Македонија
Партиите се караат кој е крив за концесијата за рудникот во Иловица

Политичките партии и денеска со меѓусебни обвинувања за рудникот во Иловица.
Од ВМРО-ДПМНЕ велат кога во прашање се бизнис интересите и криминалот на ДУИ министрите во владата безпреговорно гласаат и даваат поддршка, за потоа пред граѓаните да лажат дека се против и протестираат против своите одлуки.
„Доколку е точна изјавата на дел од министрите во владата дека биле изманипулирани и не знаеле точно за што гласаат, Димитар Ковачевски треба веднаш да го разреши министерот за економија. Секако доколку смее да му се протистави на Али Ахмети и ДУИ. Ковачевски ако не го разреши Бектеши заради овој скандал со кои следува уништување на струмичкиот регион, редно е оние министри кои биле изманипулирани да си поднесат оставка и да престанат да му слугуваат на ДУИ и Али Ахмети“, пишуваат од партијата.
Од СДСМ, пак, им вратија дека проблемот со Иловица го создадале тие, односно Владата на Никола Груевски на кого Мицкоски му беше советник.
„Во 2012 и 2013 година се започнати сите постапки за отворање на рудник во Иловица и доделени првите концесии токму од Владата на ДПМНЕ и Никола Груевски, кога Мицкоски беше негов советник. Општините Ново Село и Босилово со градоначалници од ДПМНЕ имаат позитивна одлука за рудник. Дури и во изборната програма ДПМНЕ се фалеше со рудник во Иловица од 2017 година. Со години СДСМ се обидува да ја исправи неправдата врз граѓаните создадена од ДПМНЕ и заглавена во судски лавиринти“, рекоа од владејачката партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК повторно ќе го тестира системот за масовни известувања на граѓаните

Во текот на попладневните часови граѓаните ќе добијат тест-СМС порака преку системот cell broadcasting, со цел проверка на техничките можности за испраќање масовни известувања и аларми во случаи на кризни состојби, соопшти Центарот за управување со кризи.
Од таму појаснуваат дека станува збор за систем кој овозможува итни пораки да бидат испратени до сите корисници на мобилни телефони што се наоѓаат во одредена географска област, без разлика на мобилниот оператор. Целта е навремено и ефикасно информирање на населението при пожари, поплави, земјотреси, опасни временски појави или други вонредни ситуации.
Од ЦУК велат дека воспоставувањето на овој систем е национална потреба и воедно законска обврска согласно регулативите на Европската Унија, кои бараат сите земји да располагаат со механизам за масовно информирање и алармирање на граѓаните во услови на криза.
Македонија
Алиу: За 45 дена над 1.250 нови вработувања во здравството

Во рок од само 45 дена и за рекордно време се реализирани над 1.250 вработувања во 85 јавни здравствени установи низ државата, како дел од стратешкиот процес на кадровско зајакнување на здравствениот систем.
До овој момент, во рамките на процесот се спроведени над 1.700 тестирања, изјави министерот за здравство.
„Ова е значајно и историско зајакнување на кадарот во рекордно време во здравствениот сектор – дополнителна мотивација, конечно решен статус на сите овие лица кои со години немаа сигурност, здравствено осигурување, формален работен однос и беа под континуиран стрес. Сега, со овој чекор, добија достоинствено место во системот“, рече Алиу.
Со оваа кадровска стабилизација, Министерството за здравство, како што рече, испраќа силна порака за континуирана грижа и вложување во човечкиот капитал, како предуслов за подобри здравствени услуги за сите граѓани.
Македонија
(Видео) Брутална партизација на образованието пред избори, Јанеска и ВМРО-ДПМНЕ го претворија Инспекторатот во партиски штаб, велат од СДСМ

Весна Јаневска и ВМРО-ДПМНЕ спроведуваат брутална партизација во образованието пред изборите.
Во очи на распишување на локалните избори, гледаме масовни незаконски огласи за вработување и напредувања само по партиска линија, за вдомување на кадри на ВМРО-ДПМНЕ.
Државниот просветен инспекторат, под диригенство на Јаневска, станува партиски штаб на ВМРО-ДПМНЕ, истакна на прес-конфренеција Јованче Манасков, од СДСМ.
„Според информациите кои ни ги доставија свиркачи: Соња Зашоска, советничка во Општина Гази Баба од ВМРО-ДПМНЕ, треба да биде унапредена во раководител на одделение за инспекциски надзор и оценување на квалитет. Таа е истата инспекторка која го заштити Бојан Христовски од АНБ и неговото незаконски стекнато образование. Дали ова е награда за неа?
Понатаму, Валерија Анастасова, советничка на ВМРО-ДПМНЕ во Аеродром, според истите информации од свиркачите, ќе биде унапредена во раководител на сектор за стручно-административни работи.
Христина Јованоска, сегашен инспектор, ќе биде поставена за помошник главен инспектор.
Јане Николоски, исто така кадар на ДПМНЕ, ќе биде назначен за помошник раководител на сектор за односи со јавност и превод“.
Паралелно со ова, информира Манасков, се распишал јавен оглас за нови вработувања во инспекторатот, исто така, како што рече, по партиска линија.
Оцени дека партизацијата на образованието е брутална, на сите можни нивоа и со незаконски огласи за вработувања.
Како што наведен, само во последните неколку дена, распишани се незаконски огласи за вкупно 123 работни места, наводно, како што вели, за образовни асистенти во училишта кои не се трансферирани во ресурсни центри.
Според него, огласите се незаконски затоа што, според Законот за средно образование, само такви установи можат да вработуваат образовни асистенти.
„Интервјуата за дел од огласите започнале уште пред да истече рокот за пријавување. Постапките биле координирани од директорот на „Искра“, Марјан Арсов, од странство преку приватна Viber група“.
Од СДСМ бараат: Итно да се поништат „срамните огласи и незаконски унапредувања. Да се разрешат сите директори кои спровеле незаконска постапка.Да се запрат партиските вработувања и унапредувања.
„Ова е срам за образованието, срам за институциите, срам за државата. Наместо квалитет и независност, добиваме партиска приватизација на институциите, на штета на учениците, наставниците и сите граѓани.