часовници од 65 илјади евра – професорска плата или припадност на олигархијата, прашуваат од Левица
Во Анкетниот лист на новиот премиер на Република Македонија се обелодени дека Христијан Мицкоски поседува часовници од над 40 илјади евра и од над 13 илјади евра. Ова откритие предизвикува реакција и загриженост која нè посочува кон отцепеноста на новиот премиер од секојдневните маки кои ги живее населението – наместо човек од народот, повторно со нас владее човек од елитите и послушник на олигархијата, велат од Левица.
„Овие часовници од ултра-лускузниот светски бренд познат по интрикантни рачни изработки се симбол за раскош кој не се совпаѓа со економската реалност во државата. Како државник кој треба да цели кон адресирање на социо-економските предизвици и кон издигнувањето на класно загрозените и маргинализирани групи во општеството, овој избор за екстравагантен моден додаток ни укажува на личните и политички приоритети на Мицкоски.
Дополнително, набавката не претходи на неговиот политички ангажман, туку коинцидира со времето на неговото назначување за лидер на најбогатата партија на континентот – ДПМНЕ. Со него на чело на Владата, па и преку сите министри, имаме јасен приказ дека следува период на нетранспарентност и неодговорност во кој не се очекува борба против сиромаштијата, невработеноста и останатите проблеми кои го распарчуваат нашето општество“, истакнуваат од оваа партија.
Додаваат дека она по кое суштински се разликува Левица од партиите на елитата и олигарсите е воведувањето на данок на луксуз и Закон за потекло на имотот на функционерите – нешто за кое, како што велат не можат да најдат заеднички јазик со луѓето кои имаат „само за цел да се луксузираат и богатат на сметка на народот“.
Македонија
Пензискиот фонд е нерантабилен – партијата Левица вели дека партиските кадри го довеле пред колапс
Веќе еден месец сè погласни се гласините дека ФОНДОТ за ПИОМ е во очајна состојба и дека едвај може да ги исплати пензиите на пензионерите. Според информациите, исплатата на околу 335 илјади пензии е доведена во прашање. За нивна исплата потребни се околу 1,4 милијарда евра, а овие средства ги нема во ПИОМ, заради што околу 530 милиони евра се директна инјекција од државниот буџет, велат од политичката партија Левица.
„Години наназад со Фондот управуваат партиски кадри, чие раководење беше потресено со бројни скандали, што го направи ПИОМ нерентабилен и, буквално, го доведе пред колапс. Последен во низата скандали е оној на Дритан Беџети, кадар на Алтернатива на Африм Гаши, кој во време на своето директорување со Фондот ù исплаќаше кирија на сестра му и вработи стотици луѓе кои земаат плата, без да се појават на работа.
Дополнително во јавноста протече информација дека од Фондот пензија земаат и косовски државјани, кои никогаш не ни работеле во Македонија – скандал којшто надлежните институции мора под итно да го истражат.
Случајно или не, овие информации почнаа да се пласираат масовно во јавноста, непосредно после изборите, каде од партиите на владејачкото мнозинство ветуваа линеарно покачување на пензиите. Наместо ова, во јавноста протече информација за финансиската дупка во ФОНДОТ, додека во медиумите се шири информација за опасност од зголемување на старосната граница за одење во пензија или поточно – жените да одат во пензија на 64, а мажите на 66 години.
Огромен дел од пензионерите живеат на работ на егзистенцијата, додека со пениите тешко е да се подмират сметките и платат лекарствата. Работниот народ заслужува достоинствена пензија!
Како што и претходно пратениците и активистите на Левица ги поддржуваа протестите и барањата на пензионерите, така и сега нема да дозволиме уште едно поткусурување на властите на грбот на работниот македонски народ и на пензионерите.
Левица ќе инсистира на реализирање на ветувањата дадени од актуелните власти за повисока пензија и воведување на минимална пензија од 15.000 денари.
За потсетување, во Програмата на Левица, предложена за време на Парламентарните избори, 2024, стоеше мерката за зголемување на пензиите и намалување на годините за одење пензија и тоа: 60 години за жени и 62 години за мажи“, се вели во соопштението на Левица.
Македонија
Сиљановска Давкова го прими кинескиот амбасадор, Џанг Ѕуо
Претседателката Гордана Сиљановска Давкова денеска го прими амбасадорот на Народна Република Кина, Џанг Ѕуо.
На средбата беше констатирано дека билатералните односи меѓу двете држави се основани врз пријателство и соработка во сите области од взаемен интерес, при што претседателката Сиљановска Давкова изрази подготвеност за натамошно проширување на билатералната соработка и продлабочување на македонско-кинеското пријателство во текот на нејзиниот мандат. Таа го реафирмираше македонскиот став за почитување на политиката „Една Кина“.
Соговорниците изразија очекување дека и понатаму ќе продолжат да се развиваат и унапредуваат меѓусебните односи во сите сфери од взаемен интерес, особено во делот на трговската размена и капиталните инфраструктурни проекти и ги нагласија можностите за проширување на економската соработка и туризмот. Во тој контекст, претседателката посочи дека е неопходно македонските стопанственици да бидат подобро запознаени со регулативата, прописите и функционирањето на кинескиот пазар, како би можело да се зголеми извозот во Кина.
Претседателката Сиљановска Давкова и кинескиот амбасадор Ѕуо разговараа и за улогата и влијанието на Народна Република Кина во светот, како и во нашиот регион, особено во контекст на економијата, а разменија мислења и информации и за ставовите на кинеската надворешна политика.