На единствениот повикувачки број за итни случаи 112 во ЦУК, денеска, во 10.43 часот, била добиена пријава за проблем со сигнализацијата на пругата на улицата Киро Фетак во населбата Драчево, Скопско.

Од Секторот за операции и координација на ЦУК веднаш биле известени „Македонски железници“ за пријавата за дефект на сигнализацијата на рампите и за нивна понатамошна постапка според пријавениот случај.

„Во 10.53 часот ЦУК беше известен од ‘Македонски железници’ дека рампите се спуштени и на самото место се наоѓаат мајстори за отстранување на дефектот.

Од ЦУК во 12.37 часот повторно е направен телефонски контакт со „Македонски железници“, при што потврдија дека дефектот е отстранет. Притоа информираа и дека е можно на некои делови рампите да бидат затворени поради акцијата која е претходно предвидена за прскање на тревата околу железничките пруги“, се нагласува во информацијата од ЦУК.

„Македонски железници“ апелираат граѓаните да бидат трпеливи при процесот на спуштање и кревање на рампите затоа што сигнализацијата се контролира мануелно од страна на диспечерите на „Македонски железници“.

Бруталното претепување на кандидатот Албанец во баталјонот „Волци“ во АРМ од неговите македонски колеги е ѕвонче за тревога, се истакнува во соопшетнието од коалицијата „Вреди“:

„Овој аларм треба повеќе да ги загрижува албанските кадри во Министерството за одбрана, особено заменик-министерот, сега актуелен министер Тирон Јајага, кој мора да објасни зошто се случило тоа и зошто тој дозволил да се дојде до ваква ситуација. Ние прашуваме како може човек повикан на професионализам и соработка со НАТО да дозволи и да не преземе одговорност за ваков скандал? Како може ваков скандал да помине без одговорност, дури и од техничкиот премиер Талат Џафери и од в.д. министерот за внатрешни работи, Назим Буши? Дали е ова некое антиалбанско сценарио подготвено од Владата, сега веќе во заминување, за да создаваат меѓуетнички тензии?“, прашуваат од „Вреди“.

Ги повикуваат и истражните органи што побргу да го расветлат овој случај.

„И сторителите, кои го претепаа албанскиот капетан, да излезат пред правдата, како и да се дозне вистината кој и зошто го испратил во психијатриската болница во Бардовци? Кому му смета напредокот на Албанците во прашањата за државната безбедност и одбрана“, реагираат од „Вреди“.

Левица дава условна поддршка за предложените измени на Законот за организација и работа на органите на државната управа со воведување на една изборна единица.

Во Собранието на Република Македонија беа поднесени измените во Законот за организација и работа на органите на државната управа, со кои се овозможува реструктуирање на министерствата и зголемување на нивниот број по барање на коалицијата која го сочинува новото мнозинство во Парламентот.

„Левица повторно подава рака на ДПМНЕ за овие законски измени да бидат поддржани од нивните пратеници, со едноставен услов – паралелно со ова да се изгласа и Законот со кој ќе се промени изборниот модел и ќе биде воведена една изборна единица!

Воведувањето на една изборна единица во Република Македонија е неопходно заради еднаквото вреднување на секој глас на граѓаните даден на изборите.

Од мисијата на ОБСЕ веќе со години во своите извештаи препорачуваат ваков изборен модел во државата, а ова не би требало да биде проблем за прифаќање од страна на ДПМНЕ, со оглед на тоа дека тие во својата програма и во предизборните ветувања најавија вакво системско решение“, велат од Левица.

Потсетуваат дека измените за Изборниот законик беа поднесени и во претходниот парламентарен состав, а таквото законско решение најчесто не се спроведува поради коалициите на владејачките партии со партиите од т.н. албански блок, кои заради националистички мотиви и намалување на вредноста на гласовите на граѓаните од другите етникуми, не дозволуваат измена во овој закон.